ލާމަރުކަޒީ ނިޒާމު ހަރުދަނާކުރެވޭނީ ދައުލަތުގެ 3 ބާރާއެކު މީޑިއާއާއި، ދިވެހި ރައްޔިތުން ލާމަރުކަޒީ ނިޒާމަށް ސަހަރޯވެރިވެ، ފާރަވެރިވެ، ލާމަރުކަޒީ ނިޒާމުގެ މަފުހޫމް ހޭހަންކޮށް، ދިރުވައި، އާލާކޮށްގެން ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތާއި ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ. އެ މަނިކުފާނު މިހެން ވިދާޅުވީ ކަންގަތި އެވޯޑް ދިނުމަށް ރޭ އެލްޖީއޭގެ ފަރާތުން “މީރުމާ”ގައި ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
ކައުންސިލްތައް ރޭންކްކޮށް، ކުރިއެރުންތައް ހޯދި ފަރާތްތަކަށް ކަންގަތި އެވޯޑް ދިނުމަށް ބޭއްވި ރަސްމިއްޔާތުގައި ވަޒީރު އާދަމް ޝަރީފު ޢުމަރު ދެއްކެވި ވާހަކަފުޅުގައި، ލާމަރުކަޒީ ނިޒާމުގެ ތަރަހައަކީ އަދި އެ ނިޒާމުގެ އަސާސަކީ ރައްޔިތުންގެ ވެރިކަން، ރައްޔިތުންނާ ގާތުން، ރައްޔިތުންނާ ގުޅިގެން، ރައްޔިތުންގެ ބައިވެރިވުމާއެކު، ރައްޔިތުން ބޭނުންވާ ޚިދުމަތްތަކެއް ތަރުތީބު ކުރެވިފައިވާ ނިޒާމެއްގެ ތެރެއިން ރައްޔިތުންނަށް ފޯރުކޮށްދިނުން ކަމަށް ވިދާޅުވިއެވެ. ތަފްޞީލުދެއްވަމުން އެ މަނިކުފާނު ވިދާޅުވީ ލާމަރުކަޒީ ނިޒާމު ހަރުދަނާ ކުރުމަށް ޓަކައި 3 ކަމަކަށް ސަމާލުކަން ދޭންޖެހޭ ކަމަށެވެ.
“ފުރަތަމަ ކަމަކީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 8 ވަނަ ބާބުގައި ބަޔާންކުރާ ލާމަރުކަޒީ އުޞޫލުން އިދާރީ ދާއިރާތައް ހިންގުމުގެ މަފުހޫމަށް މުޅި ދައުލަތުން އިޙުތިރާމު ކުރުމާއެކު އެ މަފުހޫމު ދިރުވުމަށް މަސައްކަތް ކުރުން. ދެ ވަނަ ކަމަކީ ކައުންސިލްތަކަކީ ސަރުކާރުގެ ބައެއްކަން، ސަރުކާރުގެ ފަށަލައެއްކަން ޤަބޫލު ކުރުމާއެކު، ޤާނޫނުއަސާސީގެ 232 ވަނަ މާއްދާގެ (ހ)ގައި ބަޔާންކުރާ ގޮތުގެ މަތިން، ދިމިޤްރާތީ އަދި ޖަވާބުދާރީވަނިވި އުޞޫލުތަކުގެ މަތިން ކަންކަން ހިންގުން. ތިން ވަނަ ކަމަކީ ކައުންސިލްތަކުގެ މުހިންމު ނިންމުންތައް ނިންމުމުގައި ރައްޔިތުންގެ ބައިވެރިވުމާއި، ހިއްސާ އިތުރުކުރުމާއި، ކައުންސިލްތަކަށް ރައްޔިތުންގެ އިތުބާރު ބޮޑުކުރުން: ވަޒީރު އާދަމް ޝަރީފު ޢުމަރު ވިދާޅުވިއެވެ.
ޚާރިޖީ ވަޒީރު ޑޮކްޓަރ ޢަބްދުﷲ ޚަލީލު ޝަރަފުވެރިކޮށްދެއްވި ކަންގަތި އެވޯޑުދިނުމުގެ ރަސްމިއްޔާތުގައި ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތާއި ބެހޭ ވަޒީރު އާދަމް ޝަރީފު ޢުމަރު ދެއްކެވި ވާހަކަފުޅުގައި ރާއްޖޭގެ ޤާނޫނުއަސާސީއާއި، ލާމަރުކަޒީ ޤާނޫނުން ސާފުކޮށް އެނގޭ ގޮތުގައި ރައްޔިތުންނާ ގުޅުން ހުރި ކަންކަމުގައި ފުރަތަމަ ޓަކިޖަހަން ޖެހޭ ދޮރަކީ ކައުންސިލް އިދާރާ ކަމަށް ވެސް ވިދާޅުވިއެވެ.