ފެނަކަ އަށް 14 މިލިއަން ރުފިޔާގެ މަސްދޯންޏެއް ބަންނަ ކަމަށް ބުނާ ޚަބަރު ދޮގުކޮށްފި
ފެނަކަ ކޯޕަރޭޝަނުގެ މެނޭޖިންގ ޑިރެކްޓަރ މުއާޒް މުޙައްމަދު ރަޝީދު، 14 މިލިއަން ރުފިޔާއަށް މަސްދޯންޏެއް ބަންނަ ކަމަށް ބުނާ ޚަބަރު ދޮގުކުރައްވައިފިއެވެ. މި ޚަބަރު ދޮގުކުރެއްވީ އޭނާގެ ސޯޝަލް މީޑިއާ އެކައުންޓުގައި ކުރެއްވި ޕޯސްޓެއްގައެވެ.
އޮންލައިން ނޫހެއްގައި ޝާއިޢުކޮށްފައިވާ ޚަބަރެއްގައި ބުނެފައިވަނީ ފެނަކައަށް މުދާ ވިއްކާ ކުންފުނިތަކުން ކަޓުގެ ގޮތުގައި މިލިއަނުން ފައިސާ ނެގުމަށްފަހު، 115 ފޫޓުގެ ފައިބަރު މަސް ދޯންޏެއް ބަންނަން މުއާޒް ފައްޓަވާފައިވާ ކަމަށެވެ. އެ ޚަބަރުގައި އިތުރަށް ބުނެފައިވަނީ މި މަހުގެ 14 ވަނަ ދުވަހު ދޯނި ބަންނަން ފަށާފައިވާ ކަމަށާއި، އެ މަސައްކަތް ޙަވާލުކޮށްފައިވަނީ މުއާޒްގެ އުފަން ރަށް ގދ. މަޑަވެލީ މީހަކާ ކަމަށެވެ. އަދި އެ ދޯނި ބަނުމުގެ މަސައްކަތް ކުރަމުން އަންނަނީ ހޯނޑެއްދޫގައި ކަމަށާއި، ދޯނި ބަނުމަށްޓަކައި މުއާޒް ވަނީ 14 މިލިއަން ރުފިޔާ އެއްފަހަރާ ދައްކާފައި ކަމަށްވެސް އެ ޚަބަރުގައި ބުނެފައިވެއެވެ.
މި ޚަބަރާ ގުޅޭ ގޮތުން މުއާޒް ވިދާޅުވެފައިވަނީ، “މިއީ ތެދު ޚަބަރަކަށް ވެއްޖެޔާ މި ދޯނި މި ޚަބަރު ލިޔުނު މީހަކަށް ދީފިން. ލިޔުމެއް ލިޔެގެން ހިލޭ 14 މިލިއަނުގެ ދޯންޏެއް ތި ލިބުނީ.” މިހެންނެވެ. އަދި އޭނާ ވަނީ އެ ޚަބަރު ލިޔުނު މީހާއަށް މަރުޚަބާވެސް ވިދާޅުވެފައެވެ.
މި ޚަބަރުން އެނގޭ ގޮތުގައި، ފެނަކައިގެ އެމްޑީ މުއާޒް މުޙައްމަދު ރަޝީދު އަމިއްލަ ފުށުން 14 މިލިއަން ރުފިޔާގެ މަސްދޯންޏެއް ބަންނަ ކަމަށް ބުނާ ޚަބަރަކީ ތެދު ޚަބަރެއް ނޫން ކަމަށެވެ. އަދި މި މައްސަލައާ ގުޅިގެން އިތުރު ތަޙްޤީޤެއް ކުރެވޭނެ ކަމަށް މި ވަގުތު އެއްވެސް ފަރާތަކުން ބުނެފައެއް ނުވެއެވެ.