ދިވެހި ރައްޔިތެއްކަން އަންގައިދޭ ކާޑު ހެދުމަށް އަތޮޅު ކައުންސިލަށް ހުށަހަޅާތާ ލަސްވެގެން 2 ދުވަސް ތެރޭ ކާޑު ޕްރިންޓް ކޮށް އަތޮޅުގެ ހުރިހާ ރަށްތަކެއްގެ ރައްޔިތުންނާ ހަމަޔަށް ފޯރުކޮށްދެވޭނެ ކަމަށް ގއ އަތޮޅު ކައުންސިލް ރައީސް އިބްރާހީމް ޝަހީން ވިދާޅުވެއްޖެއެވެ.
ލަސްވެގެން 2 ދުވަސް ތެރޭ ކާޑު ޕްރިންޓް ކުރެވޭއިރު މި ކާޑު އާރްޓީއެލް ފެރީގެ ނިޒާމުގެ ތެރެއިން ރަށު ކައުންސިލްތައް މެދުވެރިކޮށް ކާޑުގެ ވެރިފަރާތަށް ރައްދުކުރެވޭނެކަމަށް ވެސް އެ އަތޮޅު ކައުންސިލުން ހާމަކޮށްފައިވެއެވެ. އަދި މި އިންތިޒާމު ހަމަޖައްސާފައިވަނީ އެމްޓީސީސީންނެވެ.
ގއ އަތޮޅު ކައުންސިލްގެ ރައީސް ޝަހީން ވިދާޅުވެފައިވާ ގޮތުގައި ދިވެހި ރައްޔިތެއްކަން އަންގައިދޭ ކާޑު ޕްރިންޓު ކޮށް އަތޮޅުގެ ރައްޔިތުންނަށް ވީހާވެސް އަވަހަކަށް އައިޑީ ކާޑު ފޯރުކޮށް ދިނުމުގެ މަޤްސަދުގައި ފެށި މި މަސައްކަތަކީ އަތޮޅު ކައުންސިލްގެ ބަޖެޓުން ބޮޑު ހޭދައެއް ކޮށްގެން އަތޮޅުގެ ރައްޔިތުންނަށްޓަކައި ފެނިގެންދިޔަ މުހިއްމު ޚިދުމަތެކެވެ.
އަދި މިހާރު ޕާސްޕޯޓް ހެދުމުގެ ޚިދުމަތް ގާއިމް ކުރުމަށްޓަކައި މަސައްކަތް ކުރެވެމުން ދާ އިރު، ރައިސުލް ޖުމްހޫރިއްޔާގެ ވައުދާއި އެއްގޮތަށް ރައްޔިތުންނާއި ގާތުން ޚިދުމަތް ފޯރު ކޮށް ދިނުމަށް ކުރަންޖެހޭ ކަންކަން ކުރުމުގައި ފަސްނުޖެހޭނެކަމަށް ވެސް ޝަހީން ވިދާޅުވެފައިވެއެވެ.