ގައުމީ ދިރާސާ ފަންޑަށް މިހާތަނަށް 10 މިލިޔަން ރުފިޔާ ހަމަޖެހިފައިވާކަމަށް މަތީ ތައުލީމާއި މަސައްކަތްތެރިކަމާއި ހުނަރު ތަރައްގީ ކުރުމާބެހޭ ވުޒާރާގެ ސްޓޭޓް މިނިސްޓަރ އަހުމަދު ޝަފީއު ވިދާޅުވެއްޖެއެވެ.
ދައުލަތުގެ މީޑިއާގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން ސްޓޭޓް މިނިސްޓަރ އަހުމަދު ޝަފީއު ވިދާޅުވީ، ރާއްޖޭގައި ދިރާސާކުރުމުގެ ސަގާފަތެއް ގާއިމު ކުރުމުގެ ބޭނުމުގައި އުފައްދާފައިވާ ގައުމީ ދިރާސާ ފަންޑު މިހާރު ގާއިމު ކޮށްފައިވާ ކަމަށެވެ. އަދި އެ ފަންޑުގެ އިންތިޒާމްތައް ހަމަޖެއްސުމަށްޓަކައި ފަންޑުގެ ބެލެނިވެރި ފަރާތެއްގެ ގޮތުގައި ގައުމީ ދިރާސާ ކައުންސިލްގެ ނަމުގައި ކައުންސިލެއްވެސް މިހާރު އުފައްދަވާފައިވާކަމަށް އޭނާ ވިދާޅުވިއެވެ.
ސްޓޭޓް މިނިސްޓަރ އަޙްމަދު ޝަފީއު ވިދާޅުވީ، މިވަގުތު މަސައްކަތް ކުރަމުން ދަނީ ދިރާސާ ކުރުމަށް ކަނޑައަޅާނެ ދާއިރާތަކާއި އެކަމުގެ އުސޫލުތައް އެކުލަވާލުމުގެ މަސައްކަތްކަމަށެވެ. އަދި ވުޒާރާއިން ބޭނުންވަނީ އެކަން ކުރިއަށްދާއިރު ވީހާވެސް ހާމަކަން ބޮޑު ގޮތެއްގައި އަދި ރާއްޖެއަށް އެންމެ އިސްކަން ދޭން ޖެހިފައި މިވަގުތު ހުރި ދާއިރާތަކަށް ހުޅުވާލައިގެން އެކަންކަން ކުރިއަށް ގެންދިއުމަށް ކަމަށް ވެސް އޭނާ ވިދާޅުވިއެވެ.
“މިއަހަރު ފަންޑަށް ފުރަތަމަވެސް ފަށައިގަތުމަށްޓަކައި 10 މިލިޔަން ރުފިޔާގެ އެލޮކޭޝަންއެއް އެބައޮތް. ދެން އަޅުގަނޑުމެންނަށް ދެން އަންނަ އަހަރުގެ ބަޖެޓްވެސް އިރާދަކުރެއްވިއްޔާ އަޅުގަނޑުމެންނަށް އިޝާރާތް ކުރައްވާފައި އޮތީ އަންނަ އަހަރުވެސް ދިރާސާ ފަންޑަށް ފައިސާ ވަދެގެންދާނެކަމަށް. އެހެންވީމަ ރިސާޗް ހެދުމަށްޓަކައި ހަމަ ގްރާންޑްތަކެއް ދޫކުރެވިގެން ދާނީ،” ސްޓޭޓް މިނިސްޓަރ ވިދާޅުވިއެވެ.
ގައުމީ ދިރާސާ ކައުންސިލަށް މެމްބަރުން އައްޔަންކޮށްފައިވާއިރު މި މެންބަރުންނަކީ “ގައުމީ ދިރާސާ ފަންޑު” ހިންގައި ބެލެހެއްޓުމަށް ޢައްޔަންކޮށްފައިވާ މެމްބަރުންނެވެ. އެބޭފުޅުންގެ މައިގަނޑު މަސްޢޫލިއްޔަތުތަކުގެ ތެރޭގައި، ފަންޑުން ޚަރަދުކޮށްގެން ދިރާސާކުރާނެ ދާއިރާތައް ކަނޑައެޅުމާއި، އެ ދާއިރާތައް ކަނޑައެޅުމުގެ އުޞޫލުތައް ކަނޑައެޅުމާއި، ފަންޑުން ފައިސާ ދޫކުރާނެ ހަމަތަކެއް ޤާއިމްކޮށް، އެ ހަމަތައް ތަންފީޒުކުރުން ހިމެނެއެވެ.