ޒަމާނުއްސުރެ އަޅުގަނޑުމެން ދިވެހިންގެ ތެރޭގައި ކުރުނބާ ފެން މިއީ އެތައް ގޮތަކުން ފައިދާ ހުރި، މަގުބޫލު ބުއިމެކެވެ. އިހު ޒަމާނުގައި ރުއްތައް ގިނަ، ފަސޭހައިން ބޭނުން ވަރަކަށް ކުރުނބާ ލިބުނު ނަމަވެސް އަދު މިއީ އަގު ބޮޮޑު މޭވާ އަަކަށް ވެސް މިވަނީ ވެފައެވެ. އެހެނެއްކަމަކު އަދިވެސް ބައެއް ރަށްރަށުގެ ބައެއް ގޭގޭގައި ކޮންމެ ދުވަހެއްގެ ފިނިބުއިމަކަށް ތާޒާ ކުރުނބާ ލިބެން ހުރެއެވެ. ކޮންމެ ގޮތަކަށް ލިބިގެން ނުވަތަ ހޯދައިގެން ބޭނުން ކުރި ކަމުގައި ވިޔަސް ކުރުނބަލުން ލިބޭ ފައިދާތަކަށް ބަދަލެއް ނާންނާނެތާއެވެ. މީހަކު ބަލިވެގެން އެނދުމަތިވުމާއެކު އެހީތެރިންނަށް، ގާތް މީހުންނަށް، އެބަލިމީހާއަށް ދޭނެ އެއްޗަކާމެދު ވިސްނާލުމުގެ ކުރިން، ފުރަތަމަވެސް ހިޔާލަށް އަންނަނީ ކުރުނބަލެވެ. އެހެނީ ކުރުނބާ ފެނުގެ ފައިދާތައް ގިނަވެފައި، ބަލިމީހާއަށް އެންމެ އަވަހަށް ހަކަތައާއި ލުއި ލިބޭ ބުއިމަކަށް ވެފައިވާތީއެވެ.
މިހާރަކަށް އައިސް ކުރުނބާ ފެނަކީ (ޕްރީ-ވޯކްއައުޓް) ކަސްރަތު ކުރުމުގެ ކުރީ ބުއިމެއްގެ ގޮތުގައި ވެސް މަގުބޫލުވަމުން އަންނަ ބުއިމެކެވެ. މި ބުއިމުގައި އެކުލެވޭ ގިނަ ފައިދާތަކުގެ ސަބަބުން، ކުރުނބާ ފެނަކީ ކަސްރަތުކުރުމުގެ ކުރިން ބޭނުންކުރުމަށް އެންމެ ރަނގަޅު ބުއިމެއްގެ ގޮތުގައި ދިރާސާތަކާއި ތަޖުރިބާކުރާ ފަރާތްތަކުން ވަނީ އިއްތިފާގު ވެފައެވެ. ކުރުނބާ ފެނަކީ އެންމެ ރަނގަޅު ޕްރީ-ވޯކްއައުޓް ބުއިމެއް ކަމަށް ބެލެވޭ ސަބަބުތަކުގެ ތެރޭގައި:
އެންޓިއޮކްސިޑެންޓްސް އަދި މިނަރަލްސް ގިނައިން އެކުލެވުން
ޔޫ.އެސް ޑިޕާޓްމަންޓް އޮފް އެގްރިކަލްޗަރގެ ދިރާސާތަކުން ދައްކާ ގޮތުގައި ކުރުނބާ ފެނަކީ މުހިންމު މިނަރަލްސް އަދި އެންޓިއޮކްސިޑެންޓްސް އެކުލެވޭ ރަނގަޅު ބާވަތެކެވެ. ކުރުނބާ ފެން ތަށްޓެއްގައި އެމައިނޯ އެސިޑްސް، އެންޓިމައިކްރޯބިއަލް ޕެޕްޓައިޑްސް، ކާބޯހައިޑްރޭޓްސް، އެންޒައިމްސް، އިލެކްޓްރޯލައިޓްސް، ވިޓަމިން ސީ އަދި އެންޓިއޮކްސިޑެންޓްސް ހިމެނެއެވެ. މިކަމުގެ ސަބަބުން ކުރުނބާ ފެނަކީ ކަސްރަތުކުރުމުގެ ކުރިން ބޭނުން ކުރުމަށް އެންމެ އެކަށީގެންވާ ބުއިމެކެވެ.
