ހުޅުމާލޭގައި ފާއިތުވި ހަފްތާގައި ކުރިއަށް ގެންދިޔަ ޓެކްސީ ޑްރައިވަރުންގެ މުޒާހަރާއާ ގުޅިގެން ހައްޔަރުކޮށް ބަންދުކުރި ދެ ޓެކްސީ ޑްރައިވަރުން މިއަދު ބަންދުން ދޫކޮށްލައިފިއެވެ.
މި މަހުގެ 11 ވަނަ ދުވަހުގެ ރޭ ބައެއް ޓެކްސީ ޑްރައިވަރުން ހުޅުމާލެ ފަޅިން ބްރިޖަށް އަރާ ހަލިމަގު (ހައިވޭ) ބަންދުކޮށް، އާންމު ދަތުރުފަތުރަށް ހުރަސް އަޅައި މުޒާހަރާ ކުރިއެވެ. މި މުޒާހަރާއާ ގުޅިގެން މުހައްމަދު ޝާމިނާއި އަހްމަދު ޝަބީން ހައްޔަރުކޮށް، އެ ދެމީހުންގެ ބަންދަށް ކޯޓުން ފަސް ދުވަސް ނަގާފައިވެއެވެ.
މިއަދު ކޯޓުން ވަނީ އެ ދެމީހުން ބަންދުން ދޫކޮށްލުމަށް އަމުރުކޮށްފައެވެ. ނަމަވެސް އެ ދެމީހުން ދޫކޮށްލީ ވަކި ޝަރުތުތަކަކާ އެކުގައެވެ. އެ ޝަރުތުތަކުގެ ތަފްސީލު މި ވަގުތު ހާމަކޮށްފައެއް ނުވެއެވެ.
މީގެ އިތުރުން، މި މުޒާހަރާއާ ގުޅިގެން 22 ޓެކްސީ ޓޯ ކުރިކަމަށް ފުލުހުން ބުނެފައިވެއެވެ. އަދި މި މަހުގެ 13 ވަނަވަނަ ދުވަހު މާލެ، މއ. ނާޒީމަންޒިލް، މިސްބާހް ޝަރީފް ވެސް ވަނީ ކޯޓު އަމުރެއްގެ ދަށުން ހައްޔަރުކޮށްފައެވެ. އޭނާގެ ބަންދަށްވެސް ކޯޓުން ފަސް ދުވަސް ނަގާފައިވެއެވެ.
މި މުޒާހަރާ ކުރިއަށް ގެންދިޔައީ ޓެކްސީ ޑްރައިވަރުންގެ ކަންބޮޑުވުންތަކަކާ ގުޅިގެންނެވެ. ނަމަވެސް، މުޒާހަރާގެ ސަބަބުން އާންމު ދަތުރުފަތުރަށް ދަތިވެ، ގިނަ ބަޔަކަށް އުނދަގޫ ވެފައިވާކަން ފާހަގަކުރެވެއެވެ.