ސްކޫލުގެ ޓާމު ބަންދާއި އާ އަހަރުގެ ބަންދާ ދިމާކޮށް މޯލްޑިވިއަން އިން ޑޮމެސްޓިކް އަދި އިންޓަނޭޝަނަލް މަންޒިލުތަކަށް 98 ފްލައިޓް އިތުރުކޮށްފިއެވެ.
ފްލައިޓްތައް އިތުރުކޮށްފައިވަނީ މިމަހު 18 ވަނަ ދުވަހުން ފެށިގެން ކަމަށް މޯލްޑިވިއަންގެ އޮފިޝަލަކު މީޑިއާ އަކަށް މައުލޫމާތު ދިނެވެ.
މީގެ އިތުރުން ރާއްޖެއިން އިންޑިއާގެ ޓްރިވާންޑްރަމް އަށް ދަތުރުކުރާ ދިވެހިން ކޮޅަކަށް ދައްކަންޖެހޭނީ 184 ޑޯލަރު ކަމަށާއި އަދި ބިދޭސީން ކޮޅަކަށް ދައްކަންޖެހޭނީ 260 ޑޮލަރު ކަމަށް ވެސް އެ އެ އެއާލައިނުން މައުލޫމާތު ދިނެވެ. އަދި މި އޮފަރ ކުރިއަށް ދާނީ އަންނަ މަހު 8 އާ ހަމަޔަށް ކަން ވެސް ހާމަކޮށްފައިވެއެވެ.
މޯލްޑިވިއަނުން އިތުރުކުރާ ފްލައިޓުތަކުގެ މައުލޫމާތު އެ އެއާލައިންގެ ސޯޝަލް މީޑިއާ ޕްލެޓްފޯމުތަކުގައި އަންނަނީ ޕޯސްޓުކުރަމުންނެވެ.
މޯލްޑިވިއަނުން މިހާރު ތައްޔާރުވަމުން އަންނަނީ އެ އެއާލައިންގެ ފުރަތަމަ ފުރަތަމަ ވައިޑް ބޮޑީ އެއާކްރާފްޓު އަންނަ މަހު ގެނެސް ދަތުރުތައް ފެށުމަށެވެ. މޯލްޑިވިއަންއަށް އަލަށް ގެންނަ ވައިޑް ބޮޑީ އެއަރ ކްރާފްޓްގެ އޮޕަރޭޝަންތައް ފުރަތަމަ ފަށާނީ ޗައިނާއަށް ކަމަށް އެކުންފުނިން ވިދާޅުވިއެވެ. އަދި އެއީ ޗައިނާގެ ޝެންހާއި، ޗެންޑޫ އަދި ބެއިޖިންއަށް ކަންވެސް މޯލްޑިވިއަނުން ހާމަކޮށްފައިވެއެވެ.