މިފްކޯއަށް މަސް ކިރުވުމަށްފަހު 72 ގަޑިއިރު ވީއިރުވެސް ފައިސާ ނުލިބޭ ކަމަށް ބުނެ މީސްމީޑިއާގައި ފެތުރުނު ވާހަކަތައް މިފްކޯއިން ވަނީ ދޮގުކޮށްފައެވެ.
މިފްކޯއިން މިހެން ބުނީ ހަސަން ކުރުސީ ނަމަކަށް ކިޔާ ފަރާތަކުން އެކްސްގައި ކުރި ޕޯސްޓަކާ ގުޅިގެންނެވެ. އޭނާ ބުނެފައިވަނީ މިފްކޯއަށް ދޯންޏަކުން މަސް ކިރުވިތާ 72 ގަޑިއިރު ވީއިރުވެސް ފައިސާ ނުލިބޭ ކަމަށެވެ. އަދި މިކަމަކީ ސަރުކާރު ލަދުގަންނަންޖެހޭ ކަމެއް ކަމަށް ބުނެ، މަސްވެރިކަމާ ބެހޭ ވަޒީރު އަޙްމަދު ޝިޔާމް ޓެގުކޮށް، ދޯންޏަކުން މަސް ކިރާފައި މިފްކޯއިން ދިން ބިލުގެ ފޮޓޯއެއް އާންމުކޮށްފައިވެއެވެ.
މި ޕޯސްޓާ ގުޅިގެން މިފްކޯއިން ވަނީ އިތުރު މައުލޫމާތު ހާމަކޮށްފައެވެ. އެ ކުންފުނިން ބުނެފައިވަނީ އެ ދޯނީގެ ބިލުގައިވާ އަދަދު ތެލުގެ ކްރެޑިޓްއިން އެޑްޖަސްޓްމަންޓް ހަދަމުންދާ ކަމަށެވެ. މިހާތަނަށް އެ ދޯނީގެ ތެލުގެ ކްރެޑިޓް ފައިސާގެ ގޮތުގައި 10،282 ރުފިޔާ ދައްކަންޖެހޭ ކަމަށްވެސް މިފްކޯއިން ހާމަކޮށްފައިވެއެވެ. މި މަޢުލޫމާތުތައް ސާބިތުކުރުމަށްޓަކައި މިފްކޯއިން ވަނީ އެ ދޯނީގެ ބިލްތައްވެސް މީޑިއާތަކާ ހިއްސާކޮށްފައެވެ.
މީގެއިތުރުން މިފްކޯއިން އިތުރަށް ބުނެފައިވަނީ ރައީސް ޑރ. މުޙައްމަދު މުޢިއްޒުގެ ވަޢުދާ އެއްގޮތަށް، މިފްކޯއަށް ކިރާ މަހަށް 48 ގަޑިއިރުތެރޭ ފައިސާ ދެމުންދާ ކަމަށެވެ. މިއީ މި ސަރުކާރުގެ މުހިންމު ވަޢުދެއްކަން ފާހަގަކޮށްލެވެއެވެ.
މި މައްސަލައާ ގުޅިގެން މަސްވެރިކަމާ ބެހޭ ވަޒީރު އަޙްމަދު ޝިޔާމް އަދި އެއްވެސް ބަހެއް ވިދާޅުވެފައެއް ނުވެއެވެ. ނަމަވެސް، މިފަދަ މައްސަލަތައް ދިމާވާނަމަ، ކަމާބެހޭ ފަރާތްތަކަށް ސީދާ ހުށަހެޅުމަށް މަސްވެރިންނަށް އިލްތިމާސްކޮށްފައިވެއެވެ.
މި ސަރުކާރުން މަސްވެރިކަމުގެ ސިނާޢަތް ކުރިއެރުވުމަށް އެޅި މުހިންމު ފިޔަވަޅެއްގެ ގޮތުގައި، އެސްޓީއޯ ރޭޓުގައި މަސްވެރިންނަށް ތެޔޮ ލިބޭނެ އިންތިޒާމުތައް ހަމަޖައްސާފައިވާކަން ފާހަކަން ފާހަގަކުރެވެއެވެ.\