ސްޕޯޓްސް ފިޝިންއަށް ޙާއްޞަ ބަނދަރުތައް ތަރައްގީ ކުރާނީ އެންމެ ޒަމާނީ ވަސީލަތްތަކާއެކު ކަމަށް މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަޙުމަދު ޝިޔާމް ވިދާޅުވެއްޖެއެވެ. ވަޒީރު މިހެން ވިދާޅުވީ، ބައިނަލްއަގުވާމީ ސްޕޯޓްސް ފިޝިން މުބާރާތް “ބުރުނު ބޮމަ” އިފްތިތާހު ކޮށްދެއްވަމުންނެވެ.
“ބުރުނު ބޮމަ” އަކީ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ މުވައްޒަފުންގެ ކްލަބު، ވިޒިޓް މޯލްޑިވްސް ކްލަބުން އިންތިޒާމު ކޮށްގެން އޭޕްރީލް އަދި މެއި މަހު ބޭއްވުމަށް ހަމަޖެހިފައިވާ ބައިނަލްއަގުވާމީ ސްޕޯޓްސް ފިޝިން މުބާރާތެކެވެ.
މުބާރާތް އިފްތިތާހު ކުރައްވަމުން ވަޒީރު ޝިޔާމް ވިދާޅުވީ، ސްޕޯޓްސް ފިޝިންއަށް އޮންނަ ޝައުގުވެރިކަން އިތުރުވަމުންދާއިރު، މި ދާއިރާ އިތުރަށް ފުޅާކުރުމަކީ ސަރުކާރުގެ އަމާޒެއް ކަމަށެވެ. އަދި މި ދާއިރާއަށް ބޭނުންވާ އުމްރާނީ ވަސީލަތްތައް ގާއިމުކުރެވިފައި ނުވާކަން ފާހަގަކުރައްވައި، ސަރުކާރުން މި ދާއިރާ ފުޅާކޮށް ރާއްޖޭގެ 5 ސަރަޙައްދެއްގައި ސްޕޯޓްސް ފިޝިންއަށް ހާއްސަ ބަނދަރުތަކެއް ތަރައްގީ ކުރުމަށް ނިންމާފައިވާ ކަމަށް ވިދާޅުވިއެވެ.
“ރައީސުލްޖުމްހޫރިއްޔާގެ ވިސްނުންފުޅަކީ ދިވެހިރާއްޖޭގައި މި ގްރޯވަމުން އަންނަ ސްޕޯޓްސް ފިޝިން ކޮމިއުނިޓީއަށް ޙައްލުތަކެއް ދިނުތަކެއް ދިނުމުގެ އިތުރުން، މި ބަނދަރުތަކަކީ ރާއްޖެއިން ބޭރުން ސްޕޯޓްސް ފިޝިންއަށް ޝައުގުވެރިވެގެން އަންނަ ފަރާތްތަކަށް ބޭނުންވާ ވަސީލަތްތައް ގާއިމު ވެފައި ހުރި ބަނދަރުތަކަކަށް ހެދުން،” ވަޒީރު ޝިޔާމް ވިދާޅުވިއެވެ.
ވަޒީރުގެ ވާހަކަފުޅުގައި، މި ބަނދަރުތައް ތަރައްގީ ކުރާނީ މަހުގެ ވިޔަފާރި ކުރާނެ ގޮޅިތަކާއި، މުބާރާތްތައް ރާވައި ހިންގާނެ އިދާރީ އޮފީހާއި، ރެސްޓޯރަންޓް އަދި ކެފޭތަކާއި، މަސްވެރިކަމާ ގުޅޭ ތަކެތި ވިއްކައި ހިދުމަތްދޭ ތަންތަނާއި، ބާބަކިއު ހެދޭނެ އިންތިޒާމުތަކާއެކު ކަމަށް ވިދާޅުވިއެވެ.
“ބުރުނު ބޮމަ” މުބާރާތަކީ ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކާއި ބައިނަލްއަގުވާމީ ސްޕޯޓްސް ފިޝިން އަށް ޝައުގުވެރިވާ ފަރާތްތަކަށް ހާއްސަ މުބާރާތެކެވެ. މި ސްޕޯޓްސް ފިޝިން މުބާރާތުގައި މަސް ބޭނުމަށް ހަމަޖެހިފަވަނީ ބައިނަލްއަގުވާމީ މިންގަނޑުތަކަށް ފެތޭގޮތަށެވެ. އަދި މިމުބާރާތުގައި “ކެޗް އެންޑް ރިލީޒް” ފަދަ ދެމެހެއްޓެނިވި މަސްވެރިކަމަށް ބާރުއެޅުމުގެ އުކުޅުތަށް ހިމެނުމަށް ވެސް ވަނީ ހަމަޖެހިފައެވެ.