މިދިޔަ ބުރާސްފަތި ދުވަހު ހިނގި އަލިފާނުގެ ހާދިސާގައި މާލޭ ސިޓީ ކައުންސިލުން ހިންގާ ވައިޓަލް ރެޖިސްޓްރޭޝަން އޮފީހުން ގެއްލުނު ލިޔުންތައް ޑިޕާޓްމަންޓް އޮފް ނެޝަނަލް ރެޖިސްޓްރޭޝަން (ޑީއެންއާރު) އާއި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ފޯރުކޮށްދޭން ނިންމައިފި އެވެ.
އަލިފާނުގެ ހާދިސާގައި ވައިޓަލް ރެޖިސްޓްރޭޝަން އޮފީހުގައި ހުރި އުފަންވުމާއި މަރުގެ ރެޖިސްޓްރޭޝަންތަކާއި ލިޔެކިޔުންތަކުގެ އިތުރުން ރަށްވެހިކަމާއި ގޯތީގެ ރެޖިސްޓްރޭޝަން ފަދަ ބައެއް ލިޔުންތައް ވަނީ އަނދައިގެން ގޮސްފައެވެ. މި ގެއްލުނު ލިޔުންތައް ހޯދުމަށްޓަކައި ޑީއެންއާރު އާއި ޑީޖޭއޭ އާއެކު މަޝްވަރާ ބައްދަލުވުމެއް ބޭއްވުނު ކަމަށް މާލޭގެ މޭޔަރު އާދަމް އާޒިމް ވިދާޅުވެފައިވެއެވެ.
މޭޔަރު އާޒިމް ވިދާޅުވި ގޮތުގައި، މި ބައްދަލުވުމުގެ ނަތީޖާ ވަރަށް ރަނގަޅު ކަމަށާއި، ގެއްލުނު ލިޔުންތައް ފޯރުކޮށްދިނުމަށް ދެ އިދާރާއިން ވެސް އެއްބާރުލުން ދޭން ނިންމާފައިވެއެވެ. އަދި މި ލިޔުންތައް ފޯރުކޮށްދިނުމަށްޓަކައި ދެ އިދާރާގެ އައިޓީ ޑިޕާޓްމަންޓާއި މާލޭ ސިޓީ ކައުންސިލްގެ އައިޓީ ޑިޕާޓްމަންޓް ގުޅިގެން މަސައްކަތް ކުރަން ނިންމާފައިވާ ކަމަށްވެސް މޭޔަރު ވިދާޅުވިއެވެ.
އަލިފާނުގެ ހާދިސާގައި ގެއްލުނު ލިޔެކިޔުންތަކުގެ ސީދާ އަދަދެއް އަދިވެސް ސާފުވެފައެއް ނުވެއެވެ. މޭޔަރު ކުރިން ވިދާޅުވެފައިވަނީ މި މަޢުލޫމާތު އެނގޭނީ އެސެސްމަންޓެއް ހެދުމަށްފަހު ކަމަށެވެ.
މިދިޔަ ބުރާސްފަތި ދުވަހު ހިނގި އަލިފާނުގެ ހާދިސާގައި ހައުސިންގ، ކޮންސްޓްރަކްޝަން އަދި އެންވަޔަރަމަންޓް މިނިސްޓްރީ ހިންގަމުން ދިޔަ އިމާރާތް ވަނީ ބޭނުން ނުކުރެވޭ ވަރަށް އަނދައިގެން ގޮސްފައެވެ.