އާ އަހަރާ ދިމާކޮށް މި މަހު ގިނަ އަދަދެއްގެ އަމިއްލަ ޖެޓުތައް ރާއްޖެއަށް އައިސްފިއެވެ.
މިދިޔަ އަހަރުގެ ޑިސެމްބަރު 28 ގެ ނިޔަލަށް 137 ޖެޓު މޫވްމަންޓްސް ރިކޯޑުކުރެވިފައިވާއިރު، މި އަހަރުގެ ޑިސެމްބަރު މަހުގެ އިއްޔެގެ ނިޔަލަށް 148 ޖެޓު މޫވްމަންޓްސް ރިކޯޑުކުރެވިފައިވެއެވެ. މިއީ 8 ޕަސެންޓުގެ އިތުރުވުމެކެވެ.
ކްރިސްމަސް އަދި އާ އަހަރާ ދިމާކޮށް ކޮންމެ އަހަރަކުވެސް ދުނިޔޭގެ މަޝްހޫރު މަހުޖަނުން ރާއްޖެއަށް ޒިޔާރަތްކުރާކަން ފާހަގަކުރެވެއެވެ. މި ވަގުތު ވެލާނާ އެއާޕޯޓުގައި 30 އަށްވުރެ ގިނަ އަމިއްލަ ޖެޓު ޕާކުކޮށްފައިވާކަމަށް އެމްއޭސީއެލުން ބުނެފައިވެއެވެ.
މުޅި އަހަރުގެ ތަފާސްހިސާބުތަކަށް ބަލާއިރު، މި އަހަރުގެ މިހާތަނަށް 2،326 ޖެޓު މޫވްމަންޓްސް ރިކޯޑުކުރެވިފައިވާއިރު، މިދިޔަ އަހަރުގެ މި މުއްދަތުގައި ރިކޯޑުކުރެވިފައިވަނީ 2،107 ޖެޓު މޫވްމަންޓްސްއެވެ. މިއީ 10 ޕަސެންޓުގެ އިތުރުވުމެކެވެ.
މި ދުވަސްވަރު ގިނަ އަދަދެއްގެ އަމިއްލަ ޖެޓުތައް ރާއްޖެއަށް އަންނާތީ، ވެލާނާ އެއާޕޯޓުގެ ތިން ސަރަހައްދެއްގައި ޖެޓުތައް ޕާކުކުރެވޭނެ ޚާއްޞަ ޖާގަތަކެއް ހަދާފައިވެއެވެ. މި ސަރަހައްދުތަކުގައި ޖުމްލަ 68 ޖެޓު ޕާކުކުރެވޭނެއެވެ.
މިދިޔަ އަހަރު ރާއްޖެއަށް 2.2 މިލިއަން ފަސިންޖަރުން ޒިޔާރަތްކުރިއިރު، މި އަހަރުގެ އިއްޔެގެ ނިޔަލަށް 2.4 މިލިއަން ފަސިންޖަރުން ރާއްޖެއަށް ޒިޔާރަތްކޮށްފައިވާކަން އެމްއޭސީއެލުން ފާހަގަކޮށްފައިވެއެވެ.