ހެޑްލައިން: 100 އަށްވުރެ ގިނަ ފަހަރު ހައްޔަރުކުރެވިފައިވާ މީހަކު އަނެއްކާވެސް ވައްކަމުގެ ތުހުމަތުގައި ހައްޔަރުކޮށްފި
މާލެ (ވޮއިސް) – ކުދިކުދި ކުށްތަކުގައި 100 އަށްވުރެ ގިނަ ފަހަރު ހައްޔަރުކޮށްފައިވާ މީހަކު އަނެއްކާވެސް ހައްޔަރުކޮށްފިއެވެ. މި ފަހަރު ހައްޔަރުކޮށްފައިވަނީ ވައްކަމުގެ ތުހުމަތުގައެވެ.
ފުލުހުން މައުލޫމާތު ދެއްވާގޮތުގައި ހައްޔަރުކޮށްފައިވަނީ ނ. މިލަދޫ ސޯސަންގެ މުހައްމަދު ނައުޝާދެވެ. އޭނާ ހައްޔަރުކުރެވުނީ އިއްޔެ ރޭ މާލޭގައެވެ. ނަމަވެސް، ވައްކަމުގެ ތުހުމަތަށް އޭނާ ވަނީ އިންކާރުކޮށްފައެވެ.
ނައުޝާދުގެ ބަންދު އަމުރުގައި ބަޔާންކޮށްފައިވާ ގޮތުން، އޭނާ ވަނީ ކުދިކުދި ކުށްތަކުގައި 100 އަށްވުރެ ގިނަ ފަހަރު ހައްޔަރުކޮށް ބަންދުކޮށްފައެވެ. ކްރިމިނަލް ކޯޓުގެ ގާޒީ މިސްބާހު ކުރިން ފާހަގަކުރައްވާފައިވާ ގޮތުގައި ނައުޝާދަކީ ތަކުރާރުކޮށް މަސްތުވާތަކެތި ބޭނުންކުރުމާއި ވައްކަމާއި އެ ބާވަތުގެ އެކިއެކި ކުދިކުދި ކުށްތަކަށް އަރައިގަންނަމުންދާ މީހެކެވެ.
ގާޒީ މުހައްމަދު މިސްބާހު ކުރިން ވިދާޅުވެފައިވަނީ، “އާއްމު ޖިނާއީ ނިޒާމުގެ ތެރެއިން މިހާރު އަމަލު ކުރަމުންދާ ގޮތަށް ދައުވާކޮށްފައި އަދަބު ކަނޑައެޅިކަމުގައިވީ ނަމަވެސް މިއީ އެފަދަ މީހުން އިސްލާހުވުމަށް ބާރު އެޅޭ ފަދަ އަދަބެއް ކަމުގައި ނުވޭ” ކަމަށެވެ. އަދި އެފަދަ މީހުންނަކީ މުޖުތަމައުން އެކަހެރިކޮށް އިސްލާހުކުރުމުގެ ނިޒާމެއްގެ ތެރެއަށް ވެއްދުމަށްފަހު، އިސްލާހުވެ މުޖުތަމައަށް ފައިދާހުރި މަސައްކަތެއް ދަސްކުރުމަށްފަހު އަމިއްލަ ދިރިއުޅުމެއް އުޅެން ތައްޔާރުވުމުން ނޫނީ އަލުން މުޖުތަމައަށް ދޫނުކުރެވޭނެ މީހުން ކަމަށް ދެކެވަޑައިގަންނަވާ ކަމަށްވެސް ވިދާޅުވެފައިވެއެވެ.
މި މައްސަލައާ ގުޅިގެން ފުލުހުން ވަނީ ތަހުގީގު ފަށާފައެވެ. އަދި ނައުޝާދު ވަނީ ކޯޓު އަމުރަކާ އެކު 15 ދުވަހަށް ބަންދުކޮށްފައެވެ. މިފަހަރު ނައުޝާދުގެ ބަންދަށް އިސްގާޒީ އާދަމް މުހައްމަދު ވަނީ 15 ދުވަސް ޖަހާފައެވެ. މި މައްސަލައިގައި އިތުރު ތަފްސީލު ލިބުމުން އާންމުކުރާނެ ކަމަށް ފުލުހުން ވަނީ ބުނެފައެވެ.