މިހާރު ރާއްޖެއަށް ކުރަމުންދާ ވިއްސާރައިގައި މިއަދު މާލެއަށް ބޯކޮށް ވާރޭ ވެހި މުޅި މާލޭގައި ފެންބޮޑުވެފައިވާތީ ފެން ހިންދުމުގެ މަސައްކަތުގެ ތެރެއިން 10،000 އެއްހާޓަންގެ ފެން މާލެއިން ބޭރުކޮށްފައިވާއިރު 35 ގެއެއްގެ މީހުންނަށް އެހީތެރިވުމާއި އެހެން ތަންތަނަށް ބަދަލުކުރަން ޖެހޭ މީހުން ބަދަލުކުރުމުގެ މަސައްކަތްވެސް ކުރިކަމަށް ފަށައިފިކަމަށް ނޭޝަނަލް ޑިޒާސްޓަރ މެނޭޖްމަންޓް ސެންޓަރުން ހާމަކޮށްފިއެވެ.
ޑިޒާސްޓަރ މެނޭޖްމަންޓް އޮތޯރިޓީން ބުނިގޮތުގައި ވެލިބަސްދާ ޖެހުމަށާއި އެކި ގޮތްގޮތުން އެހީތެރިކަން ބޭނުންވެގެން 400 އަށްވުރެ ގިނަ ކޯލް އެ އޮތޯރިޓީއަށް ލިބިފައިވެއެވެ. އަދި ރެޕިޑް އެސެސްމަންޓް ހެދުމަށްފަހު ބޮޑަށް އެހީތެރިކަން ބޭނުންވާ 35 ގެއެއްގެ މީހުންނަށް އެހީތެރިވުމާއި އެހެން ތަންތަނަށް ބަދަލުކުރަން ޖެހޭ މީހުން ބަދަލުކުރުމުގެ މަސައްކަތް ކުރިއަށްދާ ކަމަށް އެ އޮތޯރިޓީން ސޯޝަލް މީޑިއާގައި ހާމަކޮށްފައިވެއެވެ.
މުޅި މާލޭގައި ފެންބޮޑުވުމުގެ ސަބަބުން ސިފައިންނާއި ނޭޝަނަލް ޑިޒާސްޓަރ މެނޭޖްމަންޓް ސެންޓަރުގެ އިތުރުން ސަރުކާރުގެ އެކި ކުންފުނިތަކުން ވެސް ދަނީ އަމަލީގޮތުން މި މަސައްކަތުގައި ބައިވެރިވަމުންނެވެ. އެގޮތުން މޯލްޑިވްސް ޕޯޓްސް ލިމިޓެޑްގެ މުވައްޒަފުންނާއި އެ ކުންފުނީގެ ސީއީއޯ ވެސް ދަނީ ފެން ހިންދުމުގެ މަސައްކަތުގައި ބައިވެރިވަމުންނެވެ.
މާލޭ ސިޓީ ކައުންސިލުން ވެސް ވަނީ މާލޭގެ 3 ސަރަހައްދެއްގައި 9 ޕަންޕް ބޭނުންކޮށްގެން ފެން ހިންދުމުގެ މަސައްކަތް ފަށާފައެވެ. އަދި އެމްއެންޑީއެފުން ދަނީ 6 ސަރަހައްދެއްގައި 16 ޕަންޕް ބަހައްޓައިގެން ފެން ހިންދުމުގެ މަސައްކަތް ކުރަމުންނެވެ. މިރޭގެ 8:30 އާ ހަމައަށް 9,917 ޓަނުގެ ފެން ހިއްކާފައިވާ ކަމަށް އެމްއެންޑީއެފުން މަޢުލޫމާތު ދީފައިވެއެވެ.
މޫސުމާ ބެހޭ އިދާރާއިން ވަނީ މިރޭ 23:00 އިން ފެށިގެން މާދަމާ ފަތިހު 4:00 އަށް ނ. އަތޮޅުން ފެށިގެން ލ. އަތޮޅަށް ބޯކޮށް ވާރޭވެހި، ވިލާގަނޑުގައި ގަޑިއަކު 40 މޭލަށް ވައިގަދަވެ ކަނޑުތައް ގަދަވާނެ ކަމަށް ލަފާކޮށް ރީނދޫ ސަމާލުކަން ނެރެފައެވެ.