އާންމުކޮށް އަހަރެމެންނަށ އޯއާރްއެސް ގެ އަޑު އިވޭނީ ހޮޑުލައި ބޭރަށް ހިންގައި ގައިގެ ވަރުދެރަވާތީ ޑޮކްޓަރަށް ދެއްކުމުންނެވެ. ގައިގެ ވަރުބަލިކޮށްލާ ވަރަށް ހަށިގަނޑުން ފެން ބޭރުވެ ހަކަތަ މަދުވުމުން އެންމެއަވަސް ފަރުވާ އަކީ އޯއާރްއެސްއެވެ. ނުވަތަ އަހަރެމެންގެ އާންމު ބަހުން ނަމަ "ލޮނު ޕެކެޓު" މިއީ ހަށިގަނޑުން މަދުވާ އިލެކްޓްރޯލައިޓްސް ވަރަށް އަވަހަށް ހަށިގަނޑަށް އަނބުރާ ލިއްބައިދޭ އެހީތެރިއެކެވެ.
އިންސާނާގެ ހަށިގަނޑުގެ ބޮޑު ބައެއް އެކުލެވިގެންވަނީ ފެނުންނެވެ. އާންމު ގޮތެއްގައި ބޮޑެތި މީހުންގެ ހަށިގަނޑުގެ 60 އިންސައްތައަކީ ފެނެވެ. ފެނަކީ ހަށިގަނޑުގެ ސެލްތަކާއި، ޓިޝޫތަކާއި އަދި އޯގަންތަކުގެ މައިގަނޑު ބައެވެ. އަދި ދިރިހުރުމަށް ކޮންމެހެން ބޭނުންވާ އެއްޗެކެވެ.
ހަށިގަނޑުގެ އާންމު ފިނިހޫނުމިން ހިފެހެއްޓުމާއި، ހަށިގަނޑުގެ އެކިއެކި ގުނަވަންތަކުގެ ވަޒީފާތަކަށް އެހީތެރިވުމާއި، ސެލްތަކާއި ނާޒުކު ޓިޝޫތައް ރައްކާތެރިކުރުމުގައި ފެނުގެ ދައުރު ވަރަށް ބޮޑެވެ. މީގެ އިތުރުން ހަށިގަނޑުން ކުނި ބޭރުކުރުމަށް ކުޑަކަމުދިއުމާއި، ދާހިއްލުމާއި އަދި ބޮޑުކަމުދިއުމުގައިވެސް ފެނުގެ ދައުރު މުހިންމެވެ.
ޑީހައިޑްރޭޓުވުން ނުވަތަ ހަށިގަނޑުން ފެންމަދުވުން. އޯއާރްއެސް ނުވަތަ ލޮނުޕެކެޓު ބޭނުން ކުރުން ރަނގަޅު/ ފޮޓޯ:ކޮރަލްލައިފް
ހަށިގަނޑުން ފެން މަދުވުމަކީ ވަރަށް ނުރައްކާތެރި ކަމެކެވެ. އާދައިގެ މަތިން ބޭރަށް ހިންގުމާއި، ހޮޑުލުމާއި، ގިނައިން ދާ ހިއްލުމަކީ އަދި ފެން ބުއިން މަދުވުމުގެ ސަބަބުން ހަށިގަނޑުން ފެން މަދުވެދާނެއެވެ. މިފަދަ ހާލަތްތަކުގައި ހަށިގަނޑަށް އަލުން ފެނާއި އިލެކްޓްރޯލައިޓްސް ދިނުމަށް އެންމެ ރަނގަޅު އެއް ގޮތަކީ އޯރަލް ރިހައިޑްރޭޝަން ސޮލިއުޝަން (އޯ.އާރް.އެސް) ބޭނުން ކުރުމެވެ.
އޯ.އާރް.އެސް ނުވަތަ ލޮނު ޕެކެޓަކީ ކޮބާ؟
އޯ.އާރް.އެސް ނުވަތަ ލޮނު ޕެކެޓަކީ، ސޯޑިއަމް އަދި ޕޮޓޭސިއަމް ފަދަ އިލެކްޓްރޯލައިޓްސްތަކާއި ގުލްކޯޒު، ވަކި މިންވަރަކަށް އެކުލެވޭ ހާއްސަ ބުއިމެކެވެ. މި ބުއިން ފެނަށް އަޅައިގެން ތައްޔާރުކުރާ "ލޮނުޕެކެޓް" އުފައްދާފައި ވަނީ ބޭރަށްހިންގުމާއި ހޮޑުލުމުގެ ސަބަބުން ގެއްލޭ ފެނާއި އިލެކްޓްރޯލައިޓްސް އަލުން ހަށިގަނޑަށް ދިނުމަށެވެ.
