ގުރައިދޫގައި 4 މަހުގެ ކުއްޖަކު ނިޔާވެފައި އޮއްވާ ފެނިއްޖެއެވެ.
ނިޔާވެފައި އޮއްވާ ފެނުނު ތުއްތު ކުއްޖާގެ މަރާމެެދު ޝައްކު ކުރެވޭ ކަންތައްތަކެއް ހުރި ކަމަށާއި އެކަމުގެ ސަބަބުން އިތުރަށް މައްސަލަ ތަހުގީގު ކުރަމުންދާ ކަމަށް މައުލޫމާތު ވަނީ ލިބިފައެވެ. ރޭ ދަންވަރު 2 އާއި 3 އާ ދެމެދުގެ ވަގުތެއްގައި ގުރައިދޫ އިން ފެނުނު ނިޔާވެފައި އޮތް 4 މަހުގެ ކުއްޖާގެ ނޭފަތުން ލޭ އައިސްފައިވާ ކަމަށް ވަނީ މައުލޫމާތު ލިބިފައެވެ. އަދި މިހާރު ކުއްޖާ ފެނުނު ގެއާއި އެ ސަރަޙައްދު ވަނީ ފުލުހުންގެ ތަހުގީގަށް ބަންދު ކޮށްފައިވާއިރު ކުއްޖާގެ ހަށިގަނޑު ވަނީ މާލެ ގެންދެވިފައެވެ.
އިތުރު މައުލޫމާތު ލިބިފައިވާ ގޮތުގައި، ކުއްޖާ މާލެ ގެންދިޔައީ ޝައްކު އުފެދޭ ކަމެއް ހުރެގެން ކަމަށްވެއެވެ. އަދި އެ ތުއްތު ކުއްޖާ މާލެ ގެންގޮސް ޓެސްޓު ހަދާފައިވާ ކަމަށާއި އަދި މިހާރު ކުއްޖާގެ ހަށިގަނޑު އޮތީ މޯޗަރީގައި ކަމަށްވެސް މައުލޫމާތު ވަނީ ލިބިފައެވެ.
ފުލުހުން ބުނި ގޮތުގައި (14 ޑިސެމްބަރ 2024) މިއަދުގެ ވަގުތެއްގައި ކ ގުރައިދޫގައި 4 މަހުގެ ތުއްތު ކުއްޖަކު ނިޔާވެފައިވާ ކަމުގެ ރިޕޯޓް ކޮށްފައިވާ ކަމަށެވެ. އަދި މި ކުއްޖާގެ ހަށިގަނޑު އޮޓޮޕްސީ ހެދުމަށްޓަކައި ރާއްޖެއިން ބޭރަށް ފޮނުވުމަށް ވަނީ ހަމަޖެހިފައެވެ.
މި މައްސަލައިގެ ތަހުގީގު ކުރިއަށްދާ ކަމަށް ފުލުހުން ވަނީ ބުނެފައެވެ.
ތަފުސީލު އަދާހަމަ ކުރަމުން ދާނަން….