މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޑރ.ޢަބްދުالله މުއްތަލިބު މޯލްޑިވްސް ޕޯޓްސް ލިމިޓެޑް، މާލެ ކޮމާޝަލް ހާބަރަށްް އިއްޔެ ޒިޔާރަތްކުރައްވައި، އެސަރަޙައްދުގައި ބަނދަރު ފެސިލިޓީތައް ހިންގަމުންދާގޮތް ބައްލަވައިފިއެވެ.
އެ މިނިސްޓްރީން "އެކްސް" ގައި ކޮށްފައިވާ ޕޯސްޓެއްގައި ހިއްސާކޮށްފައިވަނީ މި ޒިޔާރާތުގައި ކޮންސްޓްރަކްޝަން މިނިސްޓަރުގެ އިތުރުން ސްޓޭޓް މިނިސްޓަރު އިބްރާހިމް ތޮއާމް މުޙައްމަދާއި، އެމްޕީއެލްގެ ޗީފް އެގްޒެކެޓިވް އޮފިސަރު މުހައްމަދު ވަޖީހު އިބްރާހީމާއި، އެމްޕީއެލްގެ އިސްވެރިންނާއި، ކޮންސްޓްރަކްޝަން މިނިސްޓްރީގެ ޓެކްނިކަލް ޓީމު ބައިވެރިވެވަޑައިގެންފައިވާކަމަށެވެ.
މީގެ އިތުރުން، މި ޒިޔާރާތުގައި މިނިސްޓަރަށް ވަނީ ބަނދަރު ބަދަލުކުރުމުގެ މަޝްރޫޢާއި ތިލަފުށި ބަނދަރު ތަރައްގީ ކުރުމުގެ މަޝްރޫއު ކުރިއަށް ދާ ގޮތުގެ މައުލޫމާތު ލިބިވަޑައިގެންފައެވެ.
މޯލްޑިވްސް ޕޯޓް ލިމިޓެޑް(އެމްޕީއެލް) ގެ ސީއީއޯ މުހައްމަދު ވަޖީޙު ވިދާޅުވެފައިވަނީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުއިއްޒުގެ އިސްނެންގެވުމުގެ މަތިން، މި ސަރުކާރުން ގެންގުޅުއްވާ ތަޞައްވުރުގެ އަމާޒަކީ، އަޅުގަނޑުމެންގެ ކަނޑުގެ ސަރަޙައްދަށް އިންޤިލާބީ ބަދަލުތަކެއް ގެނައުމެވެ. އެގޮތުން މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމާއި، އިހަވަންދިއްޕޮޅުގެ ބަނދަރު ޓްރާންސްޝިޕްމަންޓް ބަނދަރާއެކު ތަރައްޤީކުރުމާއި، ލ.ގާދޫގައި ބަންކަރިންގެ ޚިދުމަތް ޤާއިމުކުރުން ފަދަ މަސައްކަތްތަކުގެ ސަބަބުން ބަދަލުތަކެއް އަންނާނެކަމަށް ވަޖީޙު ހާމަކުރެއްވިއެވެ.