މިދިޔަ ހަފްތާގައި ރާއްޖެއަށް ޒިޔާރަތްކުރި ދެ ބޮޑު ކްރޫޒްލައިނާއިން އައި ހުރިހާ ފަތުރުވެރިންނާއި ފަޅުވެރިން ރާއްޖޭގެ ބޯޑަރުން އެތެރެވެފައި ވަނީ އިމިގްރޭޝަން ކްލިއަރެންސާ އެކުގައެވެ.
މޯލްޑިވްސް އިމިގްރޭޝަންގެ ސީޕޯޓް ޑިވިޜަންގެ އޮފިސަރުން ވަނީ 23 ޑިސެމްބަރު 2024 އިން 30 ޑިސެމްބަރު 2024 އާ ދެމެދު، ސީޝެލްސްގެ މާހޭ އިން ފެށިގެން އަންނަ ދަތުރުގެ ކްލިއަރަންސް ޕްރޮސެސް ކާމިޔާބުކަމާއެކު ކުރިއަށް ގެންގޮސްފައެވެ. މިކަން ހާމަކޮށްފައި ވަނީ އިމިގްރޭޝަންގެ ސޯޝަލްމީޑިއާ ޕޯސްޓެއްގައެވެ.
ކްރޫޒުލައިނާ- އެމްއެސް ރިވިއޭރާއިން- ކްރޫޒުލައިނާ-އެމްއެސް ނޯވެޖިއަން ސްކައި / ފޮޓޯ:އިމިގްރޭޝަން
ބަހާމާސްގައި ރަޖިސްޓްރީކޮށްފައިވާ "އެމްއެސް ނޯވެޖިއަން ސްކައި" އަދި މާޝަލް އައިލެންޑްސްގައި ރަޖިސްޓްރީކޮށްފައިވާ "އެމްއެސް ރިވިއޭރާ" މި ދެ ކްރޫޒްލައިނާ ވަނީ މާލޭގައި ބަނދަރުކޮށްފައެވެ. އެމްއެސް ނޯވެޖިއަން ސްކައިން 1،870 ފަސިންޖަރުންނާއި 862 ފަޅުވެރިންނަށް އިމިގްރޭޝަން ކްލިއަރެންސް ދެވުނު އިރު، އެމްއެސް ރިވިއޭރާއިން 1،179 ފަސިންޖަރުންނާއި 747 ފަޅުވެރިންނަށް ވަނީ އިމިގްރޭޝަންކްލިއަރެންސް ދެވިފައެވެ.
ކްރޫޒުލައިނާ-އެމްއެސް ނޯވެޖިއަން ސްކައި / ފޮޓޯ:އިމިގްރޭޝަން
"އެމްއެސް ނޯވެޖިއަން ސްކައި" މާލޭގައި ބަނދަރުކުރިއިރު، މިއީ މި ސީޒަނުގައި ރާއްޖެ އައި ދެވަނަ ކްރޫޒް ލައިނާއެވެ. މި އުޅަނދު ރާއްޖެ އައިސްފައިވަނީ ސީޝެލްސްގެ ދެ ބަނދަރެއްގައި މަޑުކުރުމަށްފަހުއެވެ. އެމްއެސް ނޯވެޖިއަން ސްކައި މިރޭ މާލެއިން ފުރާނެ އިރު، އޭގެ ދެން އޮތް މަންޒިލަކީ ތައިލެންޑުގެ ފުކެޓެވެ.
ކްރޫޒުލައިނާ- އެމްއެސް ރިވިއޭރާއިން / ފޮޓޯ:އިމިގްރޭޝަން
އެމްއެސް ރިވިއޭރާއިން މާލެ އައީ އިއްޔެއެވެ. ޖުމްލަ 2،004 މީހުންގެ ޖާގައިގެ މި ކްރޫޒް ލައިނާއިން އެތައް ސަތޭކަ ބަޔަކު ވަނީ މާލެ ފައިބައިފައެވެ. މި އުޅަނދު ވެސް ރާއްޖެ އައިސްފައިވަނީ ސީޝެލްސްގައި ބަނދަރުކުރުމަށްފަހުއެވެ. އެމްއެސް ރިވިއޭރާ މާލެއިން ފުރައިގެން ދެން ދާން ހަމަޖެހިފައި އޮތް މަންޒިލަކީ ސްރީ ލަންކާއެވެ.
ކްރޫޒުލައިނާ ތައް ކައިރީ އިމިގްރޭޝަން އޮފިސަރުން
މި ދެ ކްރޫޒްލައިނާގެ ޒިޔާރަތާއެކު، ފަތުރުވެރިކަމުގެ މި ސީޒަން ފެށިގެން ދިޔައިރު، އެތައް ހާސް ފަތުރުވެރިންނެއް ރާއްޖެއަށް ޒިޔާރަތް ކޮށްފައިވާކަން ފާހަގަކުރެވެއެވެ. މިއީ ރާއްޖޭގެ ފަތުރުވެރިކަމުގެ ސިނާއަތަށް ވަރަށް އުފާވެރި ޚަބަރެކެވެ.