\ބްރެޒިލްގެ މޮޑެލެއްގެ ފޮޓޯތަކެއް ބޭނުންކޮށްގެން 700 އަންހެނުންނަށް އޮޅުވާލައި، އެމީހުންގެ އަތުން ބަރަހަނާ ފޮޓޯ އާއި ވީޑިއޯ ހޯދައި، ބްލެކްމެއިލްކޮށް ފައިސާ އަތުލި އިންޑިއާގެ 23 އަހަރުގެ ފިރިހެނަކު ހައްޔަރުކޮށްފިއެވެ.
ދިއްލީ ޕޮލިސް ޑެޕިއުޓީ ކޮމިޝަނަރ (ވެސްޓް) ވިޗިތްރާ ވީރު ވިދާޅުވި ގޮތުގައި ތުޝާރު ބިޝްޓް ނަމަކަށް ކިޔާ މި ފިރިހެނާ ހައްޔަރުކޮށްފައިވަނީ ބަމްބަލް އާއި ސްނެޕްޗެޓް ފަދަ އޮންލައިން ޕްލެޓްފޯމްތައް ބޭނުންކޮށްގެން އަންހެނުންނަށް އޮޅުވާލައި، އެމީހުންގެ އަތުން ޕްރައިވެޓް ފޮޓޯ އާއި ވީޑިއޯ ހޯދައި، ބްލެކްމެއިލްކޮށް ފައިސާ އަތުލުމުގެ ތުހުމަތުގައެވެ.
ބިޝްޓް ވަނީ އެމެރިކާގައި އުޅޭ ފްރީލާންސް މޮޑެލެއްގެ ގޮތުގައި ދައްކައި، ބްރެޒިލްގެ މޮޑެލެއްގެ ފޮޓޯތަކެއް ބޭނުންކޮށްގެން ދޮގު ޕްރޮފައިލްތަކެއް ހަދައި، ވާޗުއަލް އިންޓަނޭޝަނަލް ފޯނު ނަންބަރެއް ބޭނުންކޮށްގެން 18 އަހަރާއި 30 އަހަރާ ދެމެދުގެ އަންހެނުންނާ ގުޅުން ބަދަހިކޮށްފައެވެ. އޭނާގެ މައިގަނޑު ޓާގެޓަކަށްވެފައިވަނީ ބަމްބަލް، ސްނެޕްޗެޓް އަދި ވަޓްސްއެޕް ބޭނުންކުރާ މީހުންނެވެ.
ފުލުހުން ބުނާ ގޮތުގައި ބިޝްޓް ވަނީ އޭނާގެ ޝިކާރައަށްވިކާރައަށްވި މީހުންނާ ވާހަކަދައްކައި، އިތުބާރު ހޯދައި، އެމީހުންގެ އަތުން އިންޓިމެޓް ފޮޓޯ އާއި ވީޑިއޯ ހޯދައި، އެ ތަކެތި އިންޓަނެޓަށް ލީކްކޮށްލާނެ ކަމަށް ބުނެ ނުވަތަ ޑާކް ވެބަށް ވިއްކާލާނެ ކަމަށް ބުނެ ބްލެކްމެއިލްކޮށްފައެވެ.
މި މައްސަލަ ހާމަވެގެން ދިޔައީ ޑިސެމްބަރު 13 ވަނަ ދުވަހު ދިއްލީ ޔުނިވަރސިޓީގެ ދަރިވަރަކު ސައިބަރ ޕޮލިސް ސްޓޭޝަނަށް ހުށަހެޅި ޝަކުވާއަކާ ގުޅިގެންނެވެ. ބިޝްޓް ވަނީ ބަމްބަލްގައި އެ ދަރިވަރާ ބައްދަލުވެ، އޭނާއަކީ މަސައްކަތަކަށް އިންޑިއާއަށް އައިސްހުރި އެމެރިކާގެ މޮޑެލެއް ކަމަށް ބުނެ އޮޅުވާލައި، އޭނާގެ އަތުން ޕްރައިވެޓް ފޮޓޯ އާއި ވީޑިއޯ ހޯދައި، ފަހުން އެ ތަކެތި ބޭނުންކޮށްގެން ބްލެކްމެއިލްކޮށްފައެވެ.
