ގައުމީ އެއާލައިން، މޯލްޑިވިއަނުން ވައިޑް ބޮޑީ އެއާކްރާފްޓް ގެންނަ ދުވަހާ ދިމާކޮށް ބާއްވަން ހަމަޖެހިފައިވާ އެއާޝޯގެ ފޮޓޯ އާއި ވީޑިއޯ ނަގައިގެން ގިނަ އިނާމުތަކެއް ލިބޭ މުބާރާތެއް ބާއްވަން ނިންމައިފި އެވެ. މި މުބާރާތް ބާއްވަނީ ރާއްޖެއަށް ގެންނަން ހަމަޖެހިފައިވާ އެއާބަސް އޭ330-200 މަރުކާގެ ބޯޓު ގެނައުމާ ގުޅިގެންނެވެ.
މޯލްޑިވިއަނުން އިއްޔެ "އެކްސް" ގައި ކުރި ޕޯސްޓެއްގައި ބުނެފައިވަނީ އެއާޝޯގެ ފޮޓޯ ނުވަތަ ވީޑިއޯ ނަގައިގެން، ދެ މީހަކަށް ބޮޑެތި އިނާމު ހޯދުމުގެ ފުރުސަތު ލިބޭނެ ކަމަށެވެ. އެއާ ޝޯ އިވެންޓް ކުރިއަށްދާނީ މި އަންނަ ހޯމަ ދުވަހުގެ ހަވީރު 5:00 އިން ފެށިގެން 5:30 އަށެވެ.
މުބާރާތުގައި ބައިވެރިވެވޭނީ އެއާޝޯގެ ފޮޓޯ ނުވަތަ ވީޑިއޯ އިންސްޓަގްރާމް، ފޭސްބުކް ނުވަތަ ޓްވިޓާގައި ޕޯސްޓްކޮށްގެންނެވެ. ޕޯސްޓުކުރާ ފޮޓޯ ނުވަތަ ވީޑިއޯގެ ޓެގްގައި
- @maldivianaero އަދި
- #maldivianAeroAirshow ހޭޝްޓެގް ބޭނުން ކުރަންވާނެއެވެ.
މުބާރާތުގެ އިނާމުތަކުގެ ތެރޭގައި ހިމެނެނީ:
1. ދެ މީހަކަށް އެއާ ޓްރާންސްފާ ހިމެނޭ ގޮތަށް 5 ތަރީގެ ރިސޯޓެއްގައި ދެ ރޭ ފުލް ބޯޑުގައި ހުރުން އަދި އާ އެއާކްރާފްޓްގެ ދަތުރެއް
2. ދެ މީހަކަށް ޓްރިވެންޑްރަމް ނުވަތަ ކޮޗިންއަށް ދަތުރު ކުރުމުގެ ޓިކެޓް އަދި އާ އެއާކްރާފްޓްގެ ދަތުރެއް
3. އިހުތިޔާރުކުރާ ރާއްޖޭގެ ރަށަކަށް ދެ މީހަކަށް ދަތުރު ކުރުމުގެ ޓިކެޓް އަދި އާ އެއާކްރާފްޓްގެ ދަތުރެއް
މޯލްޑިވިއަނުން ބުނެފައިވަނީ އިންސާފުކުރުމުގައި ބަލާނީ ފޮޓޯ ނުވަތަ ވީޑިއޯގެ އުފެއްދުންތެރި ކަމަށާއި އޮރިޖިނަލިޓީގެ އިތުރުން އެންގޭޖްމަންޓްގެ ގޮތުގައި އެ ޕޯސްޓަކަށް ލިބިފައިވާ ލައިކްގެ އަދަދަށް ކަމަށެވެ.
މުބާރާތުގެ ފޮޓޯ އަދި ވީޑިއޯ ހުށަހެޅުމުގެ އެންމެފަހު ވަގުތަކީ އަންނަ ހަފުތާގެ ބުރާސްފަތި ދުވަހެވެ. ވަނަ ލިބޭ މީހުން އިއުލާނު ކުރާނީ އެ ހަފުތާގެ ހޮނިހިރު ދުވަހު އެވެ.