ދައުލަތުގެ ޓެކްސް އިދާރާ، މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން ވަނީ ކާނި ހޮޓެލްސް އާ ދެކޮޅަށް ޓެކްސްއަށް މަކަރުހެދުމުގެ ދައުވާ ކުރުމަށް ނިންމައިފިއެވެ.
މީރާއިން މިއަދު ނެރުނު ބަޔާނެއްގައި ބުނެފައިވަނީ، ކާނި ހޮޓެލްސް އިން ޓެކްސްއަށް ގަސްތުގައި މަކަރު ހަދާކަމަށް ތުހުމަތު ކުރެވޭތީ، މި މައްސަލަ ޖިނާއީ މައްސަލައެއްގެ ގޮތުގައި ތަހުގީގު ކޮށްދިނުމަށް ޕްރޮސެކިއުޓަރ ޖެނެރަލް އޮފީހުގައި އެދިފައިވާ ކަމަށެވެ. މި މައްސަލަ ފާހަގަ ކުރެވުނީ މީރާއިން ކުރި ތަހުގީގަކާ ގުޅިގެންނެވެ.
މީރާގެ ތަހުގީގުގައި، ކާނި ހޮޓެލްސް އިން ހިންގަމުން އަންނަ ކާނި ޕާމްބީޗް، ކާނި ގްރޭންޑް ސީވިއު، ކާނިވިލެޖް، އަދި ކާނި ބީޗް ހޮޓެލްސްގެ ވިޔަފާރިތައް ބަލައި ފާސްކޮށްފައިވެއެވެ. މި ފާސްކުރުމުން ދައްކާގޮތުގައި، 2019 ވަނަ އަހަރުން ފެށިގެން 2022 ވަނަ އަހަރުގެ ސެޕްޓެމްބަރުމަހުގެ ނިޔަލަށް އެ ހޮޓާތަކުން މީރާއަށް ހުށަހަޅާފައިވާ ގްރީންޓެކްސް، ޖީއެސްޓީ، ބީޕީޓީ އަދި އިންކަމް ޓެކްސް ބަޔާންތަކަކީ ސައްޙަނޫން ބަޔާންތަކެކެވެ.
މީރާއިން ފާހަގަކޮށްފައިވާ މައިގަނޑު މައްސަލަތަކުގެ ތެރޭގައި ހިމެނެނީ:
1. ރެސްޓޯރެންޓް، އެއާޕޯޓް ޓްރާންސްފާ އަދި ސްޕާގެ ހިދުމަތްތަކުން ލިބޭ އާމްދަނީގެ ބޮޑުބައި ހިމަނާފައި ނުވުން.
2. ޓުއާ އޮޕަރޭޓަރުން މެދުވެރިކޮށް އަދި އަމިއްލައަށް އަންނަ ފަތުރުވެރިންގެ މަޢުލޫމާތާއި އާމްދަނީ ރިޕޯޓްކޮށްފައި ނުވުން.
3. ހޮޓެލްސްއަށް އަންނަ ފަތުރުވެރިންގެ މައުލޫމާތު މީރާއަށް ހުށަހަޅާ ޓެކްސް ބަޔާންތަކުގައި ހިމަނާފައި ނުވުން.
މި މައްސަލައާ ގުޅިގެން، މީރާއިން ވަނީ ކާނި ހޮޓެލްސް އެންޑް ޓުއާސް އާއި އަސްނާ އިންވެސްޓްމަންޓްސްގެ ދެ ޑިރެކްޓަރުންކަމަށްވާ ޢަބްދުﷲ ނަޝީދު އާއި އާމިނަތު އާސިމާގެ އިތުރުން އެކައުންޓަންޓް އާއިޝަތު ރަޒުނާގެ މައްޗަށް ދައުވާކޮށްދިނުމަށްވެސް އެދިފައެވެ.
މީގެއިތުރުން، މީރާއިން ކުރި އޮޑިޓްތަކުން ދައްކާގޮތުގައި ކާނި ހޮޓަލުން 8 ލައްކައަށްވުރެ ގިނަ ޑޮލަރު (ދިވެހި ފައިސާއިން 13.3 މިލިއަނަށްވުރެ ގިނަ ރުފިޔާ) އިތުރަށް ދައްކަންޖެހެއެވެ. މި ފައިސާ ދެއްކުމަށް މީރާއިން ވަނީ ކާނި ހޮޓެލްސްއަށް އަންގާފައެވެ.