ބިޝްޓް ހައްޔަރުކޮށްފައިވަނީ ދިއްލީގެ ޝަކަރްޕުރު ސަރަހައްދުންނެވެ. އޭނާގެ ފޯނުން ފުލުހުންނަށް ވަނީ ގިނަ އަދަދެއްގެ އަންހެނުންގެ ޕްރައިވެޓް ކޮންޓެންޓް އަދި 13 ކްރެޑިޓް ކާޑު ފެނިފައެވެ
ފުލުހުން ބުނާ ގޮތުގައި ބިޝްޓް ވަނީ މިފަދަ ޢަމަލުތައް ހިންގަން ފަށާފައިވަނީ ދެ އަހަރެއްހާ ދުވަސް ކުރިން، އެޕްލިކޭޝަނެއް މެދުވެރިކޮށް ހޯދި ބޭރު ޤައުމެއްގެ ފޯނު ނަންބަރެއް ބޭނުންކޮށްގެންނެވެ. އޭނާ ފުރަތަމަ މިކަން ކުރަން ފެށީ މަޖާއަކަށް ކަމަށާއި، ނަމަވެސް ފަހުން މިއީ ފައިސާ ހޯދުމުގެ ގޮތުން ރޭވިގެން ކުރި ކަމެއްގެ ގޮތުގައި ބަދަލުވެގެން ދިޔަ ކަމަށް ވިޗިތްރާ ވީރު ވިދާޅުވިއެވެ.
ތުޝާރު ބިޝްޓްގެ ޢާއިލާއާ ބެހޭ ގޮތުން ލިބިފައިވާ މަޢުލޫމާތުތަކަށް ބަލާއިރު، އޭނާއަކީ ޝަކަރްޕުރުގައި ދިރިއުޅޭ މެދު ފަންތީގެ ޢާއިލާއަކަށް ނިސްބަތްވާ ފަރާތެކެވެ. އޭނާގެ ބައްޕައަކީ ޑްރައިވަރެއް ކަމަށާއި މަންމައަކީ ގޭގައި ހުންނަ މީހެއް ކަމަށް ބުނެއެވެ. އަދި އޭނާގެ ދައްތަ ގުރުގާމްގައި ހުންނަ ކުންފުންޏެއްގައި މަސައްކަތް ކުރާ ކަމަށްވެސް މަޢުލޫމާތު ލިބެއެވެ.
ތުޝާރު ބިޝްޓްއަކީ ބީބީއޭ ފުރިހަމަކޮށްފައިވާ ފަރާތެއް ކަމަށާއި، ވޭތުވެދިޔަ ތިން އަހަރު ވަންދެން ނޮއިޑާގައި ހުންނަ އަމިއްލަ ކުންފުންޏެއްގައި ޓެކްނިކަލް ރެކްރޫޓަރެއްގެ ގޮތުގައި މަސައްކަތް ކޮށްފައިވާ ކަމަށް ބުނެއެވެ.
މި މައްސަލައިގައި ފުލުހުން ދަނީ އިތުރަށް ތަޙްޤީޤު ކުރަމުންނެވެ. އަދި އިތުރު ޝިކާރައަކަށްވެފައިވާ ފަރާތްތަކެއް ހުރިތޯ ބަލަމުންދާ ކަމަށް ފުލުހުން ބުނެއެވެ. މީގެ އިތުރުން، އޮންލައިން ޕްލެޓްފޯމްތައް ބޭނުންކުރާއިރު ރައްކާތެރިވުމަށް އާންމުންނަށް އިލްތިމާސްކޮށް، މިފަދަ ކަންކަމުން ސަލާމަތްވުމަށް އަޅަންޖެހޭ ފިޔަވަޅުތަކާ ބެހޭ ގޮތުން ހޭލުންތެރިކަން އިތުރުކުރުމުގެ މަސައްކަތްތަކެއް ކުރިއަށް ގެންދިއުމަށް ވެސް ފުލުހުން ވަނީ ނިންމާފައެވެ.
މި ހާދިސާއިން ދައްކުވައިދެނީ އޮންލައިން ޕްލެޓްފޯމްތަކުގައި އެކަށީގެންވާ ސަމާލުކަމެއް ނުދީ އުޅުމުން ކުރިމަތިވެދާނެ ނުރައްކާތަކެވެ. އަދި އަމިއްލަ މަޢުލޫމާތު އަދި ފޮޓޯ ފަދަ ތަކެތި އެއްވެސް މީހަކާ ހިއްސާކުރުމުގައި ވަރަށް ބޮޑަށް ވިސްނުމަށް ތަޖުރިބާކާރުން އިލްތިމާސްކުރެއެވެ.