ކުރުނބާ ފެނަކީ ގުދުރަތީ އިލެކްޓްރޯލައިޓްސް/ ފޮޓޯ:ސިޓީޖިމް
ކަރުހިއްކުން ދުރުކޮށްދީ، އަބަދުވެސް އަރުތެރެއާއި މޭ ފިނިކޮށް ދިނުން
ކަސްރަތު ކުރާ މީހުންނަށް ހަށިގަނޑުގައި ފެން ބޭނުންވާ ވަރަށް ހުރުން ވަރަށް މުހިންމެވެ. މާނައަކީ ފެންމަދުވެ ޑީހައިޑްރޭޓް ވުންފަދަ ކަންކަމާ ދުރުވެ ރައްކާތެރިވެ ތިބެންޖެހޭ ކަމެވެ. 2021 ވަނަ އަހަރު ޖާނަލް އޮފް ހިއުމަން ކައިނެޓިކްސްގައި ޝާއިއުކުރެވުނު ދިރާސާއެއްގައި ބުނެފައިވާ ގޮތުގައި ކަސްރަތު ކުރުމުގެ ކުރިން 500-600 މިލީލީޓަރުގެ ފެން ބުއިމަކީ މުހިންމު ކަމެކެވެ. ކުރުނބާ ފެނަކީ ފެނުގެ އިތުރުން ކަސްރަތުކުރުމުގެ ކުރިން ބޭނުންކުރެވިދާނެ ބުއިމެކެވެ. 2012 ވަނަ އަހަރު ޖާނަލް އޮފް ދަ އިންޓަނޭޝަނަލް ސޮސައިޓީ އޮފް ސްޕޯޓްސް ނިއުޓްރިޝަންގައި ޝާއިއު ކުރެވުނު ދިރާސާއެއްގައި ބުނެފައިވާ ގޮތުގައި ކުރުނބާ ފެން ފަދަ ބުއިންތަކުން ކަސްރަތު ކުރުމަށް ފަހު ހަށިގަނޑަށް ބޭނުންވާ ފެން އަލުން ލިބި، ހަށިގަނޑު ރިކަވަރ ވުމަށް އެހީތެރިވެދެއެވެ.
ބަރުދަން ލުއިކުރުމަށް އެހީތެރިވުން
ކުރުނބާ ފެން ބުއިމުން ބަނޑުހައި ކުޑަވެ، އަވަހަށް ބަނޑުފުރޭކަމުގެ އިހުސާސް ކުރުވާކަން ދިރާސާތަކުން ދައްކައެވެ. މިކަމުގެ ސަބަބުން ކެއުމުގެ ދެމެދު ކުދިކުދި ކާތަކެތި ކެއުމުގެ ބޭނުން ކުޑަވެ، ބަރުދަން ލުއިކުރުމަށް އެހީތެރިވެދެއެވެ. މި ސަބަބަށްޓަކައި، ބޮޑީ ބިލްޑަރުން އަދި ހަށިގަނޑު ދެއްކުމުގެ މުބާރާތްތަކަށް ތައްޔާރުވާ މީހުން ވެސް ކުރުނބާ ފެން ބޭނުންކުރުމަށް އިސްކަންދެއެވެ. އަދި މީގެ އިތުރުން، ކުރުނބާ ފެނަކީ އެހެން މީރު ބުއިންތަކާ އަޅާބަލާއިރު ކެލަރީ އަދި މޭވާ އަދި ސްމޫތީސްފަދަ ބުއިންތަކަށްވުރެ ފެޓް މަދު ބުއިމަކަށްވާތީ، ބަރުދަން ލުއިކުރަން މަސައްކަތްކުރާ މީހުން އިހުތިޔާރު ކުރުމަށް މިއީ ރަނގަޅު ބާވަތެކެވެ.
