އަނދުންހުލިއަކީ ލޮލުގެ ބޮޑީގައި ނަގާ ކުޑަ، ރިހުން އެކުލެވޭ ރަތް ބިއްސެކެވެ. މިއީ ވަރަށް އާންމު ބައްޔެކެވެ. އަނދުންހުލި އާންމުކޮށް ނަގަނީ ލޮލުގެ އެސްފިޔަތަކުގެ ބުޑުގައި ނުވަތަ ލޮލުގެ ރަވައިގައި ނުވަތަ ލޮލުގެ ބޮޑީގައެވެ.
އަނދުންހުލި ނެގުމުގެ ސަބަބުތައް
އަނދުންހުލި ނެގުމުގެ މައިގަނޑު ސަބަބަކީ ބެކްޓީރިޔާގެ އިންފެކްޝަނެވެ. މީގެ އިތުރުން އަތް ނުދޮވެ ލޮލުގައި އަތްލުމާއި، ރަނގަޅަށް ސާފުނުކުރާ ކޮންޓެކްޓް ލެންސް ބޭނުންކުރުން ފަދަ ކަންކަމުން އަނދުންހުލި ނެގުމަށް މަގުފަހިވެއެވެ. އެހެންކަމުން، މިފަދަ ކަންކަމަށް ސަމާލުވުމަކީ މުހިންމު ކަމެކެވެ.
އަނދުންހެލި ނެގުމަށް މަގުފަހިކުރާ ކަންތައްތަކުގެ ތެރޭގައި އަތްނުދޮވެ ލޮލުގައި އަތްލައި، އުގުޅައި، ހާކައި ހެދުމާއި އަތް ނުދޮވެ، ލޮލަށް ލައްވާ ލެންސްގައި އަތްލުން، ނުވަތަ ރަނގަޅަށް ސާފުނުކޮށް ލެންސް ލޮލަށްލެއްވުމާއި ލޮލުގައި މޭކަޕްގެ އަސަރު ހުއްޓައި، މޭކަޕް ނުފިލުވައި ނިދުން އަދި ދުވަސްވީ ނުވަތަ މުއްދަތު ހަމަވެފައި ހުރި ރީތިވާ ސާމާނު ބޭނުންކުރުން ވެސް ހިމެނެއެވެ. އަދި ލޮލުގެ ބޮޑި ދުޅަވުމުގެ އިތުރުން ރޯޒޭޝާކިޔާ ހަމުގެ ބައްޔެއް ހުރުން އަދި ހަކުރު ބަލި ޖެހުމަކީވެސް އަނދުންހުލި ނެގުމަށް ދިމާވާ ސަބަބުތަކުގެ ތެރެއިން ސަބަބެކެވެ. އަދި ހަމައެހެންމެ ސެބޯރިކް ޑާމަރޓައިޓިސް ކިޔާ ހަމުގެ ބައްޔެއް ހުންނަނަމަވެސް އަނދުންހުލި ނަގައިފާނެއެވެ.
އަނދުންހުލީގެ ފަރުވާ
އާންމު ގޮތެއްގައި އަނދުންހުލިއަކީ 1-2 ހަފްތާގެ ތެރޭގައި އަމިއްލައަށް ރަނގަޅުވެދާނެ ކަމެކެވެ. ނަމަވެސް، އަވަހަށް ފަސޭހަވުމަށްޓަކައި ތާފަނާ ފެނުން ބޮޑިތާންކުރުމަކީ ވަރަށް ރަނގަޅު ކަމެކެވެ. މިގޮތުން ދުވާލަކު 2-4 ފަހަރު، ކޮންމެ ފަހަރަކު 10-15 މިނިޓަށް ބޮޑިތާންކުރެވިދާނެއެވެ. މީގެ އިތުރުން، އަނދުންހުލި ރަނގަޅުނުވެ ގިނަ ދުވަސްވާނަމަ ޑޮކްޓަރަށް ދެއްކުމުން އަނދުންހުލި އެތެރޭގައި ދޮސްހެދިފައިވާ ހާލަތެއްގައިނަމަ ފަޅާލައިގެން ދޮސްތައް ނެރެ ސާފުކޮށްލަން ޖެހިދާނެއެވެ. އަދި އެނޫންވެސް ޑޮކްޓަރީބޭސް ބޭނުން ކުރަން ޖެހިދާނެއެވެ.
ރައްކާތެރިވުމުގެ ގޮތުން އަޅަންޖެހޭ ފިޔަވަޅުތައް
އަނދުންހުލިން ރައްކާތެރިވުމަށްޓަކައި އަންނަނިވި ކަންތައްތަކަށް ސަމާލުކަން ދިނުން މުހިންމެވެ:
- އަބަދުވެސް ލޮލުގައި އަތްލުމުގެ ކުރިން އަތް ރަނގަޅަށް ދޮވުން
- ކޮންޓެކްޓް ލެންސް ބޭނުންކުރާނަމަ، އެތަކެތި ރަނގަޅަށް ސާފުކުރުން
- ލޯ ކައިރީގައާއި އެސްފިޔައިގަ ހާކާ މޭކަޕް ފަދަ ތަކެތި ރަނގަޅަށް ސާފުކުރުން
- އެހެން މީހުންގެ ލޮލުގައި ހާކަން ބޭނުންކުރާ މޭކަޕް މަސްކަރާގެ ފިހި ފަދަ ތަކެތި ބޭނުން ނުކުރުން
- ރޭގަނޑުގެ ނިދުން؛ ގަވާއިދުން ނުނިދާނަމަ ލޮލުގައި އަނދުން ހުލި ނެގުން އެކަށީގެންވޭ
- ރޭގަނޑުގެ ލަސްގަޑިިތަކުގައި ފޯނުގެ ސްކްރީނަށް ބަލަހައްޓައިގެން އިނުން ރަނގަޅެއް ނޫން
އަނދުންހުލި ރަނގަޅު ނުވެ ދިގުލައިގެން ދާނަމަ، ނުވަތަ ތަކުރާރުކޮށް ނަގާނަމަ، ޑޮކްޓަރެއްގެ ލަފާ ހޯދުމަކީ މުހިންމު ކަމެކެވެ. އެއީ އިތުރު ފަރުވާއެއް ބޭނުން ވެދާނެތީއެވެ.