ފެނާއި އިލެކްޓްރޯލައިޓްސް އަލުން ހަށިގަނޑަށް ދިނުމަށް ބޭނުންކުރާ އޯ.އާރް.އެސް/ ފޮޓޯ:މާޓު
އޯ.އާރް.އެސް / ލޮނު ޕެކެޓު ބޭނުން ކުރަންވީ ކޮން ހާލަތްތަކެއްގައި؟
އޯ.އާރް.އެސް ބޭނުންކުރަން އެންމެ އެކަށީގެން ވަނީ އަންނަނިވި ހާލަތްތަކުގައެވެ:
- ބޭރަށް ހިންގުން: ހިންގުމުގެ ސަބަބުން ގެއްލޭ ފެނާއި އިލެކްޓްރޯލައިޓްސް އަލުން ހަށިގަނޑަށް ދިނުމަށް އޯ.އާރް.އެސް ވަރަށް މުހިންމެވެ.
- ހޮޑުލުން: ހޮޑުލުމުގެ ސަބަބުން ހަށިގަނޑުން ފެން މަދުވުމުގެ ނުރައްކާ ބޮޑެވެ. މިފަދަ ހާލަތްތަކުގައި އޯ.އާރް.އެސް ބޭނުންކުރުން މުހިންމެވެ.
- ހުން އައުމާއި އިންފެކްޝަންތައް: ހުމާއި އިންފެކްޝަންތަކުގެ ސަބަބުން ހަށިގަނޑުން ފެން މަދުވުމުގެ ނުރައްކާ އޮވެއެވެ. މިފަދަ ހާލަތްތަކުގައި އޯ.އާރް.އެސް ބޭނުންކޮށްގެން ހަށިގަނޑުގައި ފެނުގެ މިންވަރު ހިފެހެއްޓިދާނެއެވެ.
- ދަތުރުމަތީގައި ޖެހޭ ބޭރަށްންގުން: ފެނުގެ ސަބަބުން ޖެހޭ ބަލިތައް އާންމު ސަރަޙައްދުތަކަށް ދަތުރުކުރާއިރު އޯ.އާރް.އެސް ބޭނުންކުރުން މުހިންމެވެ.
- ގަދަފަދަ ކަސްރަތީ ހަރަކާތްތައް: ހޫނު މޫސުމުގައި ކުޅިވަރުކުޅުން ފަދަ ގަދަ ޖިސްމާނީ ހަރަކާތްތަކުގައި އުޅޭއިރު ހަށިގަނޑުން ފެން މަދުވުން ހުއްޓުވުމަށް އޯ.އާރް.އެސް ބޭނުންކުރެވިދާނެއެވެ.
ހޮޑުލުމާއި ބޭރށް ހިންގުމުން ރައްކާތެރިވުމަށްފެނާއި އިލެކްޓްރޯލައިޓްސް އަލުން ހަށިގަނޑަށް ދިނުމަށް ބޭނުންކުރާ އޯ.އާރް.އެސް
އޯ.އާރް.އެސް / ލޮނު ޕެކެޓު ގެ ފައިދާތައް:
- ފެން އިތުރުކޮށްދިނުން: ބޭރަށް ހިންގުމާއި ހޮޑުލުމުގެ ސަބަބުން ހަށިގަނޑުން ބޭރުވެ މަދުވާ ފެން، ހަށިގަނޑަށް ފޯރުކޮށްދިނުމަށްވުރެ މާ އަވަހަށް، ލޮނުޕެކެޓުން ހަށިގަނޑަށް ފެން ލިބިދެއެވެ.
- އިލެކްޓްރޯލައިޓްސް އަލުން ދިނުން: ސޯޑިއަމް، ޕޮޓޭސިއަމް އަދި ގުލްކޯޒު ފަދަ މުހިންމު އިލެކްޓްރޯލައިޓްސް ހަށިގަނޑަށް ހަކަތަ ގެނެސްދެއެވެ.
- ފެން މަދުވުން ނުވަތަ ޑީހައިޑްރޭޓްވުން ހުއްޓުވުން: ވަގުތުން އޯ.އާރް.އެސް ދިނުމުން ކުޑަކޮށް ފެން މަދުވެފައިވާ ހާލަތް އިތުރަށް ގޯސްވުން ހުއްޓުވިދާނެއެވެ.
- ފަސޭހަ އަދި ރައްކާތެރި: ތައްޔާރުކުރަން ފަސޭހަ އަދި ކުޑަކުދިންނަށްވެސް ދިނުން ރައްކާތެރި ފަރުވާއެކެވެ.
އޯ.އާރް.އެސް ތައްޔާރުކުރާނެ ގޮތް:
ކުއްލި ހާލަތެއްގައި ގޭގައި އޯ.އާރް.އެސް ތައްޔާރު ކުރެވޭކަން އެނގޭތޯއެވެ. ނިކަން ލޮނުޕެކެޓު ނޫނީ އޯއާރްއެސް ތައްޔާރުކޮށްލަމާ ހިނގާށެވެ!
