ހެޑްލައިން: ކުރީ ސަރުކާރުގެ ސެޓަލްމަންޓް ކޮމިޓީގެ މައްސަލަ ޖިނާއީ ތަހުގީގަކަށް ފޮނުވަން މާލިއްޔަތު ކޮމިޓީން ނިންމައިފި އެވެ،
ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ވަނީ ކުރީ ސަރުކާރުގައި އުފެއްދެވި ސެޓަލްމަންޓް ކޮމިޓީން އެކި ފަރާތްތަކަށް ބަދަލު ދިން މައްސަލައިގެ ޖިނާއީ ތަހުގީގެއް ހިންގުމަށް ފާސްކޮށްފައެވެ
މި މައްސަލަ ކޮމިޓީއަށް ހުށަހެޅުއްވީ ފުނަދޫ ދާއިރާގެ މެންބަރު މުޙައްމަދު މަމްދޫޙް ކަމަށާއި، ކެލާ ދާއިރާގެ މެންބަރު ޢަބްދުﷲ ޝަރީފް އެ ހުށަހެޅުމަށް ތާއީދުކުރެއްވި ކަމަށް ވެއެވެ.
މާލިއްޔަތު ކޮމިޓީން ފާސްކޮށްފައިވަނީ ކުރީ ސަރުކާރުގެ ސެޓަލްމަންޓް ކޮމިޓީން ނިންމި ނިންމުމާ ގުޅިގެން، އެކި ފަރާތްތަކަށް ބަދަލުދިން މައްސަލައިގައި އޭރު އޮތް އިކޮނޮމިކް ކައުންސިލްގެ ކޯޗެއަރ އަދި އޭރުގެ ރައީސް އިބްރާހީމް މުހައްމަދު ސާލިހު، ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލް، އަދި ރައީސުލްޖުމްހޫރިއްޔާގެ އޮފީހުގެ ކުރީގެ މިނިސްޓަރު އަލީ ޝިޔާމުގެ މައްޗަށް ޖިނާއީ ތަހުގީގެއް ހިންގައި ދައުވާ ކުރެވޭނަމަ އެކަން ކުރުމަށް ޕްރޮސިކިއުޓަރ ޖެނެރަލަށް ލަފާ އެރުވުމަށެވެ.
ކޮމިޓީގެ ނިންމުމުގައި ބުނެފައިވަނީ މި ތިން ބޭފުޅުންގެ މައްޗަށްވެސް ދައުލަތުގެ އިސް މަގާމެއްގައި ހުރެ، ގާނޫނުއަސާސީއާއި ޤާނޫނުން މަތިކޮށްފައިވާ ވާޖިބުތަކާ ހިލާފަށް، ދައުލަތުގެ މުދަލާއި ފައިސާއަށް ހިޔާނާތްތެރިވެ، އެ ފައިސާއާއި މުދަލުގެ ހައްގުވެރިން ފިޔަވައި އެހެން ފަރާތަކަށް ލިބިދިނުމަށް މަސައްކަތް ކޮށްފައިވާ ކަމަށް ތުހުމަތު ކުރެވޭ ކަމަށެވެ.
މީގެ އިތުރުން، 2019 ވަނަ އަހަރުން 2023 ވަނަ އަހަރަށް ބަދަލު ދިނުމުގެ އުސޫލުގެ ދަށުން ސޮއި ކޮށްފައިވާ އެއްބަސްވުންތަކަކީ އުފެދުމުގައި ވެސް ބާތިލް އެއްބަސްވުންތަކެއް ކަމުގައި ކޮމިޓީއަށް ފެންނަ ކަމަށާއި، އެ އެއްބަސްވުންތައް ބާޠިލް ކުރުމަށް ކުރަންޖެހޭ އެންމެހާ ގާނޫނީ ކަންކަން ކުރުމަށް ވަނީ ފާސްކޮށްފައެވެ.
ކޮމިޓީގެ މެންބަރުން ވަނީ މިއީ ވަކި މީހަކަށް އަމާޒުކޮށްގެން ކުރިއަށްގެންދާ މައްސަލައެއް ނޫން ކަމަށާއި، ކޮންމެ ބޭފުޅަކު ކުރިނަމަވެސް ދައުލަތުގެ ފައިސާ ނުހައްގުން ބަޔަކަށް ދީފައިވާނަމަ އެކަން ބަލަން ޖެހޭނެ ކަމަށް ވިދާޅުވެފައެވެ. އަދި މި ސަރުކާރުން ކޮރަޕްޝަނުގެ ޢަމަލެއް ހިންގާފައިވާނަމަ އެ މައްސަލަވެސް ކޮމިޓީން ބަލާނެ ކަމަށް މެންބަރުން ވިދާޅުވިއެވެ.
މި މައްސަލައިގައި މާލިއްޔަތު ކޮމިޓީން އިތުރު މުހިންމު ނިންމުންތަކެއްވެސް ނިންމާފައިވެއެވެ. އޭގެ ތެރޭގައި މާލިއްޔަތު ޤާނޫނުން ބޭރުން އެއްވެސް ފަރާތަކަށް ބަދަލެއް ދީފައިވޭތޯ ބަލައި، އެގޮތަށް ބަދަލުގެ ގޮތުގައި ދީފައިވާ އެއްޗެހި ދައުލަތަށް އަނބުރާ ހޯދުމަށް ބަންޑާރަ ނައިބަށާއި ކަމާ ގުޅުންހުރި އިދާރާތަކަށް އެންގުމަށް ފާސްކުރުން ހިމެނެއެވެ.
މި މައްސަލައިގެ މުހިންމުކަން ފާހަގަކޮށް، ކޮމިޓީގެ ގިނަ މެންބަރުން ވަނީ މިއީ ދައުލަތުގެ މާލިއްޔަތަށް ބޮޑު ގެއްލުމެއް ލިބިފައިވާ މައްސަލައެއްގެ ގޮތުގައި ފާހަގަކުރައްވާފައެވެ. އަދި މިފަދަ ކަންކަން ތަކުރާރުވިޔަ ނުދިނުމަށްޓަކައި މި މައްސަލަ ފުރިހަމައަށް ތަޙުޤީޤުކޮށް، ޒިންމާވާންޖެހޭ ފަރާތްތައް ޒިންމާދާރުކުރުވުމުގެ މުހިންމުކަން ފާހަގަކުރެއްވިއެވެ.