އިމިގްރޭޝަން މޯލްޑިވްސްއިން މާލޭގައި ހިންގި ޚާއްސަ އޮޕަރޭޝަނެއްގައި 6 ކޮފީޝޮޕެއް ބަލައި ފާސްކޮށް، ގަވާއިދާ ޚިލާފަށް އުޅެމުންދިޔަ 5 ބިދޭސީއެއް އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަނުން މަޢުލޫމާތު ދެއްވިގޮތުގައި މި އޮޕަރޭޝަނަކީ ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން ބައެކެވެ. މި އޮޕަރޭޝަން ކުރިއަށް ގެންދިޔައީ އިމިގްރޭޝަންގެ ޓާސްކުފޯހުންނެވެ.
"މިފަދަ އޮޕަރޭޝަންތަކުގެ މަޤްޞަދަކީ ގަވާއިދާ ޚިލާފަށް އުޅޭ ބިދޭސީން ދެނެގަނެ، އެ ފަރާތްތައް ޤާނޫނީ އިމުގެ ތެރެއަށް ވެއްދުމެވެ. އަޅުގަނޑުމެން އަމާޒަކީ އަންނަ 3 އަހަރުގެ ތެރޭގައި މި މައްސަލަ މުޅިން ހައްލުކުރުމެވެ،" އިމިގްރޭޝަންގެ ސްޕޯކްސްޕަރސަން ވިދާޅުވިއެވެ.
މި ސަރުކާރު ވެރިކަމާ ހަވާލުވި ފަހުން، ރާއްޖޭގައި ގަވާއިދާ ޚިލާފަށް އުޅެމުން އަންނަ ބިދޭސީން ހޯދައި، އެމީހުންނާމެދު ފިޔަވަޅު އެޅުމުގެ މަސައްކަތް ވަނީ ފަށާފައެވެ. މިހާތަނަށް 5،000 އަށްވުރެ ގިނަ ބިދޭސީން ވަނީ ޑީޕޯޓްކޮށްފައެވެ.
އިމިގްރޭޝަނުން އިތުރަށް ވިދާޅުވީ، ބިދޭސީން މަސައްކަތްކުރާ ތަންތަނަށް އަމާޒުކޮށްގެން ތަފާތު އެކި ރެއިޑް އޮޕަރޭޝަންތައް ކުރިއަށް ގެންދާނެ ކަމަށެވެ. މިފަދަ އޮޕަރޭޝަންތަކުން ގަވާއިދާ ޚިލާފަށް އުޅޭ ބިދޭސީން ދެނެގަނެ، އެ ފަރާތްތައް އަނބުރާ އެމީހުންގެ ޤައުމަށް ފޮނުވާލެވޭނެއެވެ.