ރަސްމާލެ މަޝްރޫޢުގެ ބިން ހިއްކުމުގެ މަސައްކަތް އަވަސްކުރުމަށްޓަކައި އިތުރު ޑްރެޖަރުތަކެއް ގެނެސް، މި އަހަރު މަސައްކަތުގެ ދުވެލި ދެތިން ގުނައަށް ހަލުވި ކުރެވޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މިހެން ވިދާޅުވީ މިއަދު ގުޅިއަށް ކުރެއްވި ދަތުރުފުޅެއްގައި އެ ރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
“ބިން ހިއްކުމުގެ މަސައްކަތް އަވަސްކުރުމަށް އިތުރު ކޮންޓްރެކްޓަރުން ހޯދުމުގެ މަސައްކަތް މިދަނީ ކުރަމުން. އޭރުން އެއްފަހަރާ ގިނަ ޑްރެޖަރުތައް ބޭނުންކޮށް މަސައްކަތްތައް ފެށި، ބިން ހިއްކުން 2 ގުނަ ނުވަތަ 3 ގުނައަށް އަވަސްކުރެވޭނެ،” ރައީސުލްޖުމްހޫރިއްޔާ ވިދާޅުވިއެވެ.
ރަސްމާލެ މަޝްރޫޢަކީ ރާއްޖެއަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް އެއް ސަރަޙައްދަކުން އެންމެ ބޮޑު ޙައްލެއް ލިބޭނެ މަޝްރޫޢު ކަމަށް ރައީސް މުޢިއްޒު ވިދާޅުވިއެވެ. މި މަޝްރޫޢުގެ ސަބަބުން މުޅި ރާއްޖެއަށާއި ރަސްމާލެ ހިމެނޭ ސަރަޙައްދަށް ގިނަގުނަ ފައިދާތަކެއް ކުރާނެ ކަމުގެ ޔަޤީންކަން އެމަނިކުފާނު ދެއްވިއެވެ.
މީގެ އިތުރުން، 2025 ވަނަ އަހަރަކީ “ބޯހިޔާވަހިކަމުގެ އަހަރު” ގެ ގޮތުގައި ފާހަގަކުރައްވާނެ ކަމަށް ރައީސް މުޢިއްޒު ވިދާޅުވިއެވެ. އެގޮތުން މާލެ ފިޔަވައި ރާއްޖޭގެ އެހެން ހުރިހާ ސަރަޙައްދެއްގައި ހިންގުމަށް ވަޢުދުވެވަޑައިގެންފައިވާ ބޯހިޔާވަހިކަމުގެ މަޝްރޫޢުތައް ތަންފީޒުކުރާނެ ފަރާތްތައް ހޯދުމަށް މި މަހޯދުމަށް މި މަހުގެ ތެރޭގައި އިޢުލާންކުރައްވާނެ ކަމަށްވެސް އެމަނިކުފާނު ވިދާޅުވިއެވެ.
ރައީސް މުޢިއްޒު ވިދާޅުވީ މި އަހަރަކީ ތަރައްޤީގެ ޢަމަލީ މަސައްކަތާއި މާލީ ތަނަވަސްކަން އިޙްސާސްކޮށްދިނުމުގެ މަސައްކަތްތައް ފުޅާ ދާއިރާއެއްގައި ހިނގާނެ އަހަރެއް ކަމަށެވެ. އަދި ވާރުތަވި އިޤްތިޞާދީ ގޮންޖެހުންތަކާ އެކުވެސް، މިދިޔަ އަހަރު ދުވަހުގެ ތެރޭގައި ހަރުދަނާކުރެއްވި އިޤްތިޞާދީ ބިންގަލުގެ މަތީގައި ޤައުމު ބިނާކުރައްވަމުން ގެންދަވާނެ ކަމުގެ ޔަޤީންކަން ރައްޔިތުންނަށް ދެއްވިއެވެ.