ހއ. އިހަވަންދޫގައި ޑޮކްޔާޑެއް ތަރައްޤީކުރުމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އާއި އެ ރަށު ކައުންސިލާ ދެމެދު އެއްބަސްވުމެއްގައި މިއަދު ސޮއިކޮށްފިއެވެ. މި އެއްބަސްވުމުގައި އެމްޕީއެލްގެ ފަރާތުން ސޮއިކުރެއްވީ އެ ކުންފުނީގެ ސީއީއޯ މުޙައްމަދު ވަޖީހު އިބްރާހީމެވެ. އަދި އިހަވަންދޫ ކައުންސިލްގެ ފަރާތުން ސޮއިކުރެއްވީ އެ ކައުންސިލްގެ ރައީސް އަހުމަދު ސަބާހެވެ.
މި ޑޮކްޔާޑް ތަރައްޤީކުރުމަށް އިހަވަންދޫއިން 1 ލައްކަ އަކަފޫޓުގެ ބިމެއް ވަނީ ހަމަޖެހިފައެވެ. އެމްޕީއެލްގެ ސީއީއޯ ވަޖީހް ވިދާޅުވިގޮތުގައި، އަންނަ އަހަރުގެ ކުރީކޮޅު ޑޮކްޔާޑްގެ މަސައްކަތް ފެށުމަށް ވަނީ އަމާޒު ހިފާފައެވެ. އަދި 6 މަސްދުވަހުގެ ތެރޭގައި މަސައްކަތް ނިންމައި ޚިދުމަތްދޭން ފެށުމަށް ވަނީ ރޭވިފައެވެ.
ވަޖީހް އިތުރަށް ވިދާޅުވިގޮތުގައި، މި ސަރުކާރުން ރާއްޖޭގައި ބަންކަރިންގެ ޚިދުމަތް ފެށުމާއެކު، މި ސަރަހައްދުން ދަތުރުކުރާ ބޭރުގެ އުޅަނދުތަކުން ޓެކްނިކަލް އެކިއެކި ކަންކަމަށް އެދެމުންދެއެވެ. އެހެންކަމުން މި ޑޮކްޔާޑުން އެ އުޅަނދުތަކަށް ރިޕެއަރ އެންޑް މެއިންޓަނަންސް ފަދަ ޓެކްނިކަލް ސަޕޯޓް ލިބިގެންދާނެއެވެ.
މީގެ އިތުރުން، އެ ސަރަހައްދަކީ މަސްވެރި އުޅަނދުތައް ގިނަ ސަރަހައްދަކަށްވުމާއެކު، ގިނަ އަދަދެއްގެ މަސްވެރިން ޑޮކިންގެ ޚިދުމަތަށް އެދެމުންދާކަން ވަޖީހް ފާހަގަކުރެއްވިއެވެ. އެހެންކަމުން މި ޑޮކްޔާޑް ތަރައްޤީވުމުން މަސްވެރިންނަށްވެސް ބޮޑެތި ފަސޭހަތަކެއް ލިބިގެންދާނެކަމަށް އޭނާ ވިދާޅުވިއެވެ.