މާލޭގެ މަގުތައް ޒަމާނީ ފެންވަރަށް ތަރައްޤީކުރުމަށް ޗައިނާ ސަރުކާރުގެ އެހީގައި ކުރިޔަށް ގެންދާ މަޝްރޫޢުގެ ދަށުން މަގުތަކުގައި މިހާރު ހުރި ހުރިހާ މައްސަލައަކަށްވެސް ހައްލު ލިބޭނެކަމަށް ޢިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއިން މިއަދު ހާމަކޮށްފިއެވެ.
މި މަޝްރޫޢުގެ ދަށުން މާލެއާއި ވިލިމާލޭގެ މަގުތައް ތަރައްޤީކުރުމަށް ޗައިނާ ސަރުކާރާއި ދިވެހި ސަރުކާރާ ދެމެދު އެއްބަސްވުމެއްގައި ސޮއިކޮށްފައިވަނީ މިއަހަރުގެ ޖެނުއަރީ މަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޗައިނާއަށް ކުރެއްވި ދަތުރުފުޅުގެ ތެރެއިންނެވެ. މި މަޝްރޫޢުގެ ދިރާސާތައް ހެދުމަށް ޗައިނާގެ ތަޖުރިބާކާރުންގެ ޓީމެއް ރާއްޖެ އައިސް މިދިޔަ މަހުގެ 22 ވަނަ ދުވަހު ވަނީ ދިރާސާތައް ނިންމާލާފައެވެ.
ޢިމާރާތްކުރުމާއި ގެދޮރުވެރިކަމާއި ބިނާރާބެހޭ ވުޒާރާގެ ސްޓޭޓް މިނިސްޓަރ އިބްރާހީމް ނަޒީމް ވިދާޅުވީ މި މަޝްރޫޢުގެ ފީސިބިލިޓީ ރިޕޯޓު ނިމުމުން ޢަމަލީ މަސައްކަތް ފެށޭނެ ކަމަށެވެ. އަދި މާލޭގެ މަގުތައް ތަރައްޤީކުރަނީ މިހާރު މަގުތަކުގައި ހުރި ހުރިހާ މައްސަލައަކަށް ވަށައިޖެހޭ ދާއިމީ ހައްލެއް ލިބޭނެ ގޮތަށް ކަމަށް އޭނާ ފާހަގަކުރެއްވިއެވެ.
“މާލޭގެ މަގުތައް ހަދާ ނިމުމުން މަގުތަކުގައި ފެން ބޮޑުވާ މައްސަލައަށް ދާއިމީ ހައްލެއް އަންނާނެ. އަމާޒަކީ މަޝްރޫޢުގެ ޢަމަލީ މަސައްކަތް ފަށާތާ ދެތިން އަހަރުގެ ތެރޭގައި މަސައްކަތް ނިންމުން.” ނަޒީމް ވިދާޅުވިއެވެ.
މި މަޝްރޫޢުގެ ދަށުން މަގުތައް ތަރައްޤީކުރާނީ ތާރު އަޅައިގެންނެވެ. އަދި ފެނާއި ނަރުދަމާގެ ނިޒާމާއި ކަރަންޓު އަޕްގްރޭޑް ކުރުމާއި ސްޓޯމް ވޯޓަރ ނިޒާމާއި ފަޔަރ ހައިޑްރަންޓްގެ ނިޒާމުވެސް ގާއިމުކުރެވޭނެއެވެ. ވިލިމާލޭގައި 5.6 ކިލޯމީޓަރުގެ މަގު ހެދުމަށް ހަމަޖެހިފައިވާއިރު، މި މަސައްކަތުގައިވެސް މަގުތަކުގެ އަޑިން އަޅަންޖެހޭ ކަރަންޓާއި ނަރުދަމާ ނިޒާމާއި ފެން ހިންދާ ނިޒާމް އެޅުމަށް ހަމަޖެހިފައިވެއެވެ.
މާލޭގެ މަގުތަކަށް ދިމާވެފައިވާ އެންމެ ބޮޑު މައްސަލައަކީ މަގުތައް ހަލާކުވެފައި އޮތުމާއި ފެންބޮޑުވާ މައްސަލައެވެ. މި މައްސަލަތަކަށް މީގެ ކުރިންވެސް ހައްލެއް ހޯދުމަށް މަސައްކަތްކޮށްފައި ވީނަމަވެސް މިހާތަނަށް އައިރުވެސް މިކަމަށް ދާއިމީ ހައްލެއް ލިބިފައެއް ނުވެއެވެ. އެހެންކަމުން ސަރުކަރުން ނިންމެވީ މާލޭގެ މަގުތަކަށް ދިމާވެފައިވާ ބޮޑު މައްސަލައަށް ދާއިމީ ޙައްލެއް ގެނައުމަށެވެ.