ގދ. ހޯނޑެއްދޫގައި ޤާއިމުކުރި ފެނާއި ނަރުދަމާގެ ޚިދުމަތް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު އިފްތިތާޙުކޮށްދެއްވައިފިއެވެ. މި މަޝްރޫޢަކީ އެގްޒިމް ބޭންކް އޮފް އިންޑިއާގެ ލައިން އޮފް ކްރެޑިޓްގެ ދަށުން ކުރިއަށް ގެންދެވުނު މަޝްރޫޢެކެވެ.
ހޯނޑެއްދޫގައި ފެނާއި ނަރުދަމާގެ ޚިދުމަތް ޤާއިމްކުރުމުގެ ޢަމަލީ މަސައްކަތް ފެށިފައިވަނީ 2022 ވަނަ އަހަރުގެ ޖޫން މަހުގެ 13 ވަނަ ދުވަހުއެވެ. މި މަޝްރޫޢުގެ މަސައްކަތް ކުރިއަށް ގެންގޮސްފައިވަނީ އިންޑިއާގެ ކުންފުންޏެއް ކަމަށްވާ ޓްރެވެނީ އިންޖިނިއަރިންގ އެންޑް އިންޑަސްޓްރީސް ލިމިޓެޑުންނެވެ. މި މަޝްރޫޢުއަށް 4.9 މިލިއަނަށްވުރެ ގިނަ އެމެރިކާ ޑޮލަރު ޚަރަދުކޮށްފައިވާކަން ފާހަގަކުރެވެއެވެ.
މި މަޝްރޫޢުގެ ދަށުން ހޯނޑެއްދޫގައި ނަރުދަމާގެ 5 ޕަންޕު ސްޓޭޝަން ޤާއިމުކޮށް، ސީ އައުޓް ފޯލް އަޅައި، މުޅި ރަށުގައި ފެނާއި ނަރުދަމާ ނިޒާމުގެ ވިއުގަ އަޅައި، ގޭގެއަށް ކަނެކްޝަން ގުޅާފައިވެއެވެ. މީގެ އިތުރުން، ދުވާލަކު 75 ޓަނުގެ ފެން އުފެއްދޭ ވަރުގެ 2 އާރުއޯ ޕްލާންޓް ބަހައްޓައި، ފެން ރައްކާކުރުމަށް 2 ޓޭންކު ވަނީ ބަހައްޓާފައެވެ.
އާބާދީގައި 800 އެއްހާ މީހުން ދިރިއުޅެމުންދާ ހޯނޑެއްދޫއަކީ މީގެ ކުރިން ރައްކާތެރި ނަރުދަމާއެއް ނެތުމުގެ ސަބަބުން ވިއްސާރަ މޫސުމުގައި ޖަންކްޝަން މައްސަލަ ކުރިމަތިވެ ރައްޔިތުންނަށް ގިނަ ތަކުލީފުތަކެއް ކުރިމަތިވަމުން އައި ރަށެކެވެ. ނަމަވެސް، މިހާރު ފެނާއި ނަރުދަމާގެ ޚިދުމަތް ފެށުމާއެކު ރައްޔިތުންގެ މި ތަކުލީފުތަކަށް ނިމުމެއް އަންނާނެކަމަށް ބެލެވެއެވެ.
މި މަޝްރޫޢު އިފްތިތާޙުކުރުމުގެ ރަސްމިއްޔާތުގައި ރައީސުލްޖުމްހޫރިއްޔާގެ އިތުރުން ސަރުކާރުގެ އިސް ވެރިންނާއި ހޯނޑެއްދޫ ރައްޔިތުން ބައިވެރިވެ ވަޑައިގެންނެވިއެވެ.