އުޅަނދުފަހަރުގެ ޖޫރިމަނާއަށް ގެނައި ބަދަލަކީ ރައީސް ރައްޔިތުންނަށް ލުއިފަސޭހަގޮތް ހޯދުމަށް ކުރައްވާ މަސައްކަތް ކަމަށް ވަޒީޒު އަމީން ވިދާޅުވެއްޖެއެވެ.
އެއްގަމު އުޅަނދާއި ކަނޑު އުޅަނދުފަހަރާ ގުޅޭގޮތުން ދައްކަންޖެހޭ އަހަރީފީއާއި ޖޫރިމަނާގެ ފައިސާ ބަހައިލައިގެން ދެއްކުމުގެ ގަވާއިދު، ސަރުކާރުން އިއްޔެ ވަނީ ގެޒެޓްކޮށްފައއެވެ، އަމީން ވިދާޅުވީ މިހާރު ނިންމާފައިވަނީ މި ޤަވާޢިދުގެ ދަށުން ކޮންމެ ބޭފުޅަކަށްވެސް އެއްގަމު އުޅަނދާއި ކަނޑު އުޅަނދުފަހަރުން ކޮންމެ އަހަރަކު އެއް ފަހަރު ދައްކަންޖެހޭ އަހަރީ ފީ އާއި ޖޫރިމަނާގެ ފައިސާގެ ތެރެއިން ދައުލަތަށް ދައްކަންޖެހި ނުދެއްކިހުރި ފައިސާ، ބަހާލައިގެން ދައްކާލެވޭނެ ކަމަށާއި، ފުރުޞަތު ހުޅުވާނެ ކަމަށެވެ.
އަދި ރައީސް ޑރ މުޢިއްޒުގެ ވިސްނުންފުޅަކީ ކޮންމެ ކަމެއްގައިވެސް ރައްޔިތުންނަށް އެންމެ ލުއިފަސޭހަގޮތް ހޯއްދަވައި ދެއްވުން ކަމަށް ވެސް ވިދޅުވިއެވެ.
ގެޒެޓްކުރި ގަވާއިދުގައި ބުނެފައިވަނިީ ވަކި ޝަރުތުތަކެއް ފުރިހަމާ ނަމަ، ދައުލަތަށް ދައްކަން ޖެހި ނުދެއްކި ހުރި ފައިސާ ގަވައިދުގައިވާ ގޮތުގެ މަތިން ބަހާލައިގެން ދެއްކުމުގެ ފުރުސަތު ދެވޭނެ ކަމަށެވެ. އަދި އެ ޝަރުތުތަކުގެ ތެރޭގައި ހިމެނެނީ ދައްކަން ޖެހި ނުދައްކާ ހުރި ފައިސާގެ އަދަދު 10،000ރ. އަށް ވުރެ އިތުރުވެފައިވުމާއި އެ ފައިސާއަކީ ފައިސާ ދެއްކުމުގެ ސުންގަނޑި ފާއިތުވެފައިވާ ފައިސާއަށް ވުމާއި ގަވައިދުގެ ދަށުން ފައިސާ ބަހާލައިގެން ދެއްކުމަށް ހުށަހެޅުމާއި މީގެކުރިން ބަހާލައިގެން ފައިސާ ދެއްކުމުގެ ފުރުސަތު ދީފައިވާ ފަރާތަކަށް ނުވުމާއި އެދޭ ފަރާތަކީ އުޅަނދުގެ ވެރިފަރާތް ކަމުގައިވުމެވެ.
އެއްބަސްވުމާ އެއްގޮތަށް މަގުބޫލް އުޒުރެއް ނެތި ފައިސާ ނުދައްކާތާ 30 ދުވަސް ވެޖެނަމަ، އެއްބަސްވުން ބާތިލް ކުރުމުގެ އިހްތިޔާރު މިނިސްޓްރީއަށް ލިބިގެންވާ ކަމަށް ގަވައިދުގައިވެއެވެ.