އެތައް ގޮތަކުން ފައިދާ ހުރި، މަގުބޫލު ބުއިމެކެވެ./ ފޮޓޯ:ސިޓީޖިމްއިޓް
އިލެކްޓްރޯލައިޓްސް އަލުން ފޯރުކޮށްދިނުން
ކުރުނބާ ފެނަކީ ގުދުރަތީ އިލެކްޓްރޯލައިޓްސްގެ މަސްދަރެކެވެ. މިގޮތުން މެގްނީޒިއަމް، ޕޮޓޭސިއަމް، ކެލްސިއަމް އަދި ސޯޑިއަމް ފަދަ އިލެކްޓްރޯލައިޓްސް މީގައި އެކުލެވެއެވެ. މި ތަކެއްޗަކީ ހަށިގަނޑުގެ ފެނުގެ ބެލެންސް ހިފެހެއްޓުމަށް ކޮންމެހެން ބޭނުންވާ ތަކެއްޗެވެ. މި ގުދުރަތީ ސިފައިގެ ސަބަބުން، ކަސްރަތު ކުރުމަށް ފަހު ހަމައެކަނި ފެން ބުއުމުގެ ބަދަލުގައި ކުރުނބާ ފެން ބުއުމަކީ ކަސްރަތު ކުރާ މީހުންނަށް އެންމެ ރަނގަޅު ގޮތެވެ.
ހަކުރު ނުހިމެނޭ
ގިނަ މޭވާ ޖޫސްތަކާއި، ކާބަނޭޓެޑް ބުއިންތަކާއި، އަދި ގިނަ ސްޕޯޓްސް ޑްރިންކްސްތަކާ އަޅާބަލާއިރު ކުރުނބާ ފެނުގައި ހަކުރު އެކުލެވިފައިވާ މިންވަރު ވަރަށް ކުޑައެވެ. ކުރުނބާ ފެނުގައި އެކުލެވޭ ޕޮޓޭސިއަމްގެ ސަބަބުން، ގަދަ ކަސްރަތަކަށްފަހު ހަށިގަނޑުން ބޭރުވެފައިވާ ފެން އަލުން ހަށިގަނޑަށް ލިބުމަށް އެހީތެރިވެދެއެވެ. އެހެން ބައެއް ދިރާސާތަކުން ދައްކާ ގޮތުގައި އެހެން ކުޅިވަަރަށް ހާއްސަ ބުއިންތަކާ އަޅާބަލާއިރު ކުރުނބާ ފެން ބުއިމުން ބަނޑަށް އުނދަގޫވުމާއި، ވައިގެ އުނދަގޫތައް ވުން ފަދަ ކަންކަމުން ސަލާމަތް ވެދެއެވެ.
ކުރުނބާ ފެނަކީ ކަސްރަތުކުރުމުގެ ކުރިން ބުއުމަށް އެންމެ ރަނގަޅު ބުއިމެއްގެ ގޮތުގައި ބެލެވެނީ މި ބުއިމުގައި އެކުލެވޭ ގިނަގުނަ ފައިދާތަކުގެ ސަބަބުންނެވެ. އެންޓިއޮކްސިޑެންޓްސް އަދި މިނަރަލްސް ގިނައިން އެކުލެވުމާއި، ހަށިގަނޑުން ފެން މަދުވިޔަ ނުދީ ބެހެއްޓުމާއި، ބަރުދަން ލުއިކުރުމަށް އެހީތެރިވުމާއި، އިލެކްޓްރޯލައިޓްސް އަލުން ފޯރުކޮށްދިނުމާއި، އަދި ހަކުރު ނުހިމެނުމަކީ ކުރުނބާ ފެން ޕްރީ-ވޯކްއައުޓް ބުއިމެއްގެ ގޮތުގައި ބޭނުންކުރުމަށް މަގުބޫލުވަމުން އަންނަ މައިގަނޑު ސަބަބުތަކެވެ. ކަސްރަތުކުރާ މީހުންނަށް މި ބުއިމުގެ ފައިދާތައް ލިބިގަތުމަށްޓަކައި، ކަސްރަތުކުރުމުގެ ކުރިން ކުރުނބާ ފެން ބުއުމަށް އާދަކުރުމަކީ ފައިދާ ހުރި، ދުޅަހެޔޮސިއްހަތަކަށް ރަނގަޅު އާދައެކެވެ.