ގޭގައި އޯ.އާރް.އެސް ތައްޔާރު ކުރެވޭނެ
ބޭނުންވާ ތަކެތި:
- 1 ލީޓަރު ސާފު ބޯފެން (ކައްކާ ފިނިކޮށްފައިވާ)
- 6 ސަމުސާ ހަކުރު
- ½ ސަމުސާ ލޮނު
ތައްޔާރު ކުރާނެ ގޮތް:
- ފެނަށް ހަކުރާއި ލޮނު އަޅާ ރަނގަޅަށް އެއްކޮށްލާށެވެ.
- ހަކުރާއި ލޮނު ފެނަށް ރަނގަޅަށް ގިރެންދެން އެއްކުރަމުން ދާށެވެ.
- މިހާރު އަމިއްލައަށް ގޭގައި އެހެރީ ތާޒާ ލޮނުޕެކެޓު ނޫނީ އޯ.އާރް.އެސް ތައްޔާރު ކުރެވިފައެވެ.
އޯ.އާރް.އެސް އަކީ ހަށިގަނޑުން ފެން މަދުވުމުގެ ސަބަބުން ދިމާވާ މައްސަލަތަކަށް ވަރަށް ފަސޭހައިން ލިބެންހުރި އަދި އަގުހެޔޮ ފަރުވާއެކެވެ. ނަމަވެސް އޯ.އާރް.އެސް ބޭނުންކުރާއިރު ޞިއްޙީ ފަރުވާދޭ ފަރާތްތަކުގެ ލަފާ ހޯދުމަކީ މުހިންމު ކަމެކެވެ. ޚާއްޞަކޮށް ކުޑަކުދިންނަށް އޯ.އާރް.އެސް ދޭއިރު، އުމުރާއި ފެން މަދުވެފައިވާ މިންވަރަށް ބަލައި އެކަށީގެންވާ މިންވަރަށް ދިނުމަކީ މުހިންމު ކަމެކެވެ.
އޯ.އާރް.އެސް ގެ ފައިދާ ނުހަނު ބޮޑު،، މިއީ ހަށިގަނޑަށް ފެން އިތުރުކޮށްދޭއެހީތެރއެއް/ ފޮޓޯ:ކޯލްސައި
އުމުރާ ގުޅޭ ގޮތުން އޯއާރްއެސް ދޭންވާ މިންވަރު ދެނެގަތުން މުހިންމު
- 3.2-4.5 ކިލޯ ގެ ކުއްޖަކަށް (7-10 ޕައުންޑް): ގަޑިއަކު މަދުވެގެން 60 މިލިލީޓަރު (2 އައުންސް)
- 5-6.8 ކިލޯ ގެ ކުއްޖަކަށް (11-15 ޕައުންޑް): ގަޑިއަކު މަދުވެގެން 75 މިލިލީޓަރު (2.5 އައުންސް)
- 7.3-9 ކިލޯ ގެ ކުއްޖަކަށް (16-20 ޕައުންޑް): ގަޑިއަކު މަދުވެގެން 105 މިލިލީޓަރު (3.5 އައުންސް)
- 9.5-18.1 ކިލޯ ގެ ކުއްޖަކަށް (21-40 ޕައުންޑް): ގަޑިއަކު މަދުވެގެން 195 މިލިލީޓަރު (6.5 އައުންސް)
- 18.6-27.2 ކިލޯ ގެ ކުއްޖަކަށް (41-60 ޕައުންޑް): ގަޑިއަކު މަދުވެގެން 300 މިލިލީޓަރު (10 އައުންސް)
- 10 އަހަރުން މަތި ނަމަ ދުވާލަކު 2 ލީޓަރު (68 އައުންސް) އާ ހަމައަށް
ގޭގައި އޯ.އާރް.އެސް އަބަދުވެސް ލިބެން ހުރުމަކީ މުހިންމުކަމެއް / ފޮޓޯ:މާޓް
އޯ.އާރް.އެސް އަކީ ހަށިގަނޑުން ފެން މަދުވުމުގެ ސަބަބުން ދިމާވާ މައްސަލަތަކަށް ވަރަށް ފައިދާހުރި އަދި ރައްކާތެރި ފަރުވާއެކެވެ. ނަމަވެސް މިކަމުގައި ޞިއްޙީ ފަރުވާދޭ ފަރާތްތަކުގެ ލަފާ ހޯދުމަކީ މުހިންމު ކަމެކެވެ. ހަށިގަނޑުން ފެން މަދުވުމުގެ އަލާމާތްތައް ފެނިއްޖެނަމަ ވަގުތުން އޯ.އާރް.އެސް ބޭނުންކުރަން ފެށުމަކީ މުހިންމު ކަމެކެވެ. އަދި ރަނގަޅު ނުވާނަމަ ލަސްނުކޮށް ޑޮކްޓަރަކަށް ދެއްކުމަކީވެސް މުހިންމު ކަމެކެވެ. ހަށިގަނޑުގައި އެކަށީގެންވާ މިންވަރަށް ފެން ހުރުމަކީ ދުޅަހެޔޮ ޞިއްޙަތަކަށް ކޮންމެހެން ބޭނުން ކަމެކެވެ.