މޯލްޑިވިއަނުން ރާއްޖޭގެ 29 މަންޒިލަކަށް އަހަރަކު 50،000 އަށް ވުރެ ގިނަ ފްލައިޓް އޮޕަރޭޓް ކުރަމުންދާ ކަމަށް އައިލެންޑް އޭވިއޭޝަން ސާވިސްގެ މެނޭޖިންގ ޑިރެކްޓަރު އިބްރާހިމް އިޔާސް ވިދާޅުވެއްޖެއެވެ.
މޯލްޑިވިއަނުން މިއަދު ބޭއްވި ހާއްސަ ރަސްމިއްޔާތެއްގައި ވާހަކަފުޅު ދައްކަވަމުން އިޔާސް ވިދާޅުވީ، މިވަގުތު ކުންފުނީގެ ފްލީޓުގައި 24 މަތިންދާ ބޯޓު ބޭނުންކުރަމުންދާ ކަމަށާއި، އަހަރެއްގެ މައްޗަށް 1 މިލިއަނަށް ވުރެ ގިނަ ފަސިންޖަރުން އުފުލަމުންދާ ކަމަށެވެ.
އިޔާސް ވިދާޅުވި ގޮތުގައި، ކުންފުނީގެ ތާރީޚަށް ބަލާއިރު، އެންމެ ފުރަތަމަ އޮޕަރޭޓް ކުރެވުނީ ޑޯނިއާ 228 މަރުކާގެ މަތިންދާ ބޯޓަކާއި ޑޭޝް8 މަރުކާގެ މަތިންދާ ބޯޓެކެވެ. އޭރު ރާއްޖޭގައި އޮތީ އެންމެ 4 އެއާޕޯޓެވެ. 2008 ވަނަ އަހަރު ފެށުނު ބައިނަލްއަޤުވާމީ ވައިގެ ދަތުރުތައް 2012 އަދި 2015 ވަނަ އަހަރު ކުންފުންޏަށް ގެނެވުނު އެއާބަސް އޭ320 މަރުކާގެ މަތިންދާ ބޯޓާއެކު ފުޅާކުރެވިގެންދިޔައެވެ.
ފަތުރުވެރިން ރާއްޖެ ގެނައުމުގައި އައިލެންޑް އޭވިއޭޝަނުން މުހިންމު ދައުރެއް އަދާކުރެވިފައިވާކަން އެމްޑީ ފާހަގަކުރެއްވިއެވެ. އަދި މިސަރުކާރުން ހާއްސަ އިސްކަމެއްދީގެން ރާއްޖޭގެ މަދަނީ އުދުހުންތަކުގެ ފެންވަރު ރަނގަޅުކޮށް ގައުމީ އެއާލައިން ކުރިއެރުވުމަށް މަސައްކަތްތައް ކުރަމުން އަންނަކަމަށް އޭނާ ވިދާޅުވިއެވެ.
މީގެ އިތުރުން، މި ސަރުކާރުން އެއާ އެމްބިއުލާންސުގެ ޚިދުމަތް ފަށައިގެން ކުރިޔަށް ގެންދާކަން ފާހަގަކުރައްވަމުން އިޔާސް ވިދާޅުވީ މި ޚިދުމަތާއެކު ބަލި މީހުން ވައިގެ މަގުން އުފުލުމުގައި ދިމާވި ދަތިތަކަށް ހައްލު ގެނެވިފައިވާ ކަމަށެވެ.