އެމްޑީޕީ ސަރުކާރުން ވޭތުވެދިޔަ އަހަރު ނޮވެމްބަރު މަހު ވެފައިވާ 9 އެއްބަސްވުމެއްގެ ދަށުން ދޭން ނިންމާފައިވާ 100 މިލިއަނަށްވުރެ ގިނަ ރުފިޔާގެ ބަދަލު ބާތިލު ކޮށްފިއެވެ. މި ނިންމުން ނިންމާފައިވަނީ ބަންޑާރަ ނައިބު އަހުމަދު އުޝާމެވެ.
އެޓަރނީ ޖެނެރަލްގެ އޮފީހުން ބުނީ، މި އެއްބަސްވުންތަކަކީ ސަރުކާރާއި އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ހައްލުކުރުމުގައި އަމަލުކުރާނެ ގޮތުގެ އުސޫލުގެ ދަށުން ސޮއިކޮށްފައިވާ ބަދަލު ދިނުމުގެ މައްސަލަތަކެއް ކަމަށެވެ. ނަމަވެސް، މި އުސޫލަކީ ރާއްޖޭގެ ގާނޫނުއަސާސީއާއި ގާނޫނާ ހިލާފަށް އެކުލަވާލާފައިވާ އުސޫލެއްކަން ފާހަގަކުރެވިފައިވާ ކަމަށް އެ އޮފީހުން ބުންޏެވެ.
އެޓަރނީ ޖެނެރަލްގެ އޮފީހުން އިތުރަށް ބުނީ، މި އެއްބަސްވުންތަކަކީ އެޓަރނީ ޖެނެރަލްގެ ލަފައެއް ނެތި، ވަކި ފަރާތްތަކަކަށް ނުހައްގު މުއްސަނދިކަމެއް ލިބޭ ގޮތަށް ނިންމާފައިވާ ނިންމުންތަކެއްކަން ފާހަގަ ކުރެވިފައިވާ ކަމަށެވެ. އެހެންކަމުން، މި އެއްބަސްވުންތަކަކީ ގާނޫނީ ގޮތުން ބަނދެވޭ އެއްބަސްވުންތަކެއް ނޫންކަމާއި، އެއީ ބާތިލު އެއްބަސްވުންތަކެއް ކަމަށް ބަންޑާރަ ނައިބު ނިންމަވާފައިވާ ކަމަށް އެ އޮފީހުން ހާމަކުރިއެވެ.
ކުރީގެ ސަރުކާރުން ބަދަލުގެ ގޮތުގައި ދީފައިވަނީ ފައިސާގެ އިތުރުން އެކި ރަށްތަކާއި ފަޅުތަކެވެ. މީގެ ތެރޭގައި ނ. އެކުޅިވަރު، ތ. އަތޮޅުގެ ތިން ރަށް، އއ. މަޑޫގަލި، ރ. ވިލިނގިލި، ހދ. ހޮނޑާފުށި، ހދ. މުރައިދޫ، އަދި ނ. އޮރިމަސް ހިމެނެއެވެ. މީގެ އިތުރުން އއ. މާފަރު ފަޅު ވެސް ބަދަލުގެ ގޮތުގައި ދީފައިވެއެވެ. ފައިސާގެ ގޮތުގައި ދީފައިވާ ބަދަލުގެ ޖުމްލަ އަދަދަކީ 95.1 މިލިއަން ރުފިޔާއެވެ.
މި ނިންމުމާ ގުޅިގެން، ކުރީގެ ސަރުކާރުން ދޭން ނިންމާފައިވާ ބަދަލުތަކަށް އަމަލުކުރަން ނުޖެހޭނެ ކަމަށް ބަންޑާރަ ނައިބު ވަނީ ކަމާބެހޭ ދައުލަތުގެ އިދާރާތަކަށް އަންގަވާފައެވެ.