ގދ. ވާދޫއަކީ ފަޚުރުވެރި މާޒީއެއް އޮތް، ވާދޫދަންނަ ކަލޭގެފާނުންގެ ރަށްކަމަށްވުމުން، މި ރަށުގެ ތަޢުލީމީ ދާއިރާ ކުރިއެރުވުމަށް ސަރުކާރުން އިސްކަންދޭންޖެހޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިފަދައިން ވިދާޅުވެފައިވަނީ ހުވަދު އަތޮޅުގެ ބައެއް ރަށްރަށަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ގދ. ވާދޫއަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
“މި ރަށަކީ ތަޢުލީމީ ރަށެއް. ފަޚުރުވެރި މާޒީއެއް އޮތް ވާދޫދަންނަ ކަލޭފާނުގެ ރަށް. މި ރަށަށް ސަރުކާރުތަކުން ޖެހޭނެ އަހައްމިއްޔަތުކަން ދޭން، ޚާއްޞަކޮށް ތަޢުލީމީ ދާއިރާ ކުރިއަރުވަން. އެއީ އަޅުގަނޑު މި ރަށުގެ ތަޢުލީމީ ދާއިރާއާ ދޭތެރޭގައި ދެކޭ ގޮތް،” ރައީސް ޑރ މުޢިއްޒު ވިދާޅުވިއެވެ.
މީގެއިތުރުން، ވާދޫ ސްކޫލުގެ ތަރައްޤީއަށް ކުރަމުންދާ މަސައްކަތްތައް އަވަސްކުރައްވާނެ ކަމުގެ ޔަޤީންކަން ރައީސް ދެއްވިއެވެ. މިގޮތުން، އިތުރު ކްލާސްރޫމްތަކާއި މަލްޓި ޕާރޕަސް ހޯލެއް އަޅުއްވައިދެއްވާނެ ކަމަށް ވިދާޅުވިއެވެ.
“އަޅުގަނޑު ދޭ ޔަޤީންކަމަކީ ސްކޫލަށް އިތުރުކުރަންޖެހޭ ކްލާސްރޫމް، މަލްޓި ޕާރޕަސް ހޯލް، މި ކަންކަން، މިހާރު ދާންވާ ސްޕީޑުގައި ނުގޮސް ހުއްޓިފައި މި އޮތް މަސައްކަތް ފަށައިގެން، އިރާދަކުރެއްވިއްޔާ ވަރަށް ރަނގަޅަށް ގެންގޮސް ނިންމައި ދޭނަން،” ރައީސް މުޢިއްޒު ވިދާޅުވިއެވެ.
ރައީސްގެ މި ވާހަކަފުޅުން އެނގިގެންދަނީ، ވާދޫގެ ތަޢުލީމީ ދާއިރާއަށް ސަރުކާރުން ޚާއްޞަ ސަމާލުކަމެއް ދެއްވާނެކަމާއި، ރަށުގެ ފަޚުރުވެރި ތާރީޚަށް ބައްލަވައި، ތަޢުލީމީ ދާއިރާ އިތުރަށް ކުރިއެރުވުމަށް މަސައްކަތް ކުރައްވާނެކަމެވެ.