ގާނޫނުތަކާއި ޚިލާފަށް މީހުން މެރުމާއި، އަނިޔާވެރިވުމަށް ގޮވާލުމަކީ ވަރަށް ޒިންމާދާރުކަންކުޑަ އަމަލެއް ކަމަށް ހޯމް މިނިސްޓަރު ޢަލީ އިޙްސާން މިިއަދު ވިދާޅުވެއްޖެެެއެވެ.
އިޙްސާން މިހެން ވިދާޅުވީ އެމްޑީޕީއިން އިއްޔެ ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ޗެއާޕާސަން ފައްޔާޟް އިސްމާޢީލް ދެއްކެވި ވާހަކަފުޅަކާ ގުޅިގެންނެވެ.
ފައްޔާޟް ވިދާޅުވީ ރައްޔިތުންނަށް އަނިޔާވެރިވީމާ ދެން ހަދަން ޖެހޭނީ ކުރީގެ ރައީސް މުޙައްމަދު އަމީނަށް ހެދި ގޮތް ކަމަށެވެ. އަދި ވެރިއަކު ރައްޔިތުންނަށް އަނިޔާވެރިވުމުން ރައްޔިތުން މަޑަކުން ނުތިބޭނެ ކަމަށާއި ތާރީޚު އަލުން އިއާދަވާނެ ކަމަށް ދޭހަވާ މޭރުމަކުން ފައްޔާޟް ވާހަކަދެއްކެވިއެވެ.
މި ވާހަކަތަކާ ގުޅިގެން އިޙްސާން އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖެއަކީ ޚިޔާލުފާޅުކުރުމުގެ މިނިވަންކަން ނުހަނު ފުޅާކޮށް ކަށަވަރުކޮށްދޭ ގައުމެއް ކަމަށެވެ. ނަމަވެސް މި ހައްގުގެ ބޭނުންކުރަންވާނީ ޒިންމާދާރުކަމާއިއެކު ކަމަށް ދެކެވަޑައިގަންނަވާ ކަމަށެވެ.
ވަކިން ޚާއްސަކޮށް ދައުލަތުގެ އިސް މަގާމުތައް ފުރުއްވާފައިވާ ބޭފުޅުން އަދި ސިޔާސީ ޕާޓީތަކުގެ ވެރިންނަކީ މި ކަންކަމުގައި ނަމޫނާ ދައްކަވަންޖެހޭ ބޭފުޅުން ކަމުގައި ދެކެވަޑައިގަންނަވާ ކަމުގައި އިޙްސާން ވިދާޅުވިއެވެ.
އިޙްސާން ވިދާޅުވީ ގާނޫނުތަކާއި ޚިލާފަށް މީހުން މެރުމަށާއި އަނިޔާވެރިވުމަށް ގޮވާލުމަކީ ވަރަށް ޒިންމާދާރުކަންކުޑަ އަމަލެއް ކަމަށެވެ.