ބަނދަރާއި ނެރުގެ މަޝްރޫޢުގައި ކައުންސިލުން ފާހަގަކުރެއްވި ކަންކަން ވަރަށް ސީރިއަސްކޮށް ބައްލަވައި ދެމެހެއްޓިނިވި ގޮތެއްގައި އެކަންކަމަށް ޙައްލު ހޯއްދެވުމަށް މަސައްކަތް ކުރައްވާނެކަމުގައި ރައީސުލްޖުމްހޫރިއްޔާ ޑރ މުޙައްމަދު މުޢިއްޒު، ވިދާޅުވެއްޖެއެވެ.
އދ. ދިއްދޫ ކައުންސިލާއި އެރަށު އަންހެނުންގެ ތަރައްޤީއަށް މަސައްކަތްކުރާ (އ.ތ.މ) ކޮމިޓީގެ މެންބަރުންނާއި ބައްދަލުކުރައްވައި ރަށުގެ ތަރައްޤީއަށް ބޭނުންވާ ކަންކަމާ ގުޅޭގޮތުން މަޝްވަރާކުރައްވައިފިއެވެ. އެ ބައްދަލުކުރެއްވުން ކުރިއަށްދިޔައީ މިރޭ ދަނގެތި ކައުންސިލްގެ އިދާރާގައެވެ.
އެ ބައްދަލުކުރެއްވުމުގައި ކައުންސިލުން ވަނީ ރަށުގެ ރައްޔިތުންގެ ކަންބޮޑުވުންތަކާއި ރަށުގެ ތަރައްޤީއަށް ބޭނުންވާ ކަންތައްތައް ރައީސުލްޖުމްހޫރިއްޔާއާ ޙިއްޞާކުރައްވާފައެވެ. އެގޮތުން ބަނދަރުގެ މަޝްރޫޢާއި ނެރު ފައިކަށި މަޝްރޫޢު ކުރިއަށްގެންދިއުމުގައި ރައްޔިތުންގެ ހުރި ކަންބޮޑުވުންތައް ކައުންސިލުން ޙިއްޞާކުރެއްވިއެވެ. އަދި ރަށްގިރުމުގެ މައްސަލަވެސް ކައުންސިލުން ފާހަގަކުރެއްވިއެވެ. މީގެ އިތުރުން ކައުންސިލުން ވަނީ މިހާރު ކުރިއަށްދާ މަޝްރޫޢުތަކާ ގުޅޭގޮތުން، ރައްޔިތުން ބޭނުންވާ ގޮތްތައް ތަފުޞީލީ ގޮތެއްގައި ޙިއްޞާކުރައްވާއެވެ. އަދި ރަށުގައި ތަޢުލީމީ ދާއިރާގައި ހުރި ކަންބޮޑުވުންތައްވެސް ކައުންސިލުން މިބައްދަލުކުރެއްވުމުގައި ޙިއްޞާކުރެއްވިއެވެ.
މި ބައްދަލު ކުރެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި ބަނދަރާއި ނެރުގެ މަޝްރޫޢުގައި ކައުންސިލުން ފާހަގަކުރެއްވި ކަންކަން ވަރަށް ސީރިއަސްކޮށް ބައްލަވައި ދެމެހެއްޓިނިވި ގޮތެއްގައި އެކަންކަމަށް ޙައްލު ހޯއްދެވުމަށް މަސައްކަތް ކުރައްވާނެކަމުގައި ވިދާޅުވިއެވެ.
މިއަދުގެ ބައްދަލުކުރެއްވުމުގައި ރައީސްގެ އަރިހުގައި ބައިވެރިވެވަޑައިގެންނެވި ވަޒީރުން ވަނީ ދިއްދޫގެ ތަރައްޤީއަށް ކުރިޔަށްގެންދާ މަޝްރޫޢުތަކުގެ އެންމެ ފަހުގެ މަޢޫލޫމާތުތައް ޙިއްޞާކުރައްވާފައެވެ.