ރާއްޖޭގެ ސަރަހައްދަށް މިހާރު ކުރަމުންދާ ވިއްސާރައިގައި ބައެއް ރަށްތަކުގައި ފެންބޮޑުވުމާއި ގުޅިގެން، ޤައުމީ ދިފާޢީ ބާރުން (އެމްއެންޑީއެފް) އެހީތެރިކަން ފޯރުކޮށްދޭން ފަށައިފިއެވެ. މިހާތަނަށް ހާމަކޮށްފައިވާ މަޢުލޫމާތުތަކަށް ބަލާއިރު، މިވަގުތު 4 ރަށެއްގައި ފެން ބޮޑުވެގެން އެމްއެންޑީއެފްއިން ދަނީ އެހީތެރިކަން ފޯރުކޮށްދެމުންނެވެ.
ށ. ނަރުދޫގައި ރަށުތެރެއަށް އުދައެރުމާއެކު ފެންބޮޑުވެފައިވުމުން، އެމްއެންޑީއެފް ނޮދަން އޭރިއާ ކޮމާންޑުން ދަނީ ފެން ހިންކުމުގެ މަސައްކަތް ކުރަމުންނެވެ. މީގެ އިތުރުން ދ. ކުޑަހުވަދޫ އަދި ފ. ނިލަންދޫގައި ފެންބޮޑުވެގެން އެހީތެރިކަން ފޯރުކޮށްދެމުންދަނީ އެމްއެންޑީއެފް ސެންޓްރަލް އޭރިއާ ކޮމާންޑުންނެވެ. އަދި އދ. މާމިގިލީގައި ފެންބޮޑުވެގެން އެހީތެރިކަން ފޯރުކޮށްދެނީ އދ. މާމިގިލި ފަޔަރ ސްޓޭޝަނުން ކަމަށް އެމްއެންޑީއެފްއިން ވިދާޅުވެއެވެ.
އިރުވައި މޫސުން ފެށުމާއެކު ރާއްޖޭގެ ބޮޑު ސަރަހައްދަކަށް މިހާރު ބޯކޮށް ވާރެވެހި ދަނީ ވިއްސާރަކުރަމުންނެވެ. މޫސުމާއި ބެހޭ ޤައުމީ އިދާރާއިން ވިދާޅުވެފައިވާ ގޮތުގައި ބައެއް ރަށްތަކަށް އުދައެރުން އެކަށީގެންވެއެވެ. މިވޭތުވެދިޔަ 24 ގަޑިއިރަށް ބަލާއިރު އެންމެ ގިނައިން ވާރޭވެހިފައިވަނީ ލ. ކައްދޫއަށް ކަމަށާއި، އެރަށަށް 87.0 މިލިމީޓަރުގެ ވާރޭ ވެހިފައިވާކަމަށް ރެކޯޑުކުރެވިފައިވާކަމަށް މެޓް އޮފީހުން ވިދާޅުވެއެވެ.
މޫސުން ގޯސްވާނެކަމަށް ލަފާކުރެވޭތީ، ޚާއްޞަކޮށް ކަނޑު ދަތުރުކުރާ ފަރާތްތަކުން އަދި ޢާންމުކޮށް ހުރިހާ އެންމެންވެސް މޫސުމަށް ސަމާލުވުމަށް ކަމާއިބެހޭ އިދާރާތަކުން ވަނީ އިލްތިމާސްކޮށްފައެވެ. މި ވިއްސާރައިގެ ސަބަބުން އިތުރު ރަށްތަކަށް އަސަރުކުރާނަމަ، އެމްއެންޑީއެފްއިން ވަނީ އެހީތެރިކަން ފޯރުކޮށްދިނުމަށް ތައްޔާރަށް ތިބިކަން އަންގާފައެވެ.