މިދިޔަ އަހަރާއި އަޅާބަލާއިރު މިއަހަރުގެ އޮކްޓޯބަރމަހުގެ ނިޔަލަށް ރާއްޖޭގެ ރިސޯޓްތަކުގެ އެނދުތައް ފުރުނު ނިސްބަތް ނުވަތަ އޮކިއުޕަންސީ ރޭޓް އިތުރުވެފައިވާކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ތަފާސްހިސާބުތަކުން ދައްކައިފިއެވެ.
އެމްއެމްއޭގެ ނޮވެމްބަރު މަހުގެ "މަންތްލީ ރިޕޯޓް" ގައިވާ ގޮތުން، މިއަހަރުގެ ފުރަތަމަ 10 މަސްދުވަހު ރިސޯޓްތަކުގެ އޮކިއުޕަންސީ ރޭޓް ހުރީ 70.8 ޕަސެންޓްގައެވެ. މިއީ މިދިޔަ އަހަރުގެ މި މުއްދަތުގައި ރެކޯޑުކުރެވުނު 66.3 ޕަސެންޓާ އަޅާބަލާއިރު އިތުރުވުމެކެވެ.
ހަމައެހެންމެ، ސަފާރީތަކުގެ އޮކިއުޕަންސީ ރޭޓްވެސް ވަނީ އިތުރުވެފައެވެ. މިއަހަރުގެ ޖެނުއަރީ އިން ފެށ މަސްދުވަހު ސަފާރީތަކުގެ އޮކިއުޕަންސީ ރޭޓް 26.6 ޕަސެންޓަށް އަރާފައިވާއިރު، މިދިޔަ އަހަރުގެ މި މުއްދަތުގައި މި އަދަދު ހުރީ 23.4 ޕަސެންޓްގައެވެ.
އެހެންނަމަވެސް، ގެސްޓްހައުސްތަކުގެ އޮކިއުޕަންސީ ރޭޓް ވަނީ ދަށްވެފައެވެ. މިއަހަރުގެ އޮކްޓޯބަރު މަހާ ހަމައަށް ގެސްޓްހައުސްތަކުގެ އޮކިއުޕަންސީ ރޭޓް 36.1 ޕަސެންޓަށް ދަށްވެފައިވާއިރު، މިދިޔަ އަހަރުގެ މި މުއްދަތުގައި މި އަދަދު ހުރީ 40.8 ޕަސެންޓްގައެވެ.
މީގެއިތުރުން، އެމްއެމްއޭގެ ތަފާސްހިސާބުތަކުން ދައްކާގޮތުގައި މިދިޔަ އަހަރާ އަޅާބަލާއިރު މިއަހަރުގެ ނޮވެމްބަރު މަސް ފެށުމުގެ ކުރިީގެ ހިސާބުތައް ދައްކާ ގޮތުގައި ރިސޯޓްތަކުން އޮޕަރޭޝަނަށް ނެރެފައިވާ އެނދުގެ އަދަދުވެސް ވަނީ އިތުރުވެފައެވެ. މި މުއްދަތުގައި ރިސޯޓްތަކުގެ އޮޕަރޭޝަނަލް ބެޑް ކެޕޭސިޓީ ހުރީ 42,068 ގައެވެ.
ރާއްޖޭގައި މިވަގުތު 170 ރިސޯޓާއި 860 ގެސްޓްހައުސްއާއި 150 ސަފާރީ އަންނަނީ ހިންގަމުންނެވެ. ގެސްޓްހައުސްތަކުގެ ބެޑް ކެޕޭސިޓީ 14,503 އަދި ސަފާރީތަކުގެ ބެޑް ކެޕޭސިޓީ ހުރީ 2,909 ގައިކަމަށް އެމްއެމްއޭގެ ރިޕޯޓުން ދައްކައެވެ.
ޓޫރިޒަމް މިނިސްޓްރީގެ ތަފާސްހިސާބުތަކުން ދައްކާގޮތުން، މިއަހަރުގެ މިހާތަނަށް ރާއްޖެއަށް 1.9 މިލިއަން ފަތުރުވެރިން ވަނީ ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 8.8 ޕަސެންޓް އިތުރު އަދަދެކެވެ.