ބިދޭސީންގެ ބޮޑު ކޮންޓްރޯލެއް އޮންނަ ލޯކަލް މާރުކޭޓު ސަރަހައްދުގައި އިމިގްރޭޝަނުން ހިންގި އޮޕަރޭޝަނެއްގައި ގަވައިދާ ހިލާފަށް އުޅެމުން ދިޔަ 23 ބިދޭސީއަކު އަތުލައިގެންފިއެވެ.
މިއަދު ފަތިހުން ފެށިގެން މެންދުރާއި ހަމައަށް ބޮޑު ރެއިޑު އޮޕަރޭޝަނެއް ކުރިއަށް ގެންގޮސްފައި ވާއިރު އެ ސަރަހައްދުގައި އަޅާފައިވާ އުޅަނދުފަހަރާއި ލަފާ/ފުރާ އުޅަނދުފަހަރު ވެސް ބަލައި ފާސްކޮށްފައިވާކަން އިމިގްރޭޝަނުން ހާމަކޮށްފައިވެއެވެ.
މި އޮޕަރޭޝަންގައި 148 ބިދޭސީން ބަލައި ފާސްކޮށްފައިވާ ކަމާއި، މީގެ ތެރެއިން ގަވާއިދާ ޚިލާފަށް އުޅޭ 23 ބިދޭސީއަކު އިމިގްރޭޝަންގެ ބެލުމުގެ ދަށަށް ގެނެސްފައިވާކަން އިމިގްރޭޝަނުން ސޯޝަލް މީޑިއާ ގައި ހިއްސާ ކޮށްފައިވާ ޕޯސްޓެއްގައި ބަޔާން ކޮށްފައިވެއެވެ. މީގެ ތެރޭގައި 22 ފިރިހެނަކާއި 1 އަންހެނަކު ހިމެނެއެވެ.
ގަވާއިދާ ޚިލާފަށް އުޅޭ ބިދޭސީންގެ އަދަދު ދުވަހެއް ދުވަހަކަށް އިތުރުވަމުން ދާއިރު މިހާތަނަށް 5،000 އަށްވުރެ ގިނަ ބިދޭސީން ޑީޕޯޓް ކޮށްފައިވެއެވެ.