ލަގްޒަރީ ފެޝަން މެގަޒިން ފޯބްސް އިން ހޮވި އަންނަ އަހަރު ޗުއްޓީ ހޭދަކުރަން އެންމެ ސަޅި މަންޒިލް ހިމެނޭ ކަލަންޑަރުގައި ރާއްޖެ ހިމެނިއްޖެ އެވެ.
އެމެރިކާގެ ނިއުޔޯކްގައި މައި މަރުކަޒު ހުންނަ ފޯބްސް މަޖައްލާގެ ކިޔުންތެރިންގެ ހިޔާލުގެ މައްޗަށް އެކުލަވާލާ ފޯބްސް ޓްރެވަލް ގައިޑް ޓޮޕް 12 ޑެސިޓޭޝަންގައި ރާއްޖޭގެ އިތުރުން ގިނަ މަންޒިލްތަކެއް ހިމަނާފައިވެ އެވެ. ނަމަވެސް މި މެގަޒިންގެ މެއިން ފޮޓޯގެ ގޮތުގައި ބޭނުންކޮށްފައިވަނީ ރާއްޖޭގެ ވެލާ ރިސޯޓުގެ ރީތި ފޮޓޯއެކެވެ.
ރާއްޖޭގެ ވެލާ ރިސޯޓުގެ ރީތި ފޮޓޯއެއް މަޖައްލާގެ މައި ފޮޓޯގެ ގޮތުގައި ހިމަނާފައިވާއިރު ފޯބްސް އިން ބުނެފައިވާ ގޮތުގައި ރާއްޖެއަކީ ހިތްފަސޭހަ ޗުއްޓީއެއް ހޭދަކޮށްލަން އަންނަ އަހަރު ދާން އެންމެ ރަނގަޅު މަންޒިލެކެވެ. އަދި ރާއްޖެއަކީ ވެލްންސް ޓޫރިޒަމްގެ ދުނިޔޭގެ ހޮޓް ސްޕޮޓެއް ވެސް މެއެވެ.
ފޯބްސްގެ އަންނަ އަހަރުގެ ގައިޑް ނުވަތަ ޓްރެވަލް ކަލަންޑަރުގައި ރާއްޖޭގެ އިތުރުން އެންމެ މަގުބޫލު މަންޒިލްތަކުގެ ގޮތުގައި އެމެރިކާގެ ނިއުއޯލިންސްގެ އިތުރުން ބޫޓާން އާއި މޮރޯކޯ އަދި ގްރީސްގެ އެތަންސްގެ އިތުރުން އެމެރިކާގެ ނޯތް ކެރޮލައިނާ އާއި ހޮލެންޑުގެ އެމްސްޓެޑަމްވެސް ހިމެނެ އެވެ. އަދި އެމެރިކާގެ ފްލޮރިޑާ އާއި އިންޑޮނޭޝިއާގެ ސުމްބާ އަދި އޮސްޓްރޭލިއާގެ ބްރިޒްބަން ވެސް ހިމެނެ އެވެ.
ފޯބްސް އިން ހޮވި އަންނަ އަހަރުގެ އެންމެ މުހިންމު މަންޒިލްތަކުގެ ލިސްޓުގައި ރާއްޖެ ހިމެނިފައިވާއިރު، ދުނިޔޭގެ ޓޫރިޒަމްގައިދޭ ދުވަސްވީ އެވޯޑެއް ކަމަށްވާ ވޯލްޑް ޓްރެވަލް އެވޯޑުގެ އެންމެ ފުރިހަމަ މަންޒިލްގެ މަގާމު ފަސް ވަނަ ފަހަރަށް ރާއްޖޭން މި އަހަރު ވަނީ ހޯދާފަ އެވެ.