އިންސާނުންގެ ވިސްނުމާއި ފިކުރަށް ބަދަލު އައިސްގެން ނޫނީ އިންސާނީ ހައްގުތައް ހިމާޔަތްކުރުމުގައި ހާސިލް ކުރަން ބޭނުންވާ ލަނޑުދަނޑިތައް ހާސިލް ނުކުރެވޭނެކަމަށް ހެލްތް މިނިސްޓަރު އަބްދުﷲ ނާޒިމް އިބްރާހިމް ވިދާޅުވެއްޖެއެވެ.
އިންސާނީ ހައްގުތަކުގެ ދުވަސް ފާހަގަ ކުރުމަށް ހިއުމަންރައިޓްސް ކޮމިޝަން އޮފް މޯލްޑިވްސްއިން ބޭއްވި ރަސްމީ ޖަލްސާގައި ވާހަކަފުޅު ދައްކަވަމުން މިނިސްޓަރު ނާޒިމް ވިދާޅުވީ އިންސާނީ ހައްގުތައް ހިމާޔަތްކުރުމަކީ އިންސާނީ ހައްގުތަކަށް އިހްތިރާމް ކުރުމަކީ ހަމައެކަނި ގާނޫނު ތަންފީޒުކޮށްގެން ކުރެވޭނެ ކަމެއް ކަމަށް ދެކުނު ދެކުން މާޒީވެ ހިނގައްޖެކަމަށެވެ. އޭގެ ބަދަލުގައި އިންސާނީ ހައްގުތަކަށް އިހްތިރާމުރުމަށް ބޭނުންވާ އެންމެ މުހިންމު އެކައްޗަކީ އިންސާނުންގެ ވިސްނުމާ ދިރިއުޅުމަށް ގެންނަ ބަދަލުކަމަށް މިނިސްޓަރު ވިދާޅުވިއެވެ.
“މީހުންގެ ވިސްނުމާ ފިކުރަށް ބަދަލު އައިސްގެން މެނުވީ އަޅުގަނޑުމެނަށް މިފަދަ ކަންކަމުގައި ހާސިލް ކުރަން ބޭނުންވާ ލަނޑުދަނޑިތައް ހާސިލެއް ނުކުރެވޭނެ. ވަކި ވަކި ރައިޓްސްއަށް އިހްތިރާމްކުރާ ފަދައިން މުޅި ދައުލަތް ދައުލަތުގެ ގޮތުގައި އެ އޮތް ރައިޓްސްތަކަށްވެސް އިހްތިރާމްކޮށްގެން މެނުވީ މި ނިޒާމް އަޅުގަނޑުމެނަކަށް ނުދެމެހެއްޓޭނެ.” މިނިސްޓަރ ނާޒިމް ވިދާޅުވި އެވެ.
އެހެން ކަމުން އިންސާނީ ހައްގުތައް ކަށަވަރުކޮށްދިނުމަށް މަސައްކަތްކުރާ ފަރާތްތަކުން މީހުންގެ ވިސްނުން ބަދަލުކުރުމަށް މަސައްކަތްކުރަން މިނިސްޓަރު ނާޒިމް ވަނީ އިލްތިމާސްކުރައްވާފައެވެ.
އެ ޖަލްސާގައި މިނިސްޓަރު ނާޒިމް ވަނީ ކުރީގެ ރައީސް މުހައްމަދު އަމީން އަވަހާރަކޮށްލި ގޮތައް ރައީސްޑރ.މުހައްމަދު މުއިއްޒުއާމެދު އަމަލު ކުރުމަށް ސިޔާސީ ޕާޓީއަކުން ފާޅުގައި ގޮވާލާފައިވާތީ އެކަން ކުށްވެރިކުރައްވާފައެވެ. މިނިސްޓަރު ވިދާޅުވީ ސިޔާސީ ޕާޓީގެ މަސައްކަތްތައް ހަމަ މަގުން ނުގެންދެވޭ ކަމަށްވާނަމަ އިންސާނީ ހައްގުތައް ކަށަވަރުކުރުމަށް ކުރާ މަސައްކަތް ވާނީ ފޫނެތްފަޔަށް ފެންފުރުން ކަހަލަ ކަމަކަށް ކަމުގައިއެވެ.
ޔުނިވާރސަލް ޑިކްލަރޭޝަން އޮފް ހިއުމަން ރައިޓްސްގައި ވާގޮތުން އިންސާނީ ޙައްޤުތައް ކަށަވަރު ކުރުމަކީ ވަކި މީހެއްގެ ކުލައަކަށް، ދީނަކަށް، ޖިންސަކަށް، ވަހަކަ ދައްކާ ބަހުރުވައަކަށް، ސިޔާސި ފިކުރަކަށް، ލިބިފައިވާ މުދަލަކަށް، މުޖުތަމަޢުގައި ލިބިފައިވާ ދަރަޖައަކަށް ނުވަތަ ޤަބޫލުކުރާ ޤަބޫލުކުރުމަކަށް ބެލުމެއްނެތި ހުރިހާ އެންމެންނަށް އެއް ހަމައެއްގައި އިންސާނީ ހައްޤުތައް ލިބުން ކަމަށް ވެސް މިނިސްޓަރު ފާހަގަ ކުރެއްވެވިއެވެ.
އަދި ރާއްޖެއިން ދަތިތަކާއެކުވެސް އިންސާނީ ހައްގުތަކުގެ ތެރެއިން ބައެއް ކަންކަން ހާސިލް ކުރެވިފައިވާކަން ފާހަގަ ކުރައްވާފަ އެވެ. އެގޮތުން ދިވެހިރާއްޖޭގައި އަންނަނީ ބޭސްފަރުވާކުރުމުގެ ހައްގާއި ތައުލީމު ލިބިގަތުމުގެ ހައްގުތަކުގައި ކުރިއެރުންތައް ހޯދަމުންކަމަށް މިނިސްޓަރ ވަނީ ފާހަގަކުރައްވާފައެވެ.