ލާމަރުކަޒީ ނިޒާމަކީ ރައްޔިތުންނާ ގާތުން، ރައްޔިތުން އެދޭ ގޮތަށް ވެރިކަންކުރުމުގެ ނިޒާމު ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތާއި ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ. އެ މަނިކުފާނު މިހެން ވިދާޅުވީ ކަންގަތި އެވޯޑް ދިނުމަށް ރޭ އެލްޖީއޭގެ ފަރާތުން “މީރުމާ”ގައި ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
ކައުންސިލްތައް ރޭންކްކޮށް، ކުރިއެރުންތައް ހޯދި ފަރާތްތަކަށް ކަންގަތި އެވޯޑް ދިނުމަށް ބޭއްވި ރަސްމިއްޔާތުގައި ވަޒީރު އާދަމް ޝަރީފު ޢުމަރު ދެއްކެވި ވާހަކަފުޅުގައި ލާމަރުކަޒީ ނިޒާމަކީ ރައްޔިތުންނާ ގާތުން ޚިދުމަތް ދިނުމުގެ ނިޒާމު ކަމަށާއި، ވެރިކަންކުރާ ރަށުން ލިބޭ ނަފާގެ އެހީއާއެކު މުނިސިޕަލް ޚިދުމަތް ދިނުމަށް މަގުފަހިވާ ނިޒާމު ކަމަށް ވިދާޅުވިއެވެ. އަދި ލާމަރުކަޒީ ނިޒާމަކީ، ލާމަރުކަޒީ އުޞޫލުން، ރައްޔިތުންނާ ގާތުން ވެރިކަންކުރުމުގެ ޤާނޫނީ ބާރު ލިބިދޭ ނިޒާމު ކަމަށް ވެސް ވަޒީރު ވިދާޅުވިއެވެ.
“އާދެ! 2008 ވަނަ އަހަރު ތަންފީޒު ކުރަން ފެށުނު ފެހި ޤާނޫނުއަސާސީގެ ހިޔަލުގައި މިއަދު ރާއްޖޭގައި މި ވަނީ ރައްޔިތުން ބައިވެރިވާ، ރައްޔިތުންގެ ބާރު ހިނގާ، ޖުމްހޫރީ އަދި މަލްޓިޕާޓީ ޑިމޮކްރަސީގެ ސިފަތަކާއި، ހަމަތައް ޤަރާރުވެފައިވާ، ޔުނިޓަރީ ދައުލަތެއް ރާއްޖޭގައި ޤާއިމުވެފައި. ރާއްޖޭގެ އިދާރީ ދާއިރާތައް ހިންގަމުންދަނީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 8 ވަނަ ބާބުން ކަށަވަރުކުރާ ލާމަރުކަޒީ ނިޒާމުގެތެރެއިން” ވަޒީރު އާދަމް ޝަރީފު ޢުމަރު ވިދާޅުވިއެވެ.
ޚާރިޖީ ވަޒީރު ޑޮކްޓަރ ޢަބްދުﷲ ޚަލީލު ޝަރަފުވެރިކޮށްދެއްވި ކަންގަތި އެވޯޑްދިނުމުގެ ރަސްމިއްޔާތުގައި ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތާއި ބެހޭ ވަޒީރު އާދަމް ޝަރީފު ޢުމަރު ދެއްކެވި ވާހަކަފުޅުގައި ކަންގަތި އެވޯޑްތައް ޙާޞިލު ކުރެއްވި ހުރިހައި ކައުންސިލްތަކަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ނަންފުޅުގައި ތަހުނިޔާއާއި މުބާރިކުބާދު އަރިސްކުރެއްވިއެވެ. އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ އެދިވަޑައިގަތުމަށް ދިވެހިރާއްޖޭގެ ޤައުމީ ޔުނިވަރސިޓީން ހެދި ދިރާސާއިން، ރާއްޖޭގެ ލާމަރުކަޒީ ނިޒާމު ދިވެހިން ބަލައިގަނެފައިވާކަން ކަށަވަރުވެފައި ވިޔަސް، އެ ނިޒާމު އިތުރަށް ހަރުދަނާ ކުރަންޖެހޭ ކަމަށް ވެސް ވިދާޅުވިއެވެ.