ރާއްޖެއަށް އެހީތެރިކަން އެންމެ ބޮޑަށް ބޭނުންވާ ދަނޑިވަޅުގައި އިންޑިއާއިން އަބަދުވެސް އެހީތެރިކަން ފޯރުކޮށްދެނީ ދެ ޤައުމުގެ ދެމެދު އޮތް ވަރުގަދަ ގުޅުމުގެ ސަބަބުންކަމަށް އިންޑިއާގެ އެކްސްޓާނަލް އެފެއާޒް މިނިސްޓަރ ޑރ. އެސް ޖައިޝަންކަރު ވިދާޅުވެއްޖެއެވެ.
ޖައިޝަންކަރު މިހެން ވިދާޅުވީ އިއްޔެ ނިއު ދިއްލީގައި ދިވެހިރާއްޖޭގެ ޚާރިޖީ ވަޒީރު ޑރ. އަބްދުﷲ ހަލީލާއެކު ބޭއްވެވި ބައްދަލުކުރެއްވުމުގައެވެ. މި ބައްދަލުވުމުގައި ޖައިޝަންކަރު ވިދާޅުވީ އިންޑިއާގެ ނެއިބަރހުޑް ފަސްޓް ޕޮލިސީގެ ދަށުން އެހީތެރިކަން ފޯރުކޮށްދިނުމުގައި ރާއްޖެއަކީ މިސާލެއްކަމަށާއި، އިންޑިއާއިން އަބަދުވެސް އޮންނާނީ ރާއްޖެއާއެކުކަމަށެވެ.
އިންޑިއާގެ ޚާރިޖީ ވަޒީރު އިތުރަށް ވިދާޅުވީ، “އިޤްތިޞާދީގޮތުން އުނދަގޫ މި ދަނޑިވަޅުގައިވެސް އިންޑިއާއިން މާލީގޮތުން ރާއްޖެއަށް އެހީތެރިކަން ފޯރުކޮށްދީފައިވޭ. އަދި ރާއްޖެއަށް ބޭނުންވާ އަސާސީ މުދާވެސް އެއްވެސް ދަތިކަމެއް ނެތި އިންޑިއާއިން ފޯރުކޮށްދެމުންދޭ.”
ދިވެހިރާއްޖޭގެ ޚާރިޖީ ވަޒީރު ޑރ. އަބްދުﷲ ހަލީލް ވިދާޅުވީ، އިންޑިއާއާއިއެކު ސިޔާސީގުޅުން ގާއިމްކުރިތާ 60 އަހަރު ފުރިފައިވާކަމަށާއި، އިންޑިއާގެ ގުޅުމަކީ ރާއްޖެއަށް މުހިންމު ގުޅުމެއްކަމަށެވެ. އަދި ރާއްޖެއިން އެހީތެރިކަން ބޭނުންވެއްޖެ ކޮންމެ ހިނދެއްގައިވެސް އެންމެ ފުރަތަމަ އެހީތެރިކަން ދޭ ޤައުމަކީ އިންޑިއާކަންވެސް އެމަނިކުފާނު ފާހަގަކުރެއްވިއެވެ.
މި ބައްދަލުވުމުގައި ދެ ޤައުމުގެ ދެމެދުގައި ކުރެވޭ ވިޔަފާރީގައި އަމިއްލަ ފައިސާ ބޭނުންކުރުމާއި ގުޅޭ އެއްބަސްވުމެއް ޤާއިމްކުރެވިފައިވާކަމާއި، އެކި ދާއިރާތަކުން ގުޅިގެން ކުރެވޭ މަސައްކަތްތައް އިތުރުވެފައިވާކަންވެސް ފާހަގަކުރެވުނެވެ.
ޑރ. ހަލީލްގެ މި ދަތުރުފުޅަކީ މިދިޔަ ސެޕްޓެމްބަރުމަހުގެ 30 ވަނަ ދުވަހު މަޤާމާއި ޙަވާލުވެވަޑައިގަތުމަށްފަހު އިންޑިއާއަށް ކުރައްވާ ފުރަތަމަ ދަތުރުފުޅެވެ. މި ދަތުރުފުޅުގައި ދެ ޤައުމުގެ ގުޅުން އެކި ދާއިރާތަކުން އިތުރަށް ފުޅާކޮށް، ބަދަހިކުރުމަށް މަޝްވަރާކުރެއްވުމަށް ވަނީ ހަމަޖެހިފައެވެ.