މިއަދު މެންދުރު ފަހު ކުއްލިއަކަށް މޫސުން ގޯސްވުމާ ގުޅިގެން ވެލާނާ އިންޓަރނޭޝަނަލް އެއަރޕޯޓުގެ (ވީއައިއޭ) އޮޕަރޭޝަންތަކަށް ބޮޑެތި ދަތިތަކެއް ކުރިމަތިވެ، ގިނަ އަދަދެއްގެ ފްލައިޓުތަކެއް ލަސްވެގެން ގޮސްފިއެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ޗީފް ކޮމާޝަލް އޮފިސަރ މުޙައްމަދު މިހާދު ވިދާޅުވި ގޮތުގައި، ވިއްސާރައާއި ވައި ގަދަވުމުގެ ސަބަބުން އެއަރޕޯޓުގެ އާންމު އޮޕަރޭޝަންތަކަށް ވަރަށް ބޮޑެތި ދަތިތަކެއް ކުރިމަތިވެފައިވެއެވެ. އޭގެ ތެރޭގައި ބައެއް ފްލައިޓުތައް ލަސްވުމާއި، ލަސްވެފައިވާ ފްލައިޓުތައް އެއް ވަގުތެއްގައި ޖައްސަން އައުމުން ދިމާވި ދަތިތައް ހިމެނެއެވެ.
މީގެ އިތުރުން، ވައިގެ ބާރުގަދަވުމުގެ ސަބަބުން ސީޕްލޭން އޮޕަރޭޝަންތަކަށްވެސް ބުރޫ އަރައި، އެ ފްލައިޓުތައްވެސް ލަސްވެގެން ގޮސްފައިވާކަމަށް މިހާދު ވިދާޅުވިއެވެ. ނަމަވެސް، މި ހުރިހާ ދަތިތަކަށްވެސް އަވަސް ޙައްލުތަކެއް ހޯދިފައިވާކަމަށް އޭނާ ފާހަގަކުރެއްވިއެވެ.
މި ދަތިތަކާ އެކުވެސް، ސްކޫލު ބަންދު ނިމި ދަރިވަރުން އެނބުރި އައުމާއި، އުމްރާއަށް ގޮސްފައިވާ ފަރާތްތައް އަނބުރާ އައުމާ ގުޅިގެން އެއަރޕޯޓު ޓާމިނަލް ތެރޭގައި ވަރަށް ބޮޑަށް ތޮއްޖެހުން އުފެދިފައިވާކަން އެމްއޭސީއެލްއިން ފާހަގަކުރިއެވެ. އަދި މާދަމާއަކީވެސް ރާއްޖެއަށް ގިނަ އަދަދެއްގެ ފަތުރުވެރިންނާއި އުމްރާވެރިން އަންނަން ހަމަޖެހިފައިވާ ދުވަހަކަށްވާތީ، ވީހާވެސް މަދު ބަޔަކު އެއަރޕޯޓަށް ފަސިންޖަރުން ބަލާ ދިއުމަށް އެމްއޭސީއެލްއިން ވަނީ އިލްތިމާސްކޮށްފައެވެ.