ދިވެހިރާއްޖޭގެ އަޑުގެ ޚިދުމަތް ފުޅާކޮށް، އަތޮޅުތަކުން ގިނަ ޕްރޮގްރާމްތަކެއް ގެނައުމަށް އެދިވަޑައިގަންނަވާކަމަށް ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވެއްޖެއެވެ. މިހެން ވިދާޅުވެފައިވަނީ ދިވެހިރާއްޖޭގެ އަޑުގެ 62 ވަނަ އަހަރީ ދުވަހުގެ މުނާސަބަތުގައި ދެއްވި ޚާއްޞަ ބަސްތީގަތުމެއްގައެވެ.
މި ބަސްތީގަތުމުގައި މަޖިލީހުގެ ރައީސް ވަނީ އެމަނިކުފާނުގެ ރޭޑިއޯއާ ގުޅުންހުރި ތަޖުރިބާތައް ހިއްސާކުރައްވާފައެވެ. މިގޮތުން، ހައްދުންމަތީ އަތޮޅު އޮފީހުގައި މަސައްކަތްކުރެއްވި ދުވަސްވަރު “އަތޮޅު ހަފްތާ ޚަބަރު” ވިދާޅުވެފައިވާކަން ފާހަގަކުރެއްވިއެވެ. އޭރު އަތޮޅު އޮފީހުން އަތޮޅުގެ ރަށްރަށުގައި ހިނގާ ކަންކަން ބަލައި، އެ ޚަބަރު އެއްކުރެއްވި ކަމަށާއި، އެމަސައްކަތުގައި އެމަނިކުފާނު ޢަމަލީގޮތުން ބައިވެރިވެވަޑައިގެންނެވި ކަމަށްވެސް ވިދާޅުވިއެވެ.
“އަތޮޅު ހަފްތާ ޚަބަރު، އެދުވަސްވަރު އަޅުގަނޑު މަސައްކަތް ކުރީ ލ. އަތޮޅު އޮފީހުގައި. ދެން ބައެއް ދުވަސްތަކުގައި އެ ޚަބަރު ކިޔަން ހުންނަ ކުއްޖާ ބަލިވެގެން، ނޫނީ ޗުއްޓީއެއްގައި ހުރެގެން ނާދެވި ހިނގައިދާނެ. ދެން އެ ޚަބަރު އަސްލު ތައްޔާރުކުރަނީ އަޅުގަނޑުމެން. ތައްޔާރުކުރީމަ އެކުއްޖަކު އައިސް ކިޔަނީ. އެހެން ދިމާވާ ބައެއް ދުވަސްދުވަހު ހުންނާނެ އަޅުގަނޑުވެސް ޚަބަރު ކިޔާފައި” މަޖިލީހުގެ ރައީސް ވިދާޅުވިއެވެ.
މިފަދަ ޕްރޮގްރާމްތަކަކީ އޭރުވެސް އަދި މިހާރުވެސް މުހިންމު ޕްރޮގްރާމްތަކެއްކަމަށް ފާހަގަކުރައްވައި، ދިވެހިރާއްޖޭގެ އަޑުގެ ޚިދުމަތް ފުޅާކުރުމަށްޓަކައި މިފަދަ މަސައްކަތްތައް އަތޮޅުތަކުގައި ކުރިއަށްގެންދިއުމަށް މަޖިލީހުގެ ރައީސް އެދިވަޑައިގެންނެވިއެވެ.
“ދިވެހިރާއްޖޭގެ އަޑުގެ ޚިދުމަތް މިހާރަށްވުރެ ރަނގަޅުކުރަން ޖެހޭކަމަށް އަޅުގަނޑު ޤަބޫލުކުރަނީ. ފުޅާކުރެއްވިއްޖެއިއްޔާ މުސްތަޤުބަލެއް އޮތްކަމަށް އަޅުގަނޑު ޤަބޫލުކުރަން. ފުޅާކުރާއިރު މާލޭގައި އެކަނި މިކަން ނުކުރެވޭނެ. އަތޮޅުތަކަށް އެބަޖެހޭ މި ޚިދުމަތްދާން.” އަބްދުއްރަޙީމް ވިދާޅުވިއެވެ.
ދިވެހިރާއްޖޭގެ އަޑަށް 62 އަހަރު ފުރުނުއިރު، މިއީ ރާއްޖޭގެ އެންމެ ގިނަ ދުވަސްވީ ޚަބަރު ފަތުރާ ވަސީލަތްކަން ފާހަގަކުރައްވައި، މި ޚިދުމަތް ދެމެހެއްޓުމަށް މަސައްކަތް ކުރަން ޖެހޭ ކަމަށްވެސް ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވިއެވެ.