މޯލްޑިވިއަންއަށް އަލަށް ގެންނަ ވައިޑް ބޮޑީ އެއަރ ކްރާފްޓްގެ އޮޕަރޭޝަންތައް ފުރަތަމަ ފަށާނީ ޗައިނާއަށް ކަމަށް އެކުންފުނިން ވިދާޅުވެއްޖެއެވެ. އަދި އެއީ ޗައިނާގެ ޝެންހާއި، ޗެންޑޫ އަދި ބެއިޖިންއަށް ކަންވެސް މޯލްޑިވިއަނުން ހާމަކޮށްފައިވެއެވެ.
ސަރުކާރުން މޯލްޑިވިއަންގެ އުދުހުންތައް ފުޅާކުރުމަށްޓަކައި އެކުންފުނީގެ ފްލީޓް ބޮޑު ކުރުމަށް ސަރުކާރުން ވަނީ މަސައްކަތް ފައްޓަވާފައެވެ.
މޯލްޑިވިއަންގެ އޮޕަރޭޝަންތަކަށް ގެންނަ ވައިޑް ބޮޑީ އެއަރކްރާފްޓު ބޭނުންކުރުމަކީ ސަރުކާރުގެ މުހިންމު ވަޢުދެކެވެ. މިއާއެކު މޯލްޑިވިއަނުން ގެންނަ ފުރަތަމަ ވައިޑް ބޮޑީ އެއަރކްރާފްޓް އަންނަ މަހުގެ 7 ވަނަ ދުވަހު ރާއްޖެ ގެނެވޭނެކަމަށް އެކުންފުނިން ވަނީ ވިދާޅުވެފައެވެ. އަދި އެ އެއަރކްރާފްޓް ރާއްޖެ ގެނައުމުގެ މަސައްކަތް މޯލްޑިވިއަނުން ވަނީ ފައްޓާފައެވެ. މިވަގުތު އެ އެއަރކްރާފްޓް އޮތީ ސިންގަޕޫރުގައެވެ. އަދި މިހާރު ކުރިއަށްދަނީ އެ ބޯޓުގެ އައު ލިވެރީގެ މަސައްކަތްތައްކަމަށް މޯލްޑިވިއަނުން ވިދާޅުވިއެވެ.
މީޑިއާ އަކަށް ދެއްވި އިންޓަރވިއުއެއްގައި މޯލްޑިވިއަންގެ ޑެޕިއުޓީ މެނޭޖިންގ ޑިރެކްޓަރ ޢަލީ ސަލީމް ވިދާޅުވީ ވައިޑުބޮޑީގެ އޮޕަރޭޝަންތަކަށް އެކުންފުނި ތައްޔާރުވަމުން އަންނަކަމަށެވެ. މިއީ އެކުންފުނީގެ ކުރިއެރުމަށް ކުރެވޭ މުހިންމު މަސައްކަތެއްގެގޮތުގައި ސިފަކުރައްވާ ޢަލީ ސަލީމް ވިދާޅުވީ ވައިޑު ބޮޑީގެ އޮޕަރޭޝަންތަކާއެކު އެކުންފުންޏަށް ބޮޑެތި ކުރިއެެރުންތަކެއް އަންނާނެކަމަށެވެ. އެގޮތުން ދަތުރުތަަށް ފެށުމާއެކު އަހަރެއްގެ މައްޗަށް 60 ހާސް ފަސިންޖަރުން ރާއްޖެ ގެނެވޭނެކަމަށް ލަފާކުރެއްވޭކަމަށް ސަލީމް ވިދާޅުވިއެވެ. މިއީ މޯލްޑިވިއަންއަށް މާލީ ގޮތުންވެސް ލިބޭނެ ބޮޑު ކުރިއެރުމެއްގެގޮތުގައި އޭނާ ފާހަގަކުރެއްވިއެވެ. ސަލީމް ވިދާޅުވީ ވައިޑް ބޮޑީގެ އޮޕަރޭޝަންތައް އެންމެ ފުރަތަމަ ފެށުމަށް ހަމަޖެހިފައިވަނީ ޗައިނާއަށްކަމަށެވެ. ޗައިނާއަކީ ރާއްޖޭގެ ފަތުރުވެރިކަމުގެ ސިނާއަތުގައި އެންމެ މުހިންމު އެއް މާކެޓެވެ.
“ޗައިނާއަށް މިފަށާ ދަތުރުތަކާއިއެކު އަހަރެއްގެ ތެރޭގައި 60،000 އުފުލޭނެ މިހާރުވެސް ރޭވިފައި އޮތް ގޮތުން. މިކަމުން މާލީ ގޮތުންވެސް ކުރިއެރުންތަކެއް ލިބިގެންދާނެ. އަދި ބައިނަލްއަޤްވާމީ ދުނިޔެއަށް ކުންފުނީގެ ޚިދުމަތް ފުޅާވުމުން އެއީވެސް ކުންފުންޏަށް ލިބިގެންދާ ކުރިއެރުމެއް.” މޯލްޑިވިއަންގެ ޑެޕިއުޓީ މެނޭޖިންގ ޑިރެކްޓަރ ޢަލީ ސަލީމް ވިދާޅުވިއެވެ.
މި އޮޕަރޭޝަންތަކާ ގުޅޭގޮތުން މޯލްޑިވިއަންގެ ޗީފް ސްޓްރެޓިޖިސް މުހައްމަދު ސައްފާހް ވިދާޅުވީ އެންމެ ފުރަތަމަ އޮޕަރޭޝަންތައް ފަށަނީ ޗައިނާގެ ޝެންހާއި، ޗެންޑޫ އަދި ބެއިޖިންއަށް ކަމަށެވެ. އަދި އޭގެ ފަހުން ޔޫރަޕަށްވެސް އޮޕަރޭޝަންތައް ފެށުމަށް ނިންމާފައިވާކަމަށް ސައްފާޙް ވިދާޅުވިއެވެ.
މޯލްޑިވިއަނުން ވައިޑް ބޮޑީގެ ދަތުރުތައް ޗައިނާގެ ތިން ސިޓީއަށް ހަފްތާއަކު ތިން ދަތުރުކުރުމަށް ކަނޑައަޅާފައިވާކަމަށް މޯލްޑިވިއަނުން ވިދާޅުވިއެވެ. މިއީ 264 މީހުންގެ ޖާގައިގެ މަތިންދާބޯޓެކެވެ. އޭގައި ތިން ކެޓަގަރީގެ ފަސިންޖަރުންނަށް ޚިދުމަތްދޭނެކަމަށާއި، އެގޮތުން އިކޮނޮމީ ކްލާސް، ބިޒްނަސް ކްލާސްގެ އިތުރުން ޕްރިމިއަމް ކްލާސް ހިމެނޭނެކަމަށް މޯލްޑިވިއަނުން ވަނީ ވިދާޅުވެފައެވެ.