އދ. އޮމަދޫގެ ބަނދަރުގެ މައްސަލަ ޙައްލުކޮށްދެއްވުމަށް ސަރުކާރުން އެންމެ އިސްކަންދޭ މަޝްރޫޢުތަކުގައި ހިމަނައިގެން އަންނަ އަހަރުގެ ކުރީކޮޅު ތަރައްގީކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ އިއްޔެ އޮމަދޫއަށް ކުރެއްވި ދަތުރުފުޅެއްގައި އެރަށުގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
އދ. އޮމަދޫގައި މިހާރު އޮތް ބަނދަރަކީ މީގެ 25 އަހަރުކުރިން ރަށުގެ ރައްޔިތުން ތަރައްޤީކުރި ބަނދަރެކެވެ. އޭގެފަހުން އެއްވެސް މަރާމާތުކުރުމުގެ މަސައްކަތްތެއް ނުކުރެވި މުޅި ބަނދަރު ވަނީ އެއްކޮށް ހަލާކުވެ ބޭނުން ނުކުރެވޭ ވަރު ވެފައެވެ. މިކަމުގެ ސަބަބުން ރަށުގެ އޮޑިދޯނިފަހަރު އެޅުމުގައި ވަނީ ވަރަށް ބޮޑެތި ދަތިތަކެއް ކުރިމަތިވެފައެވެ.
ރައީސުލްޖުމްހޫރިއްޔާ އޮމަދޫއަށް ވަޑައިގެން ވަނީ ބަނދަރު ބައްލަވާލައްވާފައެވެ. އަދި ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސް ވިދާޅުވީ، އެރަށުގެ ތަރައްޤީއަށް ރައްޔިތުން އެދޭގޮތަށް، އެ ރައްޔިތުންގެ އަޑުއަހައިގެން ކަންކަން ކޮށްދެއްވާނެކަމަށެވެ. މިގޮތުން އެންމެ މުހިންމު ކަމަކީ ބަނދަރު މައްސަލަ ހައްލުކުރުންކަން ފާހަގަކުރައްވައި، އެކަމަށް ރަނގަޅު ހައްލެއް ގެނެސްދެއްވާނެކަމަށް ރައީސް ވަނީ ވިދާޅުވެފައެވެ.
ރައީސް އިތުރަށް ވިދާޅުވީ، އަންނަ އަހަރުގެ ބަޖެޓުން ވަރަށް ގިނަ މައްސަލަތަކަށް ހައްލު ގެނެވޭނެކަމަށާއި، އެގޮތުން ހުރިހާ މައްސަލައެއް ހައްލުވާނެ ފުރިހަމަ ބަނދަރެއް ތަރައްޤީކޮށްދެއްވާނެކަމަށެވެ. އަދި ބަނދަރުގެ މަޝްރޫޢުއާއެކު އޮމަދޫގެ ރަށްގިރުމުގެ މައްސަލަވެސް އަންނަ އަހަރުގެ ކުރީކޮޅު އެންމެ އިސްކަމެއްދީގެން މަސައްކަތް ކޮށްދެއްވާނެކަމަށްވެސް ރައީސް ވިދާޅުވިއެވެ.
މީގެ އިތުރުން، އޮމަދޫގެ ސިއްޙީ މަރުކަޒާއި ސްކޫލްގެ ހާލަތު ރަނގަޅުކުރުމަށްޓަކައި އަންނަ އަހަރު މަސައްކަތްތަކެއް ކުރައްވާނެކަމަށާއި، ކުޅިވަރުގެ ވަސީލަތްތައް ތަރައްޤީކުރުމާއި ކުނި މެނޭޖުކުރުމުގެ ނިޒާމު ހަރުދަނާ ކުރުމަށް ވެސް މަސައްކަތްތަކެއް ކުރައްވާނެކަމަށް ރައީސް ވިދާޅުވިއެވެ.
ރައީސުލްޖުމްހޫރިއްޔާ ޑރ. މުޢިއްޒު ވިދާޅުވީ، އަންނަ އަހަރަކީ ވަރަށް ގިނަ މައްސަލަތަކަށް ހައްލު ހޯދުމުގެ މަސައްކަތް ފެށޭނެ އަހަރުކަމަށާއި، ރަށްރަށަށް ވެވަޑައިގެންނެވި ވަޢުދުތައް ފުއްދުމުގެ އަމަލީ މަސައްކަތް ފެންނާނެ ކަމަށެވެ.