މާދަމާ ވެލާނާ އިންޓަނޭޝަނަލް އެއަރޕޯޓަށް ބާރުބޮޑުވާނެތީ، ދަތުރުކުރާ ފަރާތްތަކުން ދުރާލާ އެއަރޕޯޓަށް ދިޔުމަށް މޯލްޑިވްސް އެއަރޕޯޓް ކޮމްޕެނީ ލިމިޓެޑް (އެމްއޭސީއެލް) އިން އިލްތިމާސްކޮށްފިއެވެ.
އެމްއޭސީއެލުން މިގޮތަށް އިލްތިމާސްކޮށްފައި މިވަނީ މިދުވަސްވަރަކީ ޕީކް ސީޒަނަށް ވެފައި، ޑިސެމްބަރުމަހު ޢުމްރާގެ އަޅުކަމަށްދިޔަ ދިވެހިން މާދަމާ އެނބުރި އަންނަން ފަށާފައިވާތީއެވެ.
އެމްއޭސީއެލްއިން ދެއްވި މަޢުލޫމާތުގައިވާ ގޮތުން، މާދަމާ ހެނދުނު 6:00 އިން 9:00 އާ ހަމައަށް ގާތްގަނޑަކަށް 2,678 މީހުން ރާއްޖެ އައުމަށް ހަމަޖެހިފައިވާއިރު، އޭގެ ތެރޭގައި 618 ޢުމްރާވެރިން ހިމެނެއެވެ. އަދި މެންދުރު 14:00 އިން 16:00 އަކާ ދެމެދު 2,071 މީހުން ރާއްޖެއައުމަށް ހަމަޖެހިފައިވާއިރު އޭގެ ތެރޭގައި 452 ޢުމްރާވެރިން ހިމެނޭކަމަށް އެކުންފުނިން ވަނީ ބުނެފައެވެ.
އެމްއޭސީއެލްއިން ވިދާޅުވީ، ޢުމްރާއަށްދިޔަ ދިވެހިން އެނބުރި ޤައުމަށް އަންނަން ފަށާތީ، މާދަމާއަކީ ވީއައިއޭގެ މަގުތަކާއި، ޓަރމިނަލް ސަރަހައްދަށް ބާރުބޮޑު ދުވަހަކަށްވާނެ ކަމަށެވެ. އެހެންކަމުން އެއަރޕޯޓަށް ފުރަންދާ ފަރާތްތަކުން، ފުރުމަށް ކަނޑައެޅިފައިވާ ވަގުތުގެ އެންމެ ލަސްވެގެން 3 ގަޑިއިރު ކުރިން އެއަރޕޯޓަށް ދިއުމަށް އެމްއޭސީއެލުން ވަނީ ބާރުއަޅާފައެވެ.
އެއަރޕޯޓުގެ އޮޕަރޭޝަންތައް ވީހާވެސް ފަސޭހަކަމާއެކު ކުރިއަށްގެންދިއުމަށްޓަކައި، އެއަރޕޯޓް ސްޓާފުން ދެއްވާ އިރުޝާދާއެއްގޮތަށް އަމަލުކުރުމަށް އާންމުންގެ ފަރާތުން އެކުންފުނިން ވަނީ އެދިފައެވެ.
އިސްލާމީ ކަންތައްތަކާ ބެހޭ ވުޒާރާއިން ހާމަކުރައްވާފައިވާ ގޮތުގައި، މިދިޔަ ޑިސެމްބަރުމަހަކީ ފަހުގެ ތާރީޚެއްގައި ރިކޯޑް ޢަދަދަކަށް ދިވެހިން ޢުމްރާގެ އަޅުކަމަށް ދިޔަ މަހެކެވެ. އެގޮތުން މިފަހަރު އެކި ކުންފުނިތަކުގެ ޙަވާލުގައި 6,300 އަށްވުރެ ގިނަ ދިވެހިން ޢުމްރާގެ އަޅުކަމަށް ގޮސްފައިވާކަމަށް އެ ވުޒާރާއިން ވަނީ ހާމަކޮށްފައެވެ.