މަގާމާ ހަވާލުވެވަޑައިގަތުމަށްފަހު، "އެކްސް" ގައި ކުރެއްވި ޕޯސްޓެއްގައި ފުއާދު ވިދާޅުވެފައިވަނީ ތައިލެންޑަށް ރާއްޖެއިން ކަނޑައަޅާ ސަފީރުކަމަށް އައްޔަންކުރެއްވި ކަމަށްޓަކައި ރައީސް ޑރ. މުޙައްމަދު މުޢިއްޒަށް ވަރަށް ބޮޑަށް ޝުކުރުވެރިވާ ކަމަށެވެ.
"އަޅުގަނޑަށް ދެއްވި އިތުބާރާއި، ތައިލެންޑަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރުގެ މަގާމަށް އަޅުގަނޑު އައްޔަން ކުރެއްވުމަށްޓަކައި ރައީސް ޑރ މުހައްމަދު މުއިއްޒަށް ވަރަށްބޮޑަށް ޝުކުރިއްޔާ، ރައީސުލްޖުމްހޫރިއްޔާ އަދި ފޮރިން މިނިސްޓަރުގެ އިރުޝާދުގެ ދަށުން މަގާމުގެ ޒިންމާ ފުރިހަމައަށް އަދާކުރުމަށް އަޅުގަނޑު މަސައްކަތް ކުރާނަން،" ފުއާދު ވިދާޅުވިއެވެ.
ފުއާދު ތައުފީގަކީ އިލެކްޝަންސް ކޮމިޝަނުގައި ގިނަ ދުވަސްތަކެއް ވަންދެން މަސައްކަތް ކުރައްވާފައިވާ ބޭފުޅެކެވެ. 2008 ވަނަ އަހަރުގެ ސެޕްޓެމްބަރުން ފެށިގެން 2009 ގެ ސެޕްޓެމްބަރާ ހަމައަށް އީސީގެ މެންބަރުކަން ކުރެއްވުމަށްފަހު، 2009 ގެ ސެޕްޓެމްބަރުން ފެށިގެން 2014 ގެ މާރޗާ ހަމައަށް އީސީގެ ރައީސްކަން ކުރެއްވިއެވެ. މެދުކެނޑުމަކަށްފަހު 2019 ވަނަ އަހަރުގެ ނޮވެމްބަރު މަހު އީސީއަށް އެނބުރި ވަޑައިގަތް ފުއާދު، 2021 ގެ ސެޕްޓެމްބަރުގައި އަނެއްކާވެސް އީސީގެ ރައީސްކަމަށް އައްޔަން ކުރެވުނެވެ. ފުއާދުގެ އެންމެ ފަހުގެ ދައުރު ހަމަވެފައި ވަނީ މިދިޔަ ނޮވެމްބަރު މަހުގެ 24 ވަނަ ދުވަހުއެވެ.