މާލޭގެ ލޯކަލް މާރުކޭޓާއި ހީނާމާގޭ ޕާކިންގ ސަރަހައްދުގައި މޯލްޑިވްސް އިމިގްރޭޝަނުން ހިންގި ހާއްސަ އޮޕަރޭޝަންތަކެއްގައި ގަވާއިދާ ހިލާފަށް އުޅެމުންދިޔަ 25 ބިދޭސީއަކު އެ މުއައްސަސާގެ ބެލުމުގެ ދަށަށް ގެނެސްފައިވާ ކަމަށް އިމިގްރޭޝަނުން މިއަދު ހާމަކޮށްފިއެވެ.
މި އޮޕަރޭޝަންތައް ހިންގާފައިވަނީ އިމިގްރޭޝަންގެ "އިމިގްރޭޝަން ވޮޗް" އަށް ލިބުނު މަޢުލޫމާތުތަކެއްގެ މައްޗަށް ބިނާކޮށެވެ. އެގޮތުން ލޯކަލް މާރުކޭޓު ސަރަހައްދާއި ހީނާމާގޭ ޕާކިންގ ސަރަހައްދަކީ ޤަވާއިދާ ޚިލާފަށް އުޅޭ ބިދޭސީންގެ ނުފޫޒު ގަދަ ދެ ސަރަހައްދު ކަމަށް މަޢުލޫމާތު ލިބިފައިވާތީ، އެ ސަރަހައްދުތަކަށް ޚާއްސަކޮށްގެން އިމިގްރޭޝަންގެ ޓާސްކު ފޯސްއިން މި އޮޕަރޭޝަންތައް ހިންގާފައިވެއެވެ.
އިމިގްރޭޝަނުން ބުނާ ގޮތުގައި މި އޮޕަރޭޝަންތަކުގައި ޖުމްލަ 137 ބިދޭސީން ބަލައި ފާސްކޮށްފައިވެއެވެ. އޭގެ ތެރެއިން ޤަވާއިދާ ޚިލާފަށް އުޅެމުންދިޔަ 25 ބިދޭސީއަކު ވަނީ އިމިގްރޭޝަންގެ ބެލުމުގެ ދަށަށް ގެންގޮސްފައެވެ.
މި އޮޕަރޭޝަންތަކުގައި ކޮންޓްރޯލަރ ޖެނެރަލް އޮފް އިމިގްރޭޝަން، މުޙައްމަދު ޝަމްޢާން ވަޙީދު އަދި ޑެޕިއުޓީ ކޮންޓްރޯލަރ، އަޙްމަދު އަޝްފާންވެސް އަމަލީ ގޮތުން ބައިވެރިވެ ވަޑައިގެންނެވިއެވެ.
އިމިގްރޭޝަނުން ހިއްސާކޮށްފައިވާ އޮޕަރޭޝަންގެ ވީޑިއޯއިން ފެންނަ ގޮތުގައި، އިމިގްރޭޝަންގެ އޮފިސަރުން މާރުކޭޓަށް ވަނުމާއެކު ބިދޭސީން ފިލަން މަސައްކަތްކުރި ނަމަވެސް، އޮފިސަރުން އެ މީހުން ހިފަހައްޓާފައިވެއެވެ.
ޤަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލަ ޙައްލުކުރުމަކީ ސަރުކާރުން ޚާއްސަ އިސްކަމެއް ދެއްވައިގެން ކުރިއަށްގެންދާ މަސައްކަތެކެވެ. މި މަސައްކަތުގެ ދަށުން މާލޭގެ އިތުރުން އެހެނިހެން ރަށްރަށާއި ރިސޯޓުތަކާއި ސިނާއީ ރަށްތަކުގައިވެސް މިފަދަ އޮޕަރޭޝަންތައް ހިންގަމުންދާ ކަމަށް އިމިގްރޭޝަނުން ބުނެއެވެ.
ސަރުކާރުން މި މައްސަލަ ޙައްލުކުރުމަށް ކުރަމުންދާ މަސައްކަތުގެ ދަށުން މިހާތަނަށް 5,000 އަށްވުރެ ގިނަ ބިދޭސީން ވަނީ ޑިޕޯޓްކޮށްފައެވެ. އަދި ރާއްޖޭގައި ތިބި ހުރިހާ ބިދޭސީންގެ މަޢުލޫމާތު އެއް ޑޭޓާބޭސްއަކަށް ގެނެސް، ބިދޭސީންގެ މައްސަލަތައް 3 އަހަރުގެ ތެރޭގައި ޖުމްލަ ޙައްލެއް ގެނައުމަކީވެސް ސަރުކާރުގެ އަމާޒެކެވެ.