ބުރާސްފަތި ދުވަހު ހިނގި އަލިފާނުގެ ހާދިސާގެ ސަބަބުން މެދުކެނޑިފައިވާ ތިން މިނިސްޓްރީގެ މަސައްކަތްތައް އަލުން ފެށުމަށްޓަކައި ހަރަކާތްތެރިވަމުންދާ ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ)ގެ މުވައްޒަފުންނަށް މިނިސްޓަރ އޮފް ހައުސިންގ، ލޭންޑް އެންޑް އިންފްރާސްޓްރަކްޗަރ ޑރ. މުޙައްމަދު މުޢިއްޒު ފަހުމީ ޝުކުރު އަދާކުރައްވައިފިއެވެ.
ފަހުމީ ކުރެއްވި ޕޯސްޓެއްގައި ވިދާޅުވެފައިވަނީ އަލިފާނުގެ ހާދިސާއާ ގުޅިގެން ޚިދުމަތް މެދުކެނޑިފައިވާ ތިން މިނިސްޓްރީގެ މަސައްކަތްތައް އަލުން ފެށުމަށްޓަކައި، ދަރުބާރުގޭގައި ކުރެވެމުންދާ މަސައްކަތުގެ ތެރެއިން ކަރަންޓާ ގުޅުންހުރި އެންމެހައި މަސައްކަތްތަކާއި، އެހެނިހެން ދާއިރާތަކުން އެހީތެރިކަން ބޭނުންވާ ކަންކަމުގައި ސްޓެލްކޯގެ މުވައްޒަފުން ދެއްވަމުންގެންދަވާ އެހީތެރިކަމަށް އިޚްލާޞްތެރިކަމާއެކު ޝުކުރު ދަންނަވާ ކަމަށެވެ.
މީގެއިތުރުން، ފަހުމީ ވިދާޅުވެފައިވަނީ ސްޓެލްކޯގެ މުވައްޒަފުންނަކީ ޤައުމަށާއި ރައްޔިތުންނަށް ދިމާވާ މިފަދަ ކޮންމެ ކަމަކީ ޤައުމީ ޒޤައުމީ ޒިންމާއެއްގެ ގޮތުގައި ދެކި، ނަމޫނާ ދައްކަމުންދާ ފަޚުރުވެރި މުވައްޒަފުންތަކެއް ތިބި ކުންފުންޏެއް ކަމަށެވެ.
އަމީނީ މަގުގައި ހުންނަ ހައުސިންގ މިނިސްޓްރީ އާއި ކޮންސްޓްރަކްޝަން މިނިސްޓްރީގައި ހިނގި އަލިފާނުގެ ހާދިސާގައި އެ ދެ ތަން ބޭނުން ނުކުރެވޭ ވަރަށް އަނދައިފައިވާއިރު، އެ އިމާރާތާ ކައިރީގައި ހުންނަ ގްރީން ބިލްޑިންގައި ވެސް އަލިފާން ރޯވެ ގެއްލުންތަކެއް ވެފައިވެއެވެ. ގްރީން ބިލްޑިންގަކީ އެންވަޔަރަމަންޓް މިނިސްޓްރީ އާއި އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ) ހިންގަމުން އައި އިމާރާތެވެ.
މި ހާދިސާއާ ގުޅިގެން، އެ ތިން ވުޒާރާ ދަރުބާރުގެއަށް ވަގުތީ ގޮތުން ބަދަލު ކުރުމުގެ މަސައްކަތް މިހާރު ދަނީ ކުރެވެމުންނެވެ.