ހެޑްލައިން: އުމްރާއަށް ދިއުމަށް ރައްކާކޮށްފައި ހުރި 4،000 މިއަދު މާލޭގައި ހިނގި ބޮޑު އަލިފާނުގެ ހާދިސާގައި ރޯވި އިމާރާތުން، އުމްރާއަށް ދިއުމަށް ރައްކާކޮށްފައި ހުރި 4،000 އެއްހާ ޑޮލަރު ސިފައިން ވަދެ ސަލާމަތްކޮށްފިއެވެ. މި ފައިސާއަކީ މާލެ ސިޓީ ކައުންސިލްގެ ދިވެހި މުވައްޒަފެއް އުމްރާއަށް ދިއުމަށް އެއްކޮށްފައިވާ ފައިސާއެވެ.
މި މަޢުލޫމާތު ކަށަވަރުކޮށްދެއްވަމުން މާލޭގެ ޑެޕިއުޓީ މޭޔަރު އަހުމަދު ނަރީޝް ވިދާޅުވީ، ފައިސާގެ ސީދާ އަދަދު އެނގިވަޑައިނުގަންނަވާ ކަމަށެވެ. އެހެންނަމަވެސް، އެނގިފައިވާ ގޮތުގައި މި ފައިސާ ރައްކާކޮށްފައި ހުރީ ވައިޓަލް ރެޖިސްޓްރޭޝަންގައި މަސައްކަތްކުރާ ފިރިހެން މުވައްޒަފެކެވެ. މި މުވައްޒަފު މި މަހު އުމްރާއަށް ދިއުމަށް ތައްޔާރުވަމުން ދަނިކޮށް މި ހާދިސާ ހިނގާފައިވެއެވެ.
ފައިސާ ރައްކާކޮށްފައި ހުރީ އޮފީހުގެ ލޮކަރެއްގައެވެ. އަލިފާން ރޯވެ ފެތުރެމުންދިޔަ ވަގުތު ސިފައިންނާއި ފުލުހުންނާއި ކައުންސިލްގެ ބައެއް މުވައްޒަފުން ވަދެ، އޮފީހުގެ ލިޔެކިޔުންތަކާއި އެހެނިހެން ތަކެތި ސަލާމަތްކުރުމުގެ މަސައްކަތް ކުރިއެވެ. މި މަސައްކަތުގެ ތެރެއިން ސިފައިން ވަދެ އެ ފައިސާ ހޯދައިދީފައިވެއެވެ.
މި އަލިފާނުގެ ހާދިސާ ފުރަތަމަ ފެށުނީ މިއަދު ހެނދުނު 6:30 ހާއިރު ހައުސިން މިނިސްޓްރީގެ ފުރަތަމަ ފަންގިފިލާގެ ސީލިންގުގައެވެ. އޭގެ ފަހުން އަލިފާންގަނޑު ބޮޑުވަމުން ގޮސް، އެ އިމާރާތުގައި ހިންގާ ކޮންސްޓްރަކްޝަން މިނިސްޓްރީ އާއި ސިޓީ ކައުންސިލްގެ އޮފީހަށް ވެސް ބޮޑެތި ގެއްލުންތަކެއް ވެފައިވެއެވެ. އަލިފާންގަނޑު ކޮންޓްރޯލްކުރެވުނީ ރޯވިތާ ގާތްގަނޑަކަށް ހަތަރު ގަޑިއިރު ފަހުންނެވެ. ނަމަވެސް އަދިވެސް މުޅިން އަލިފާން ނިއްވާނުލެވޭ ކަމަށް މައުލޫމާތު ވަނީ ލިބިފައެވެ.