މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމްޓީސީސީގެ "ކަށަވަރު ޕްރޮމޯ 2024″އިފްތިތާޙު ކޮށްފިއެވެ. މި ޕްރޮމޯ އިފްތިތާހު ކުރީ އެމްޓީސީސީގެ ކަށަވަރު ޝޯރޫމްގައި މިއަދު ބޭއްވުނު ހާއްސަ ހަފުލާއެއްގައެވެ.
މި ޕްރޮމޯޝަން ކުރިއަށް ދާނީ މިއަދުން ފެށިގެން 31 ޑިސެންބަރު 2024 ގެ ނިޔަލަށެވެ. މި ޕްރޮމޯޝަންގެ މަގުސަދަކީ ކަސްޓަމަރުންނަށް ޑިސްކައުންޓާއެކު އެމްޓީސީސީގެ ޕްރޮޑަކްޓުތައް ވިއްކުމެވެ.
މި ޕްރޮމޯގެ ދަށުން ޑިސްކައުންޓް ދެވޭ ޕްރޮޑަކްޓްތަކުގެ ތެރޭގައި
- ސުޒުކީ އިންޖީނާއި،
- އިންޖީނުގެ ސްޕެއަރޕާޓްސް،
- ކާސްޓްރޯލް އަޑީތެޔޮ،
- ސްކޮޓްބޭޑަރ ފައިބަރު ސާމާނު،
- ޕީޕީޖީ މެރިން ކޯޓިންގ،
- މަރޯލް ހުންގާނު ސިސްޓަމް،
- އިންޑަސްޓްރިއަލް ގޭސް އަދި އޮޑިދޯނިފަހަރަށް ބޭނުންވާ އެހެނިހެން ސާމާނު ހިމެނެއެވެ.
މި ޕްރޮމޯގެ މުއްދަތުގައި ކުރައްވާ ކޮންމެ -/5,000 ރުފިޔާގެ ވިޔަފާރިއަކަށް ކޫޕަނެއް ލިބިވަޑައިގަންނަވާނެއެވެ. އަދި ޕްރޮމޯ ނިންމާލަމުން ނެގޭ ގުރުއަތުން ހޮވޭ ފަރާތަކަށް އެއްލައްކަ ރުފިޔާގެ އަގުހުރި ސުޒުކީ 60 ހޯސްޕަވަރުގެ އިންޖީނެއް ލިބިވަޑައިގަންނަވާނެއެވެ.
ކަށަވަރު ޕްރޮމޯ 2024 އަމާޒުކޮށްފައިވަނީ އޮޑިވެރިންނާއި، މަސްވެރިންނާއި، އިންޖިނިއަރުންނާއި، ފަތުރުވެރިކަމާއި އަދި ޓްރާންސްޕޯޓް ދާއިރާގައި މަސައްކަތްކުރައްވާ ފަރާތްތަކަށެވެ.
މި ޕްރޮމޯޝަންގެ މުއްދަތުގައި އުޅަނދުފަހަރުގެ އިންޖީނުގެ ސާވިސް އިންސްޕެކްޝަން ކުރިއަށް ގެންދިއުމާއި، މެއިންޓަނަންސާ ބެހޭ ގޮތުން އޮޑިވެރިން އިތުރަށް ހޭލުންތެރި ކުރުވުމަށް ޓަކައި މަޢުލޫމާތު ފޯރުކޮށްދިނުމާއި، އިންޑަސްޓްރިއަލް ސައިޓުތަކާއި އޮޑިހަރުގެތަކަށް ޒިޔާރަތްކުރުން ފަދަ އިތުރު ހަރަކާތްތައް ރޭވިފައިވާކަމަށް އެމްޓީސީސީން މަޢުލޫމާތު ދެއެވެ.
އެމްޓީސީސީގެ އަމާޒަކީ އަބަދުވެސް ކަސްޓަމަރުންނަށް ލުއިފަސޭހަ ގޮތްތައް ހޯދައިދިނުން ކަމަށް ބުނެ، ކޮންމެ އަހަރަކުވެސް އެކިއެކި ޕްރޮޑަކްޓްތަކުން ކަސްޓަމަރުންނަށް ލުއިފަސޭހަ ޕްރޮމޯޝަންތައް ބޭއްވުމާއި، ރާއްޖޭގެ އެކި ކަންކޮޅުތަކުގައި ތިބި އެމްޓީސީސީގެ ކަސްޓަމަރުންނަށް މަޢުލޫމާތު ފޯރުކޮށްދިނުމުގެ އިތުރުން އިންޖީނުތައް ރަނގަޅަށް ބެލެހެއްޓުމާއި ޓެކްނިކަލް ކަންކަމަށް އަހުލުވެރިކުރުމަށް ހަރަކާތްތައް އެ ކުންފުނިން އަބަދުވެސް ރާވާ ހިންގަމުން ގެންދާ ކަމަށް އެމްޓީސީސީން ވަނީ ބުނެފައެވެ.